ബഹിരാകാശ ദൗത്യം പൂർത്തിയാക്കി ഭൂമിയിലേക്ക്; പ്രതിശ്രുത വധു ലോറൻ സാഞ്ചസിനെ ആലിംഗനം ചെയ്ത് ജെഫ് ബെസോസ്

ടെക്സസ്∙ ബ്ലൂ ഒറിജിന്റെ എൻഎസ് 31 ബഹിരാകാശ ദൗത്യം പൂർത്തിയാക്കിയ തന്റെ പ്രതിശ്രുത വധു ലോറൻ സാഞ്ചസിനെ ആവേശത്തോടെ ആലിംഗനം ചെയ്തു സ്വീകരിച്ച് ബ്ലൂ ഒറിജിൻ സ്ഥാപകന്‍ . ലോറൻ ഉൾപ്പെടെയുള്ള ആറുപേർ തിരികെ ഭൂമിയിലെത്തിയ ഉടൻ തന്നെ അവർ സഞ്ചരിച്ച ക്യാപ്സ്യൂളിന്റെ അരികിലേക്ക് ജെഫ് വേഗത്തിൽ നടന്നെത്തി. ക്യാപ്സ്യൂളിനെ ചുറ്റി ഓരോ ചില്ലിലൂടെയും ജെഫ് ആവേശത്തോടെ അകത്തേക്കു നോക്കുന്നത് സംഭവത്തിന്റെ ലൈവ് ദൃശ്യങ്ങളിൽ കാണാം. യാത്രികരെ പുറത്തിറക്കാനുള്ള സജീകരണങ്ങളൊരുക്കുന്നതും നിരീക്ഷിക്കുന്നുണ്ട്. ഇതിനിടയിൽ, ജെഫ് ഒരു കുഴിയിൽ കമിഴ്ന്നു വീഴുകയും ചെയ്തു. എന്നാൽ, കുഴപ്പങ്ങളൊന്നുമില്ലാതെ അദ്ദേഹം എഴുന്നേൽക്കുന്നതു വിഡിയോയിൽ കാണാം.

സജ്ജീകരണങ്ങൾ പൂർത്തിയായ ശേഷം, ജെഫ് തന്നെയാണ് ഇവർക്കു പുറത്തിറങ്ങാനായി ക്യാപ്സ്യൂളിന്റെ ലാച്ച് അഥവ വാതിൽ തുറന്നത്. ആവേശത്തോടെ യാത്രികർക്ക് ആശംസ അറിയിച്ച്, ലോറനായി ജെഫ് പുറത്തു കാത്തുനിന്നു. ലോറനാണ് ആദ്യം പുറത്തിറങ്ങിയത്. നിറപുഞ്ചിരിയോടെ ഇരു കൈകളും ഉയർത്തിയാണ് ജെഫ് ലോറനെ തിരികെ ഭൂമിയിലേക്ക് സ്വാഗതം ചെയ്തത്. ക്യാപ്സ്യൂളിന്റെ പടികളിറിങ്ങിയെത്തിയ ലോറന്റെ അടുത്തേക്കു ചെന്ന് ജെഫ് ആലിംഗനവും ചുംബനങ്ങളും നൽകി വാരിപ്പുണർന്നു.

വൈകാതെ, ഇവർക്കു പിന്നാലെ ഗായിക ക്യേറ്റി പെറിയും മറ്റു യാത്രികരും പുറത്തേക്കു വന്നു. യുഎസ് മാധ്യമ പ്രവർത്തക ഗെയിൽ കിംങ്, നാസയിലെ മുൻ ശാസ്ത്രജ്ഞ ആയിഷ ബോവ്, പൗരാവകാശ പ്രവർത്തക അമാൻഡ ന്യൂയെൻ, ചലച്ചിത്ര നിർമാതാവ് കരിൻ ഫ്ലിൻ എന്നിവരായിരുന്നു സംഘത്തിലുണ്ടായിരുന്ന മറ്റുള്ളവർ. പത്ത് മിനിറ്റോളം നീണ്ടു നിന്ന ദൗത്യത്തിൽ, ഭൂമിക്കും ബഹിരാകാശത്തിനും ഇടയിലുള്ള കർമാൻ രേഖയിലൂടെ സഞ്ചരിച്ചാണ് പേടകം ഭൂമിയിൽ തിരിച്ചെത്തിയത്.