ഐക്കണിക്ക് ഇരുചക്ര വാഹന ബ്രാൻഡായ റോയൽ എൻഫീൽഡ് ഫ്ലയിംഗ് ഫ്ലീ എന്ന പുതിയ ഉപബ്രാൻഡുമായി ഇലക്ട്രിക് ബൈക്കുകളുടെ ലോകത്തേക്ക് പ്രവേശിക്കുന്നു. ഈ ശ്രേണിയിലെ ആദ്യ ഉൽപ്പന്നം C6 ആണ്. 2024 ൽ മിലാനിൽ നടന്ന ഇഐസിഎംഎ മോട്ടോർ ഷോയിൽ ആണ് റോയൽ എൻഫീൽഡ് അതിന്റെ ആദ്യ ഇലക്ട്രിക് ബൈക്കായ ഫ്ലയിംഗ് ഫ്ലീ C6 അനാച്ഛാദനം ചെയ്തത്. തുടർന്ന് മെയ് 9 ന് അത് ബെംഗളൂരുവിൽ പ്രദർശിപ്പിച്ചു. ഫ്ലയിംഗ് ഫ്ലീ C6 പ്രധാനമായും ഒരു അർബൻ മോട്ടോർബൈക്കായാണ് വിൽക്കുക. എങ്കിലും നഗരങ്ങൾക്ക് പുറത്തുള്ള ലൈറ്റ്-ഡ്യൂട്ടി യാത്രകൾക്കും ഇത് ഉപയോഗിക്കാം. പക്ഷേ ദീർഘദൂര ടൂറിംഗ് ബൈക്കിന്റെ ഉപയോഗമല്ല ഇതിനെന്നും റോയൽ എൻഫീൽഡ് വ്യക്തമാക്കുന്നു.
റോയൽ എൻഫീൽഡ് ഫ്ലയിംഗ് ഫ്ലീ C6 ൽ നിന്ന് എന്ത് പ്രതീക്ഷിക്കാം?
റോയൽ എൻഫീൽഡ് ഫ്ലയിംഗ് ഫ്ലീ C6 ന്റെ അലുമിനിയം ഫ്രെയിമിൽ ഒരു മഗ്നീഷ്യം ബാറ്ററി ഹൗസിംഗ് ലഭിക്കുന്നു. ഇത് കൂളിംഗ് വർദ്ധിപ്പിക്കുന്നതിനൊപ്പം മൊത്തം കെർബ് വെയ്റ്റ് കുറയ്ക്കാനും സഹായിക്കുന്നു. വൃത്താകൃതിയിലുള്ള ഹെഡ്‌ലാമ്പ്, ടിയർഡ്രോപ്പ് ആകൃതിയിലുള്ള ഫോക്സ് ഇന്ധന ടാങ്ക്, സിംഗിൾ സീറ്റ് എന്നിവയുള്ള റെട്രോ ലുക്ക് ഫ്ലയിംഗ് ഫ്ലീ C6-ന്റെ സവിശേഷതയാണ്.
വൈവിധ്യമാർന്ന റൈഡിംഗ് സ്ഥിതിവിവരക്കണക്കുകൾ നൽകുന്ന വൃത്താകൃതിയിലുള്ള പൂർണ്ണ ടിഎഫ്‍ടി ഡിസ്‌പ്ലേയാണ് ഫ്ലൈയിംഗ് ഫ്ലീ C6 ന്റെ ഹൈലൈറ്റുകളിൽ ഒന്ന്. ഡിസ്‌പ്ലേ ബ്ലൂടൂത്ത് പ്രവർത്തനക്ഷമമാക്കിയതിനാൽ, ഇതൊരു സ്മാർട്ട്‌ഫോൺ ആപ്പുമായി എളുപ്പത്തിൽ ലിങ്ക് ചെയ്യാൻ കഴിയും. കോർണറിംഗ് എബിഎസ്, ട്രാക്ഷൻ കൺട്രോൾ പോലുള്ള അത്യാധുനിക സുരക്ഷാ സവിശേഷതകൾ നൽകുന്ന ആദ്യത്തെ റോയൽ എൻഫീൽഡ് ബൈക്ക് ആണിതെന്നത് ശ്രദ്ധേയമാണ്.
