തിരുവനന്തപുരം : കേരളത്തിൽ നിന്നുള്ള 44 അംഗ തീർഥാടക സംഘo ഇസ്രായേലിൽ കുടുങ്ങി.
രണ്ട് വൈദികരും ഒരു കന്യാസ്ത്രീയും ഉൾപ്പെടെ കേരളത്തിൽ നിന്നുള്ള 44 പേരടങ്ങുന്ന സംഘം പലസ്തീൻ, ജോർദാൻ, ഇസ്രായേൽ, ഈജിപ്ത് എന്നിവിടങ്ങളിലേക്കുള്ള തീർത്ഥാടനത്തിന് ശേഷം യുദ്ധബാധിത ഇസ്രായേലിൽ കുടുങ്ങിക്കിടക്കുകയാണ്. യുദ്ധം പൊട്ടിപ്പുറപ്പെട്ട ഒക്ടോബർ 7 ന് സംഘം ഇസ്രായേലിൽ എത്തി. ഇപ്പോൾ ഒരു ഹോട്ടലിൽ താമസിക്കുകയാണ്. പുറത്തിറങ്ങുകയോ ഫോൺ വിളിക്കുകയോ ചെയ്യരുതെന്നും അധികൃതർ നിർദേശിച്ചിട്ടുണ്ട്. ഇസ്രയേലിലെ ഇന്ത്യൻ എംബസിയുമായി ഏകോപിപ്പിച്ച് അവരുടെ സംരക്ഷണം ഉറപ്പാക്കാനും ഹെൽപ്പ് ഡെസ്‌ക്കുകൾ സ്ഥാപിക്കാനും സീറോ മലബാർ സഭ ഇന്ത്യൻ, കേരള സർക്കാരുകളോട് അഭ്യർത്ഥിച്ചു.
മണിമല ഹോളി മാഗി ഫൊറോന പള്ളി വികാരി ഫാ.മാത്യു തണ്ണിയാത്ത്, പത്തനംതിട്ട കുളത്തൂർ ലിറ്റിൽ ഫ്ലവർ പള്ളി വികാരി ഫാ.ജേക്കബ് നടുവിലേക്കളം എന്നിവരുടെ നേതൃത്വത്തിലാണ് സംഘം പ്രവർത്തിക്കുന്നത്.
ഫലസ്തീൻ, ജോർദാൻ, ഇസ്രായേൽ , ഈജിപ്ത് എന്നിവിടങ്ങളിലേക്ക് തീർത്ഥാടനത്തിന് പോയ കോട്ടയത്ത് നിന്നും പത്തനംതിട്ടയിൽ നിന്നുമുള്ള നിരവധി കുടുംബങ്ങൾ യുദ്ധത്തിൽ തകർന്ന ഇസ്രായേലിൽ കുടുങ്ങിയവരിൽ ഉൾപ്പെടുന്നു.
ഒക്ടോബർ നാലിന് ഒരു ട്രാവൽ ഏജൻസി സംഘടിപ്പിച്ച ടൂറിൽ കേരളത്തിൽ നിന്ന് പോയ ഇവർ ഒക്ടോബർ 14ന് മടങ്ങാനിരിക്കുകയായിരുന്നു.
