ദക്ഷിണ കൊറിയൻ വാഹന നിർമ്മാതാക്കളായ ഹ്യുണ്ടായിയുടെ ഇന്ത്യയിലെ മികച്ച വിൽപ്പനയുള്ള മോഡലാണ് ഹ്യുണ്ടായ് ക്രെറ്റ. ഈ എസ്‌യുവിയുടെ ഇലക്ട്രിക് പതിപ്പിനെ 2024 ഡിസംബറിൽ ചെന്നൈ ആസ്ഥാനമായുള്ള പ്ലാൻ്റിൽ ഉൽപ്പാദനത്തിൽ പ്രവേശിക്കുമെന്ന് കമ്പനി സ്ഥിരീകരിച്ചുവെന്നാണ് പുതിയ റിപ്പോര്‍ട്ടുകൾ. ഇത് ഹ്യുണ്ടായിയുടെ പ്രാദേശികമായി നിർമ്മിക്കുന്ന ആദ്യത്തെ ഇവിയായി മാറും. ഹ്യുണ്ടായ് ക്രെറ്റ ഇവിയുടെ ഔദ്യോഗിക ലോഞ്ച് തീയതി ഇതുവരെ പ്രഖ്യാപിച്ചിട്ടില്ലെങ്കിലും 2025 ൻ്റെ ആദ്യ പാദത്തിൽ മോഡൽ നിരത്തിലെത്താൻ സാധ്യതയുണ്ട്.
കൂടാതെ, പൂനെ പ്ലാൻ്റിനെ പ്രതിവർഷം രണ്ടുലക്ഷം യൂണിറ്റ് ശേഷിയുള്ള ഉൽപ്പാദന കേന്ദ്രമാക്കി മാറ്റാനും കമ്പനി ലക്ഷ്യമിടുന്നു. അടുത്ത വർഷം രണ്ടാം പകുതിയിൽ ഈ സൗകര്യം പ്രവർത്തനക്ഷമമാകും. ഹ്യുണ്ടായിയുടെ ചെന്നൈ പ്ലാൻ്റിന് നിലവിൽ 8.24 ലക്ഷം യൂണിറ്റ് ഉൽപ്പാദന ശേഷിയുണ്ട്. 2025 അവസാനത്തോടെ 10 ലക്ഷത്തിലധികം ഉൽപ്പാദന ശേഷി കൈവരിക്കാനുള്ള കമ്പനിയുടെ ഉദ്ദേശ്യത്തെക്കുറിച്ച് ഇത് വ്യക്തമായി സൂചന നൽകുന്നു.
വരാനിരിക്കുന്ന ഹ്യുണ്ടായ് ക്രെറ്റ ഇവിയെക്കുറിച്ച് പറയുമ്പോൾ, മോഡൽ ഫെയ്‌സ്‌ലിഫ്റ്റ് ചെയ്ത ക്രെറ്റയെ അടിസ്ഥാനമാക്കിയുള്ളതായിരിക്കും. എൽജി കെമിൽ നിന്നുള്ള 45kWh ബാറ്ററി പായ്ക്ക് ഉപയോഗിച്ച് ഈ ഇലക്ട്രിക് എസ്‌യുവി വാഗ്ദാനം ചെയ്യുമെന്നും റിപ്പോര്‍ട്ടുകൾ പറയുന്നു. വരാനിരിക്കുന്ന മാരുതി സുസുക്കി eVX , നിലവിലുള്ള എംജി ഇസെഡ്എസ് ഇവി എന്നിവയേക്കാൾ ചെറുതായിരിക്കും ഇതിൻ്റെ ബാറ്ററി പാക്ക് .
48kWh, 60kWh എന്നിങ്ങനെ രണ്ട് ബാറ്ററി പാക്ക് ഓപ്ഷനുകളോടെ ഇവിഎക്സ് വരാൻ സാധ്യതയുണ്ട്. കൂടാതെ XS EV 50.3kWh ബാറ്ററിയിൽ ലഭ്യമാണ്. ആഗോള വിപണിയിൽ റീട്ടെയിൽ ചെയ്യുന്ന കോന ഇവിയിൽ നിന്ന് പുതിയ ക്രെറ്റ ഇവി ഇലക്ട്രിക് മോട്ടോർ കടമെടുത്തേക്കാം. രണ്ടാമത്തേത് ഫ്രണ്ട് ആക്‌സിലിൽ ഘടിപ്പിച്ച ഒരൊറ്റ മോട്ടോർ ഉപയോഗിച്ചാണ് വരുന്നത്. ഈ സജ്ജീകരണം പരമാവധി 138 ബിഎച്ച്പി കരുത്തും 255 എൻഎം ടോർക്കും നൽകുന്നു.
അതേസമയം, ഹ്യുണ്ടായ് മോട്ടോർ ഇന്ത്യ വരും മാസങ്ങളിൽ അപ്‌ഡേറ്റ് ചെയ്ത അൽകാസറിനെ അവതരിപ്പിക്കാനുള്ള ഒരുക്കത്തിലാണ് . വാഹനത്തിൽ ചെറിയ മാറ്റങ്ങൾ വരുത്തുമെന്നാണ് പ്രതീക്ഷിക്കുന്നത്. പുതിയ മോഡലിന് ADAS ടെക്, പനോരമിക് സൺറൂഫ്, ഡ്യുവൽ സോൺ ക്ലൈമറ്റ് കൺട്രോൾ, വെൻ്റിലേറ്റഡ് സീറ്റുകൾ, ഡ്യുവൽ സ്‌ക്രീൻ സജ്ജീകരണം തുടങ്ങിയ ഫീച്ചറുകൾ ലഭിക്കും. പുതിയ ഇൻ്റീരിയർ തീമിലും അപ്‌ഹോൾസ്റ്ററിയിലും എസ്‌യുവി വന്നേക്കുമെന്നും റിപ്പോര്‍ട്ടുകൾ പറയുന്നു.
Last Updated Apr 26, 2024, 5:26 PM IST
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
