ഇന്ത്യയുടെ സ്വന്തം ബഹിരാകാശ നിലയം: ഭാരതീയ അന്തരീക്ഷ് സ്റ്റേഷന്റെ മാതൃക പുറത്തിറക്കി ഐഎസ്ആർഒ

ന്യൂഡൽഹി ∙ ഭാരതീയ അന്തരീക്ഷ് സ്റ്റേഷന്റെ (ബിഎഎസ്) മാതൃക പുറത്തിറക്കി. ഇന്ത്യയുടെ സ്വന്തം ബഹിരാകാശ നിലയപദ്ധതിയാണ് ഭാരതീയ അന്തരീക്ഷ് സ്റ്റേഷന്‍.

2028 ആകുമ്പോഴേക്കും ആദ്യ മൊഡ്യൂൾ ഭ്രമണപഥത്തിലെത്തിക്കാനാണ് ഇന്ത്യ ലക്ഷ്യമിടുന്നത്. ദേശീയ ബഹിരാകാശ ദിനാഘോഷത്തിന്റെ ഭാഗമായാണ് ബിഎഎസ് മാതൃക പുറത്തിറക്കിയത്.

നിലവിൽ 5 ബഹിരാകാശ ഏജൻസികളുടെ സംയുക്തസംരംഭമായ ഇന്റർനാഷനൽ സ്പേസ് സ്റ്റേഷനും (ഐഎസ്എസ്) ചൈനയുടെ ചിയാൻഗോങ് സ്പേസ് സ്റ്റേഷനുമാണ് ബഹിരാകാശത്ത് ഉള്ളത്.
2035 ആകുമ്പോഴേക്കും 5 മൊഡ്യൂളുകൾ ഭ്രമണപഥത്തിലെത്തിക്കുകയാണു ലക്ഷ്യം. ബിഎഎസ് 01 മൊഡ്യൂളിനു 10 ടൺ ഭാരം വരും.

ഭൂമിയിൽനിന്ന് 450 കിലോമീറ്റർ ഉയരത്തിലാണു സ്ഥാപിക്കുക. ബഹിരാകാശത്തിലെ വിവിധഘടകങ്ങളുടെ പഠനത്തിനുള്ള ഗവേഷണകേന്ദ്രം എന്ന നിലയിലാവും ബിഎഎസ് പ്രവർത്തിക്കുക.

ജീവശാസ്ത്രം, വൈദ്യശാസ്ത്രം എന്നിവയിലാണ് ഊന്നൽ. ഈ ബഹിരാകാശ നിലയം ബഹിരാകാശ വിനോദസഞ്ചാരത്തെയും പിന്തുണയ്ക്കും.

ബിഎഎസ് ബഹിരാകാശ‌ മേഖലയിലെ നിലവിലെ അന്താരാഷ്ട്ര സഹകരണങ്ങൾക്ക് കൂടുതൽ സഹായകരമാകുന്ന ഹബ്ബായി മാറും.

…