പിൻവശത്ത് മോണോഷോക്കും മുൻവശത്ത് ഗിർഡർ ഫോർക്കും അടങ്ങുന്ന സസ്‌പെൻഷനിൽ രണ്ട് അറ്റത്തും ഡിസ്‍ക് ബ്രേക്കുകളും ഉണ്ട്. ഡ്യുവൽ-ചാനൽ എബിഎസും ലഭിക്കും. ട്യൂബ്‌ലെസ് സിയറ്റ് ടയറുകളുള്ള 19 ഇഞ്ച് അലോയ് വീലുകളിലാണ് ഈ ബൈക്കിൽ. മുന്നിൽ 90-സെക്ഷൻ ടയർ ഉപയോഗിക്കുന്നു. വ്യത്യസ്തമായ ഡിസൈനും അതുല്യമായ റൈഡിംഗ് അനുഭവവും ഗിർഡർ ഫോർക്‌സ് സസ്‍പൻഷന്‍റെ ഹൈലൈറ്റുകളായിരിക്കും. പൂർണ്ണ കളർ ഡിജിറ്റൽ കൺസോൾ അതേ ഫോർമാറ്റ് പിന്തുടരുകയും ബാറ്ററി ലെവൽ, സ്പീഡോമീറ്റർ, റേഞ്ച് തുടങ്ങിയ നിരവധി വിവരങ്ങൾ പ്രദർശിപ്പിക്കുകയും ചെയ്യുന്നു. ഈ റോയൽ എൻഫീൽഡ് ബൈക്കിൽ വിവിധ റൈഡ് മോഡുകൾ ഉണ്ട്. ഇത് ഉപയോക്താക്കൾക്ക് അവരുടെ ആവശ്യങ്ങൾക്കനുസരിച്ച് സ്‌പോർട്ടി പ്രകടനം തിരഞ്ഞെടുക്കാനോ റേഞ്ചിന് മുൻഗണന നൽകാനോ അനുവദിക്കുന്നു.
ഈ ബൈക്കിന്റെ മറ്റൊരു പ്രത്യേകത, കൃത്രിമ ഇന്ധന ടാങ്കിൽ സ്ഥാപിച്ചിരിക്കുന്ന ബാക്ക്‌ലിറ്റ് പവർ ബട്ടണാണ്. എയറോഡൈനാമിക്സ് മെച്ചപ്പെടുത്തുന്നതിനും മികച്ച തണുപ്പ് ഉറപ്പാക്കുന്നതിനുമായി, സൈഡ് പാനലുകളിൽ വായു കടത്തിവിടുന്ന വിധത്തിൽ മികച്ചരീതിയിൽ രൂപകൽപ്പന ചെയ്ത ഗ്രൂവുകൾ ഉൾപ്പെടുന്നു. ഈ ഡിസൈൻ ഘടകങ്ങൾ ബൈക്കിന്റെ ശ്രദ്ധേയമായ സിലൗറ്റ് ഉറപ്പ് നൽകുന്നു. ബൈക്കിലെ ഫുട്പെഗുകൾ മധ്യത്തിൽ സ്ഥാപിച്ചിരിക്കുന്നു. വീതിയുള്ളതും പിന്നിലേക്ക് തള്ളിനിൽക്കുന്നതുമാണ് ഹാൻഡിൽബാർ. ഇത് റൈഡിംഗ് വളരെ സുഖകരമാക്കുന്നു.
ഇന്ത്യൻ ലോഞ്ച്
പുതിയ ഫ്ലൈയിംഗ് ഫ്ലീ C6 ന്റെ ഔദ്യോഗിക ലോഞ്ച് ടൈംലൈൻ ഇപ്പോഴും പ്രഖ്യാപിച്ചിട്ടില്ല. 2025 അവസാനത്തോടെയോ 2026 ന്റെ ആദ്യ പാദത്തിലോ ലോഞ്ച് നടക്കുമെന്നാണ് കരുതുന്നത്.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
