കാത്തിരിപ്പിന്റെ സുഖമുള്ള ആ കാലം; ഓർമ്മപ്പെടുത്തലായി ഒരു തപാൽ ദിനം കൂടി

  ഒരുകാലത്ത് ‘അഞ്ചലോട്ടക്കാരൻ’ താണ്ടിയ വഴികൾ ഇന്ന് മഷിയിട്ടു നോക്കിയാൽ പോലും കാണാനാകില്ല. മണികെട്ടിയ കുന്തവുമായി ഗ്രാമഗ്രാമാന്തരങ്ങളിലേക്ക് സന്ദേശങ്ങൾ എത്തിക്കാൻ അയാൾ വിശ്രമമില്ലാതെ ഓടി.

രാജാക്കന്മാർക്കും ബ്രിട്ടീഷ് അധികാരികൾക്കും വേണ്ടിയുള്ള ആ സേവനം സാധാരണക്കാർക്ക് അന്യമായിരുന്നു. കാടും മേടും പുഴയും കടന്ന് സന്ദേശങ്ങളുമായി പാഞ്ഞ ആ ഓട്ടക്കാരന്റെ കാലം മാഞ്ഞു.

കുന്തമണികൾ നിശബ്ദമായി, തപാൽ രൂപത്തിൽ കത്തുകൾ വന്നു. ഡിജിറ്റൽ യുഗത്തിൽ കത്തെഴുത്തും ഓർമയാകുമ്പോൾ, ആ പഴയകാല സ്മരണകൾക്ക് മുന്നിൽ ഒരു ദിനം കൂടി, ലോക തപാൽ ദിനം.

എല്ലാ വർഷവും ഒക്ടോബർ 9 ലോക തപാൽ ദിനമായി ആചരിക്കുന്നു. ആശയവിനിമയ രംഗത്ത് തപാൽ സംവിധാനം നൽകിയ സംഭാവനകളെയും ആധുനിക കാലത്ത് ഈ മേഖല കൈവരിക്കുന്ന വളർച്ചയെയും ഓർമ്മിക്കാനാണ് ഈ ദിനം.

1874 ഒക്ടോബർ 9-ന് സ്വിറ്റ്സർലൻഡിലെ ബേണിൽ യൂണിവേഴ്സൽ പോസ്റ്റൽ യൂണിയൻ (Universal Postal Union – UPU) സ്ഥാപിതമായതിൻ്റെ ഓർമ്മയ്ക്കായാണ് ഈ ദിനാചരണം. 1969-ൽ ടോക്കിയോയിൽ ചേർന്ന യുപി‌യു കോൺഗ്രസിലാണ് ഒക്ടോബർ 9 ലോക തപാൽ ദിനമായി ഔദ്യോഗികമായി പ്രഖ്യാപിച്ചത്.

ചരിത്രപരമായ പ്രാധാന്യം ആധുനിക ആശയവിനിമയ ഉപാധികൾ ഇല്ലാതിരുന്ന കാലത്ത് ലോകത്തെ ഒന്നിപ്പിച്ചത് തപാൽ സംവിധാനമായിരുന്നു. കത്തുകളിലൂടെയും രേഖകളിലൂടെയും രാജ്യങ്ങളെയും ജനങ്ങളെയും ബന്ധിപ്പിക്കുന്നതിൽ തപാൽ ശൃംഖല നിർണായക പങ്ക് വഹിച്ചു.

ലോകവ്യാപാരം, നയതന്ത്ര ബന്ധങ്ങൾ, വ്യക്തിബന്ധങ്ങൾ എന്നിവയെല്ലാം ദൃഢമാക്കുന്നതിൽ പോസ്റ്റ് ഓഫീസുകൾ ഒരു പ്രധാന കണ്ണിയായി വർത്തിച്ചു. ദൂരനാടുകളിലുള്ള പ്രിയപ്പെട്ടവരുടെ വിവരമറിയാൻ ഒരു തപാൽക്കാരന്റെ വരവും കാത്തിരുന്ന ഒരു കാലമുണ്ടായിരുന്നു.

  This World Post Day, we celebrate India Post as a service that places people at the heart of every connection.From letters that carry emotions to digital platforms that empower citizens, India Post continues to bridge distances and strengthen inclusion.With every service, it… pic.twitter.com/eAvzFpQ8h6 — India Post (@IndiaPostOffice) October 9, 2025   മാറുന്ന കാലവും പോസ്റ്റൽ സർവ്വീസും ഡിജിറ്റൽ യുഗത്തിൽ ഇ-മെയിലുകളും സമൂഹമാധ്യമങ്ങളും ആശയവിനിമയത്തിൽ വിപ്ലവം സൃഷ്ടിച്ചെങ്കിലും, തപാൽ വകുപ്പ് കാലത്തിനൊത്ത് സഞ്ചരിച്ച് പ്രസക്തി നിലനിർത്തുന്നു. കത്തുകൾ അയക്കുന്നതിനപ്പുറം, ഇ-കൊമേഴ്സ് ഉത്പന്നങ്ങളുടെ വിതരണം, ബാങ്കിംഗ് സേവനങ്ങൾ, ഇൻഷുറൻസ്, സർക്കാർ ക്ഷേമപദ്ധതികളുടെ വിതരണം തുടങ്ങിയ മേഖലകളിലേക്ക് തപാൽ ശൃംഖല വളർന്നു.

സാങ്കേതികവിദ്യയുടെ പ്രയോജനം പൂർണമായി ലഭ്യമല്ലാത്ത ഗ്രാമീണ മേഖലകളിലെ സാധാരണക്കാർക്ക് ഇന്നും ഏറ്റവും വലിയ ആശ്രയമാണ് പോസ്റ്റ് ഓഫീസുകൾ. തപാൽ ദിന സന്ദേശം ലോക തപാൽ ദിനത്തിന്റെ ഭാഗമായി വിവിധ രാജ്യങ്ങളിൽ പ്രത്യേക പരിപാടികളും പ്രദർശനങ്ങളും സംഘടിപ്പിക്കാറുണ്ട്.

ഓരോ വർഷവും യൂണിവേഴ്സൽ പോസ്റ്റൽ യൂണിയൻ ഒരു പ്രത്യേക സന്ദേശം (തീം) മുന്നോട്ടുവയ്ക്കുന്നു. തപാൽ മേഖലയിലെ ജീവനക്കാരുടെ നിസ്വാർത്ഥ സേവനങ്ങളെ ആദരിക്കാനും ഈ ദിനം വിനിയോഗിക്കുന്നു.

ഒരു തലമുറയുടെ ഓർമ്മകളും അനുഭവങ്ങളും അടുത്ത തലമുറയ്ക്ക് കൈമാറുന്നതിൽ തപാൽ സംവിധാനം വഹിച്ച പങ്ക് വളരെ വലുതാണ്. FacebookTwitterWhatsAppTelegram