‘ആഘോഷങ്ങളുടെ തലസ്ഥാനം’; ലോകത്ത് ഏറ്റവും കൂടുതൽ പൊതു അവധികൾ നൽകുന്ന രാജ്യം മറ്റാരുമല്ല, ആ റെക്കോര്‍ഡ് ഇന്ത്യയ്ക്ക്! കണക്കുകൾ ഇങ്ങനെ

ആഘോഷങ്ങൾ വന്നാൽ എല്ലാവർക്കും സന്തോഷമാണ്. പക്ഷേ അത് ഞായറാഴ്ചയായാലോ? ഒരു ലീവ് പോയല്ലോ എന്നോർത്ത് പലർക്കും സങ്കടമാകും.

സത്യത്തിൽ ഇന്ത്യയിൽ ഒരു വർഷം എത്ര പൊതു അവധികൾ കിട്ടുന്നുണ്ടെന്ന് അറിയാമോ?  കേട്ടാൽ അതിശയം തോന്നാം. ലോകത്ത് ഏറ്റവും കൂടുതൽ പൊതു അവധി നൽകുന്ന രാജ്യങ്ങളിലൊന്നാണ് ഇന്ത്യ.

മിക്ക രാജ്യങ്ങളും വർഷത്തിൽ ശരാശരി 13 പൊതു അവധികൾ നൽകുമ്പോൾ, ഇന്ത്യയുടെ സാംസ്കാരികവും മതപരവുമായ വൈവിധ്യം കാരണം ഇവിടെ 42 പൊതു അവധികൾ ലഭിക്കുന്നു. റിപ്പബ്ലിക് ദിനം, സ്വാതന്ത്ര്യദിനം പോലെയുള്ള ദേശീയ ആഘോഷങ്ങൾ, ദീപാവലി, ഹോളി, ഈദ്, ക്രിസ്മസ്, ഗുരുനാനാക്ക് ജയന്തി തുടങ്ങിയവയും സംസ്ഥാന തലത്തിലുള്ള ഉത്സവങ്ങളും ചേരുമ്പോൾ ഇന്ത്യയിൽ 42 പൊതു അവധികളുണ്ട്.

പുതിയ 2026 സൂചികയും മറ്റ് റിപ്പോർട്ടുകളും അനുസരിച്ച്, 190 രാജ്യങ്ങളെ പിന്തള്ളിയാണ് ഇന്ത്യ ഒന്നാം സ്ഥാനം നേടിയത്. ജോലിയും ജീവിതവും ഒരുപോലെ കൊണ്ടുപോകുന്നതിനൊപ്പം ‘ആഘോഷങ്ങളുടെ തലസ്ഥാനം’ എന്ന പേരും ഇന്ത്യക്കുണ്ട്.

ഇന്ത്യയുടെ ഈ ഒന്നാം സ്ഥാനം രാജ്യത്തിൻ്റെ വൈവിധ്യത്തെയാണ് കാണിക്കുന്നത്. ഹിന്ദുമതം, ഇസ്ലാം, സിഖ്, ക്രിസ്ത്യൻ, ജൈന, ബുദ്ധമതങ്ങൾ തുടങ്ങി നിരവധി മതങ്ങളുടെ ആഘോഷങ്ങൾ ഇവിടെ ദേശീയമോ പ്രാദേശികമോ ആയ അവധിക്ക് കാരണമാകുന്നു.ഇന്ത്യയിൽ മിക്കവാറും എല്ലാ മാസവും ഏതെങ്കിലും ആഘോഷമുണ്ടാകും.

ഈ അവധികൾ കുടുംബത്തോടൊപ്പം സമയം ചെലവഴിക്കാനും സന്തോഷം പങ്കുവെക്കാനും വിശ്രമിക്കാനും സഹായിക്കുന്നു. ഇന്ത്യയിലെ ദേശീയ അവധികളുടെ എണ്ണം ഏകദേശം 12 മുതൽ 21 വരെയാണ്.

എന്നാൽ എല്ലാ സംസ്ഥാനങ്ങളിലെയും അവധികൾ ചേരുമ്പോൾ ഈ സംഖ്യ 42-ൽ എത്തുന്നു.ഇന്ത്യ കഴിഞ്ഞാൽ ഏറ്റവും കൂടുതൽ അവധി നൽകുന്ന രാജ്യം നേപ്പാളാണ്. ഇവിടെ ആകെ 35 പൊതു അവധികളുണ്ട്.

നേപ്പാളിനെ ഹിന്ദു-ബുദ്ധമത പാരമ്പര്യങ്ങൾ ഒരുപാട് സ്വാധീനിച്ചിട്ടുണ്ട്. ദസറ, തീജ്, ലോസർ തുടങ്ങിയ ആഘോഷങ്ങൾ ഇവിടെ ഗംഭീരമായി ആഘോഷിക്കുന്നു.

നേപ്പാളിലെ അവധികൾ ഇന്ത്യയിലേതിന് സമാനമാണെങ്കിലും എണ്ണത്തിൽ അല്പം കുറവാണ്. 30 പൊതു അവധികളുമായി മ്യാൻമർ ആണ് മൂന്നാം സ്ഥാനത്ത്.

തിംഗ്യാൻ, മറ്റ് ബുദ്ധമത ആഘോഷങ്ങൾ എന്നിവയാണ് ഇവിടെ പ്രധാനം. അവധികളുടെ കാര്യത്തിൽ ഏഷ്യൻ രാജ്യങ്ങളാണ് മുന്നിൽ.

ഇവിടുത്തെ മതപരവും സാംസ്കാരികവുമായ വൈവിധ്യമാണ് കൂടുതൽ അവധി ദിനങ്ങൾക്ക് കാരണം. ഇന്ത്യയിൽ ലഭിക്കുന്ന ഈ അധിക അവധികൾ ഉത്പാദനക്ഷമതയെ ബാധിക്കുമെന്ന് ഒരു വാദമുണ്ട്.

എന്നാൽ ഈ അവധികൾ ജോലി ചെയ്യാൻ കൂടുതൽ ഉത്സാഹം നൽകുന്നു എന്നും പറയപ്പെടുന്നു. വിനോദസഞ്ചാരം, ഷോപ്പിംഗ് എന്നിവയിലൂടെ ഇത് സമ്പദ്‌വ്യവസ്ഥയെ നല്ല രീതിയിലും സ്വാധീനിക്കുന്നുണ്ട്.

… FacebookTwitterWhatsAppTelegram