ഹോണ്ടയുമായി തെറ്റിപ്പിരിഞ്ഞ നിസാനെ പങ്കാളിയാക്കാൻ ഇന്നോവ മുതലാളിയുടെ നീക്കം

ലോകത്തിലെ ഏറ്റവും വലിയ രണ്ട് ഓട്ടോമൊബൈൽ കമ്പനികളായ നിസാൻ മോട്ടോഴ്‌സും ഹോണ്ട മോട്ടോഴ്‌സും അടുത്തിടെ ലയനം പ്രഖ്യാപിച്ചിരുന്നു. 2024 അവസാനത്തോടെ രണ്ട് കമ്പനികളും ഈ ലയനത്തിനായി പ്രവർത്തിക്കാൻ തുടങ്ങി. എന്നാൽ പല വിഷയങ്ങളിലും രണ്ട് കമ്പനികളും തമ്മിൽ സമവായം ഉണ്ടായിരുന്നില്ല. 2025 ഫെബ്രുവരിയിൽ, രണ്ട് ഓട്ടോ കമ്പനികളും ഔദ്യോഗികമായി ചർച്ചകൾ അവസാനിപ്പിച്ചു. അതിനു പിന്നിലെ ഒരു കാരണം നിസ്സാൻ മോട്ടോഴ്‌സ് ഹോണ്ടയുടെ അനുബന്ധ സ്ഥാപനമാകാൻ വിസമ്മതിച്ചു എന്നതാണ്. അതിനുശേഷം, വൈദ്യുതീകരണത്തിലും സോഫ്റ്റ്‌വെയർ വികസനത്തിലും ഹോണ്ടയും നിസാനും ഇപ്പോഴും സഹകരിക്കുന്നുണ്ടെങ്കിലും, ഒരു പൂർണ്ണമായ ലയനം നടക്കില്ല എന്ന് ഉറപ്പായി. ഇപ്പോഴിതാ നിസാനുമായുള്ള സഖ്യത്തിനായി മറ്റൊരു ജാപ്പനീസ് വാഹന ഭീമനായ ടൊയോട്ട  മുന്നോട്ടുവന്നതായാണ് പുതിയ റിപ്പോർട്ടുകൾ. 

ജപ്പാനിലെ മൈനിച്ചി ഷിംബുൺ ദിനപത്രത്തിന്റെ റിപ്പോർട്ട് പ്രകാരം, ഹോണ്ടയും നിസ്സാനും തമ്മിലുള്ള ലയന ചർച്ചകൾ ഇപ്പോൾ പൂർണ്ണമായും അവസാനിച്ചു. അത്തരമൊരു സാഹചര്യത്തിൽ, ചില വിഷയങ്ങളിൽ പങ്കാളിത്തത്തിനായി ടൊയോട്ട നിസ്സാൻ മോട്ടോറുമായി ബന്ധപ്പെട്ടു എന്നും പത്രം റിപ്പോർട്ട് ചെയ്യുന്നു. ഹോണ്ടയും നിസ്സാനും തമ്മിലുള്ള ലയന ചർച്ചകൾ അവസാനിക്കുന്നതിന് മുമ്പ്, ഏതെങ്കിലും തരത്തിലുള്ള പങ്കാളിത്തത്തെക്കുറിച്ച് ടൊയോട്ട നിസ്സാനുമായി ചർച്ച നടത്തിയതായി മൈനിച്ചി ഷിംബുൺ ദേശീയ പത്രം അവകാശപ്പെട്ടു. എന്നാൽ നിലവിൽ, ഈ സംഭാഷണത്തെക്കുറിച്ച് രണ്ട് ജാപ്പനീസ് കമ്പനികളും ഔദ്യോഗിക വിശദീകരണങ്ങളൊന്നും നൽകിയിട്ടില്ല.

അതേസമയം ഹോണ്ടയും നിസ്സാനും തമ്മിലുള്ള പൂർണ്ണ ലയന കരാർ പാളം തെറ്റിയെങ്കിലും, ഇരു കമ്പനികളും തങ്ങളുടെ കാർ പോർട്ട്‌ഫോളിയോ വൈദ്യുതീകരിക്കുന്നതിനും അവർക്കായി സോഫ്റ്റ്‌വെയർ വികസിപ്പിക്കുന്നതിനും ഇപ്പോഴും ഒരുമിച്ച് പ്രവർത്തിക്കുന്നു. കഴിഞ്ഞ അഞ്ച് വർഷമായി ലോകത്തിലെ ഒന്നാം നമ്പർ കാർ കമ്പനിയാണ് ജപ്പാനിലെ ടൊയോട്ട മോട്ടോഴ്‌സ്. ലോകത്ത് ഏറ്റവും കൂടുതൽ വിറ്റഴിക്കപ്പെടുന്ന കാറുകൾ ടൊയോട്ട കാറുകളാണ്.ടൊയോട്ടയുടെ മറ്റൊരു പ്രത്യേകത, ജപ്പാനിലെ മിക്ക ഓട്ടോ കമ്പനികളിലും അവർക്ക് ഓഹരി പങ്കാളിത്തമുണ്ട് എന്നതാണ്. സുബാരുവിൽ 20 ശതമാനവും, മസ്‍ദയിൽ 5.1 ശതമാനവും, സുസുക്കിയിൽ 4.9 ശതമാനവും, ഇസുസുവിൽ 5.9 ശതമാനവും ഓഹരി പങ്കാളിത്തമാണ് കമ്പനിക്കുള്ളത്. അതേസമയം നിസാന് ഇതിനകം തന്നെ റെനോ, മിത്സുബിഷി എന്നിവയുമായി പങ്കാളിത്തമുണ്ട്. ടൊയോട്ടയും നിസാനും കൈകോർത്താൽ ആഗോളതലത്തിൽ മറ്റൊരു മെഗാ ഓട്ടോമൊബൈൽ ബ്രാൻഡ് സൃഷ്‍ടിക്കപ്പെടും. 

…