ചരിത്ര നേട്ടവുമായി ഇന്ത്യൻ വിപണി; ട്രംപ് ഭീതിയെ മറികടന്ന് നിഫ്റ്റി 25,000 പിന്നിട്ടു

മുംബൈ: ഇന്ത്യൻ ഓഹരി വിപണിയിൽ റെക്കോർഡ് മുന്നേറ്റം. ചരിത്രത്തിലാദ്യമായി നിഫ്റ്റി 50, 25000 എന്ന നിർണായക നിലവാരം മറികടന്നു.

ബാങ്കിംഗ്, ഐടി ഓഹരികളിലെ ശക്തമായ കുതിപ്പാണ് വിപണിക്ക് കരുത്തായത്. സെൻസെക്സ് 500 പോയിന്റിലധികം നേട്ടമുണ്ടാക്കി.

വായ്പാ വളർച്ചയിൽ മികച്ച പുരോഗതി രേഖപ്പെടുത്തിയതോടെ സ്വകാര്യ ബാങ്ക് ഓഹരികൾ കുതിച്ചുയർന്നു. കൊട്ടക് മഹീന്ദ്ര ബാങ്ക് 2.44%, എച്ച്‌ഡിഎഫ്‌സി ബാങ്ക് 1%-ത്തിലധികം, ബജാജ് ഫിനാൻസ് 3% എന്നിങ്ങനെ നേട്ടം രേഖപ്പെടുത്തി.

ടിസിഎസ്, ആക്സിസ് ബാങ്ക്, എച്ച്‌സിഎൽടെക് തുടങ്ങിയ ഓഹരികളും മികച്ച പ്രകടനം കാഴ്ചവെച്ചു. സർക്കാർ സിജിഎച്ച്എസ് നിരക്കുകൾ പരിഷ്കരിച്ചതിനെത്തുടർന്ന് അപ്പോളോ ഹോസ്പിറ്റൽസ്, മണിപ്പാൽ ഹെൽത്ത്‌കെയർ, നാരായണ ഹെൽത്ത് തുടങ്ങിയ ആരോഗ്യമേഖലയിലെ ഓഹരികളും നേട്ടമുണ്ടാക്കി.

വ്യാപാരം അവസാനിക്കുമ്പോൾ, ബിഎസ്ഇ സെൻസെക്സ് 582.95 പോയിന്റ് (0.72%) ഉയർന്ന് 81,790.12 എന്ന നിലയിലും എൻഎസ്ഇ നിഫ്റ്റി 50, 183.40 പോയിന്റ് (0.74%) ഉയർന്ന് 25,077.65 എന്ന റെക്കോർഡ് തലത്തിലും ക്ലോസ് ചെയ്തു. സെൻസെക്സിൽ ടിസിഎസ്, ടെക് മഹീന്ദ്ര, ആക്സിസ് ബാങ്ക്, ബജാജ് ഫിനാൻസ് എന്നിവയുടെ ഓഹരികൾ 2 മുതൽ 3 ശതമാനം വരെ ഉയർന്ന് നേട്ടത്തിൽ മുന്നിലെത്തി.

സ്വകാര്യ ബാങ്ക് സൂചിക 1.2 ശതമാനവും ഫിനാൻഷ്യൽ സൂചിക 1.1 ശതമാനവും നേട്ടമുണ്ടാക്കി. യുഎസ് തൊഴിൽ വിപണിയിലെ ആശങ്കകളും ഉയർന്ന എച്ച്-1ബി വിസ ഫീസും സംബന്ധിച്ച വാർത്തകൾക്കിടയിലും വിപണി ശക്തമായ മുന്നേറ്റം കാഴ്ചവച്ചു.

ഈ ആശങ്കകളെ മറികടന്ന് ഐടി ഓഹരികൾ ശക്തമായി തിരിച്ചുവന്നു. നിഫ്റ്റി ഐടി സൂചിക 2.3 ശതമാനം ഉയർച്ച രേഖപ്പെടുത്തി.

  FacebookTwitterWhatsAppTelegram