“മോഹൻലാലിനൊപ്പം നിൽക്കാൻ സം​ഗീതിന് സാധിക്കുന്നുണ്ട്”: സത്യൻ അന്തിക്കാട്

ഓണം റിലീസുകളിൽ മലയാളി പ്രേക്ഷകർ ഏറ്റവും കൂടുതൽ കാത്തിരിക്കുന്ന ചിത്രമാണ് മോഹൻലാലിനെ നായകനാക്കി സത്യൻ അന്തിക്കാട് സംവിധാനം ചെയ്യുന്ന ‘ഹൃദയപൂർവ്വം’. എന്നും എപ്പോഴും എന്ന ചിത്രത്തിന് ശേഷം പത്ത് വർഷങ്ങൾക്ക് ശേഷമാണ് സത്യൻ അന്തിക്കാട്- മോഹൻലാൽ കോംബോ ഒന്നിക്കുന്നത്.

മോഹൻലാലിനൊപ്പം സംഗീത് പ്രതാപും ചിത്രത്തിൽ പ്രധാന വേഷത്തിൽ എത്തുന്നുണ്ട്. പ്രേമലു എന്ന ചിത്രത്തിലൂടെ മികച്ച പ്രകടനം കാഴ്ചവെച്ച സംഗീതിന്റെ കരിയറിൽ മികച്ച വേഷമായിരിക്കും ഹൃദയപൂർവ്വത്തിലേതെന്ന് പ്രേക്ഷകരും പ്രതീക്ഷിക്കുന്നു.

നേരത്തെ തരുൺ മൂർത്തിയുടെ തുടരും എന്ന ചിത്രത്തിലും സംഗീത് പ്രതാപ് മോഹൻലാലിനൊപ്പം വേഷമിട്ടിരുന്നു. ഇപ്പോഴിതാ മോഹൻലാൽ- സംഗീത് കോംബോയെ കുറിച്ച്‌ സംസാരിക്കുകയാണ് സംവിധായകൻ സത്യൻ അന്തിക്കാട്.

സംഗീത് ഏറ്റവും കൂടുതൽ ചിരിച്ചത് മോഹൻലാലിനൊപ്പമുള്ള രംഗങ്ങളിലാണെന്നാണ് സത്യൻ അന്തിക്കാട് പറയുന്നത്. കൗമുദിക്ക് നൽകിയ അഭിമുഖത്തിലായിരുന്നു സത്യൻ അന്തിക്കാട് സംഗീതിനെയും മോഹൻലാലിനെയും കുറിച്ച് സംസാരിച്ചത്.

“മോഹൻലാലിനൊപ്പം സം​ഗീത് പ്രതാപ് വരുമ്പോൾ അതൊരു ഡിഫറന്റ് കോമ്പിനേഷനാണ്. പ്രേമലുവിലെ അമൽ ഡേവിസ് എന്ന കഥാപാത്രത്തിലൂടെ ഏറ്റവും കൂടുതൽ പ്രേക്ഷകരെ ആകർഷിച്ച നടനാണ് സം​ഗീത്.

അതുകൊണ്ട് തന്നെ സം​ഗീത്-ലാൽ കോമ്പിനേഷൻ ഈ പടത്തിന്റെ ഹൈലൈറ്റാണ്. സ്വഭാവിക അഭിനയത്തിന്റെ ഉസ്താദുക്കളാണ് രണ്ടുപേരും.

മോഹൻലാലിനൊപ്പം നിൽക്കാൻ സം​ഗീതിന് സാധിക്കുന്നുണ്ട്. അതിന് മോഹൻലാലിനെയാണ് ഏറ്റവും കൂടുതൽ സമ്മതിക്കേണ്ടത്.

സം​ഗീതിന് ലാൽ സാർ എന്നൊരു അകൽച്ചയുണ്ടായിരുന്നു. പക്ഷെ ആദ്യ ദിവസം തന്നെ ലാൽ അത് മാറ്റിയെടുത്തു.

നിങ്ങളുടെ അച്ഛന്മാരുടെ കൂടെ ഞാൻ വർക്ക് ചെയ്തിട്ടുള്ളതാണെന്നാണ് ലാൽ മാളവികയോടും സം​ഗീതിനോടും പറഞ്ഞത്. അന്ന് തൊട്ട് ഇവർ ഫ്രണ്ട്സാണ്.

സം​ഗീത് ഏറ്റവും കൂടുതൽ ചിരിച്ചത് ലാലിനൊപ്പമുള്ള സീക്വൻസുകളിലാണ്. അവർ ഫ്രീയായി കഴിയുമ്പോഴാണ് കൂടുതൽ ഔട്ട്പുട്ട് കിട്ടുന്നത്.

മലയാളികൾക്ക് എല്ലാകാലത്തും മികച്ച സിനിമകൾ സമ്മാനിച്ച കൂട്ടുകെട്ടാണ് മോഹൻലാൽ- സത്യൻ അന്തിക്കാട് കോംബോ. ടി.പി ബാലഗോപാലൻ എംഎ, ഗാന്ധിനഗർ സെക്കന്റ് സ്ട്രീറ്റ്, സന്മനസ്സുള്ളവർക്ക് സമാധാനം, നാടോടികാറ്റ്, പട്ടണപ്രവേശം, വരവേൽപ്, പിൻഗാമി, രസതന്ത്രം, ഇന്നത്തെ ചിന്താവിഷയം, സ്നേഹവീട്, എന്നും എപ്പോഴും തുടങ്ങീ മികച്ച സിനിമകളാണ് ഈ കൂട്ടുകെട്ടിൽ പുറത്തിറങ്ങിയിട്ടുള്ളത്.

അതേസമയം അഖിൽ സത്യന്റെ കഥയ്ക്ക് സോനു ടി.പിയാണ് തിരക്കഥ രചിക്കുന്നത്. മാളവിക മോഹനൻ ആണ് ചിത്രത്തിൽ മോഹൻലാലിന്റെ നായികയായെത്തുന്നത്.

കൂടാതെ സംഗീത്പ്രതാപ്, സംഗീത, സിദ്ധിഖ്, ലാലു അലക്സ്, ജനാർദ്ദനൻ, ബാബുരാജ് തുടങ്ങീ മികച്ച താരനിരയും ചിത്രത്തിൽ അണിനിരക്കുന്നു. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിക്കുന്ന ചിത്രത്തിൽ ജസ്റ്റിൻ പ്രഭാകരൻ ആണ് സംഗീതം നൽകുന്നത്.

കുടുംബപ്രേക്ഷകരെ ഇപ്പോഴും തൃപ്തിപ്പെടുത്തുന്ന മോഹൻലാൽ- സത്യൻ അന്തിക്കാട് കൂട്ടുകെട്ട് പുതിയ ചിത്രത്തിലും പ്രേക്ഷകഹൃദയം കീഴടക്കുമോ എന്നാണ് ഏവരും ഉറ്റുനോക്കുന്നത്. …