ഗുവാഹത്തി: ഐപിഎല്ലില്‍ ഇന്ന് രണ്ടാം സ്ഥാനം നിലനിര്‍ത്താന്‍ ഇറങ്ങുകയാണ് രാജസ്ഥാന് റോയല്‍സ്. പ്രാഥമിക റൗണ്ടിലെ അവസാന മത്സരത്തില്‍ കൊല്‍ക്കത്ത നൈറ്റ് റൈഡേഴ്‌സാണ് രാജസ്ഥാന്റെ എതിരാളി. ഇന്ന് ജയിക്കാനായാല്‍ രാജസ്ഥാന് രണ്ടാം സ്ഥാനം നിലനിര്‍ത്താം. അതിന് മുമ്പ് 3.30ന് സണ്‍റൈസേഴ്‌സ് ഹൈദരാബാദ് – പഞ്ചാബ് കിംഗ്‌സ് മത്സരം നടക്കാനുണ്ട്. ഹൈദരാബാദ് ഇന്ന് തോറ്റാലും രാജസ്ഥാന് രണ്ടാം സ്ഥാനം നിലനിര്‍ത്താം. രാജസ്ഥാനിപ്പോള്‍ 16 പോയിന്റും ഹൈദരാബാദിന് 15 പോയിന്റുമാണുള്ളത്. ജയിച്ചാല്‍ ഹൈദരാബാദിന് 17 പോയിന്റാവും. പിന്നീട് ഹൈദരബാദിനെ മറികടക്കണമെങ്കില്‍ രാജസ്ഥാന് ജയിച്ചേ മതിയാവൂ.
ഹൈദരാബാദ് – ഗുജറാത്ത് ടൈറ്റന്‍സ് മത്സരം മഴ മുടക്കിയതോടെയാണ് രാജസ്ഥാന് നേട്ടമുണ്ടായത്. ഗുജറാത്തിനെ തോല്‍പ്പിച്ചിരുന്നെങ്കില്‍ പോയിന്റ് പട്ടികയില്‍ രാജസ്ഥാനെ മറികടന്നന് രണ്ടാമതെത്താനുള്ള അവസരം ഹൈദരാബാദിനുണ്ടായിരുന്നു. എന്നാല്‍ മത്സരം മഴ മുടക്കിയതോടെ ഇരുവര്‍ക്കും പോയിന്റ് പങ്കിടേണ്ടിവന്നു. അതേസമയം, കൊല്‍ക്കത്ത നേരത്തെ ഒന്നാം സ്ഥാനം ഉറപ്പിച്ചുകഴിഞ്ഞു. ഇന്ന് തോറ്റാല്‍ പോലും അവര്‍ക്ക് ഒന്നാംസ്ഥാനം നഷ്ടമാവില്ല. ഒന്നും രണ്ടും സ്ഥാനക്കാരാണ് ആദ്യ ക്വാളിഫയറില്‍ കളിക്കുക.
അതില്‍ ജയിക്കുന്ന ടീം ഫൈനലിലെത്തും. തോല്‍ക്കുന്ന ടീമിന് ഒരു മത്സരം കൂടി ബാക്കിയുണ്ട്. പോയിന്റ് പട്ടികയിലെ മൂന്നും നാലും സ്ഥാനക്കാര്‍ എലിമിനേറ്ററില്‍ നേര്‍ക്കുനേര്‍ വരും. ജയിക്കുന്ന ടീം രണ്ടാം ക്വാളിഫയറിന് യോഗ്യത നേടും. തോല്‍ക്കുന്ന ടീം പുറത്തേക്കും. രണ്ടാം ക്വാളിഫയര്‍ മത്സരത്തില്‍ ആദ്യ ക്വാളിഫയറിലെ തോറ്റ ടീമും എലിമിനേറ്ററിലെ വിജയികളും നേര്‍ക്കുന്നേര്‍ വരും. ജയിക്കുന്ന ടീം ഫൈനലിലേക്ക് പ്രവേശിക്കും.
രണ്ടാം സ്ഥാനത്ത് അവസാനിപ്പിച്ചാല്‍ രാജസ്ഥാന് ദുര്‍ഘടവഴി ഒഴിവാക്കാം. ഇനി ആദ്യ ക്വാളിഫയറില്‍ തോറ്റാലും വീണ്ടും അവസരമുണ്ട്. അതുകൊണ്ട് കൊല്‍ക്കത്തയോട് വിജയം മാത്രമായിരിക്കും സഞ്ജുവിന്റേയും സംഘത്തിന്റേയും ലക്ഷ്യം.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
