സഞ്ജുവിനെ മറന്നോ അഗാർക്കർ? ഈ കണക്കുകൾ ഓർമ്മിപ്പിക്കും

ചീഫ് സെലക്ടർ അജിത് അഗാർക്കർക്ക് ഒരു നിവേദനം. ചില കാര്യങ്ങൾ ചൂണ്ടിക്കാണിക്കാനും, മറ്റുചിലത് ഓർമ്മിപ്പിക്കാനുമുണ്ട്.

താങ്കൾ മുന്നോട്ട് വെക്കുന്ന കാരണങ്ങൾ അത്ഭുതപ്പെടുത്തുന്നതാണ്. നിരത്തുന്ന ന്യായീകരണങ്ങൾ അമ്പരപ്പുളവാക്കുന്നു.

ഇന്ത്യൻ ക്രിക്കറ്റിൽ നായകൻ മാറി, പരിശീലകൻ മാറി, സെലക്ടർമാരും മാറി. എന്നിട്ടും കഥ പഴയത് തന്നെ.

സഞ്ജു സാംസന്റെ കാര്യത്തിൽ മാത്രം ആവർത്തിക്കുന്ന, വിചിത്രമായ ന്യായീകരണങ്ങളോടെയുള്ള അവഗണനയുടെ കഥ. വിഷയം ഓസ്‌ട്രേലിയൻ പര്യടനത്തിനുള്ള ഇന്ത്യൻ ക്രിക്കറ്റ് ടീം തിരഞ്ഞെടുപ്പാണ്.

എന്തുകൊണ്ട് വിക്കറ്റ് കീപ്പർ ബാറ്ററായി സഞ്ജു സാംസൺ ആ ടീമിൽ ഇടംപിടിച്ചില്ല എന്ന ചോദ്യം പ്രസക്തമാണ്. ഇതിന് മുഖ്യ സെലക്ടർ അജിത് അഗാർക്കർ നൽകിയ മറുപടി ഇപ്രകാരമായിരുന്നു: “ബാറ്റിംഗ് ഓർഡറിലെ സ്ഥാനമാണ് പ്രധാന പ്രശ്നം.

സഞ്ജു ഒരു ടോപ് ഓർഡർ ബാറ്ററാണ്. അദ്ദേഹം സെഞ്ച്വറി നേടിയത് മൂന്നാം നമ്പറിൽ കളിച്ചപ്പോഴാണ്.

എന്നാൽ ധ്രുവ് ജുറെലും കെ.എൽ. രാഹുലും മധ്യനിരയിലും ലോവർ ഓർഡറിലും കളിക്കുന്നവരാണ്.

ജുറെൽ എത്ര മികച്ച താരമാണെന്ന് എല്ലാവരും കണ്ടതാണ്. ഓരോ സ്ഥാനത്തിനും അനുയോജ്യരായ കളിക്കാരെയാണ് ഞങ്ങൾ പരിഗണിക്കുന്നത്.

നിലവിൽ ടോപ് ഓർഡറിൽ സഞ്ജുവിന് അവസരമില്ല.” ഇനി ഒരു മാസം പിന്നോട്ട് സഞ്ചരിക്കാം. ഏഷ്യൻ ഗെയിംസ് ടി20 ടീമിന്റെ പ്രഖ്യാപന വേളയിൽ ഇതേ അഗാർക്കർ പറഞ്ഞ വാക്കുകൾ ഓർക്കേണ്ടതുണ്ട്.

“ഗില്ലിന്റെയും ജയ്‌സ്വാളിന്റെയും അഭാവത്തിൽ മാത്രമാണ് സഞ്ജു ഓപ്പണറായത്. അഭിഷേക് ശർമ്മയുടെ പ്രകടനം അവഗണിക്കാനാവില്ല.” അന്ന് പറഞ്ഞതിന്റെ രത്നച്ചുരുക്കം ഇതായിരുന്നു: സഞ്ജു ഒരു സ്ഥിരം ടോപ് ഓർഡർ ബാറ്ററല്ല, അതിനാൽ ആ സ്ഥാനത്ത് പരിഗണിക്കാനാവില്ല.

അന്ന് ടീമിൽ ഉൾപ്പെടുത്തിയത് ലോവർ ഓർഡർ ബാറ്ററായിട്ടായിരുന്നു. എന്നാൽ ഏകദിനത്തിൽ സഞ്ജു ഒരു ടോപ് ഓർഡർ ബാറ്ററാണെന്നാണ് അഗാർക്കർ ഇപ്പോൾ പറയുന്നത്.

ഈ വാദത്തിലെ യാഥാർത്ഥ്യം പരിശോധിക്കാൻ നമുക്ക് കണക്കുകളിലേക്ക് പോകാം. സഞ്ജു ഇന്ത്യക്കായി 16 ഏകദിനങ്ങൾ കളിച്ചിട്ടുണ്ട്.

അതിൽ 14 ഇന്നിംഗ്‌സുകളിൽ നിന്ന് ഒരു സെഞ്ച്വറിയും മൂന്ന് അർധസെഞ്ച്വറിയുമടക്കം 510 റൺസ് നേടി. ശരാശരി 56.66, സ്‌ട്രൈക്ക് റേറ്റ് 99.6.

പ്രധാന കാര്യം, സഞ്ജു ഇന്നുവരെ ഏകദിനത്തിൽ ഇന്ത്യക്കായി ഓപ്പൺ ചെയ്തിട്ടില്ല എന്നതാണ്. മൂന്നാം നമ്പറിൽ മൂന്ന് തവണയും നാലാം നമ്പറിൽ ഒരു തവണയും ബാറ്റ് ചെയ്തു.

അതേസമയം, അഞ്ചാം നമ്പറിൽ ആറ് തവണയും ആറാം നമ്പറിൽ മൂന്ന് തവണയുമാണ് അദ്ദേഹം ക്രീസിലെത്തിയത്. അങ്ങനെയെങ്കിൽ, സഞ്ജുവിനെ ഒരു ‘ടോപ് ഓർഡർ ബാറ്റർ’ എന്ന് എങ്ങനെ വിശേഷിപ്പിക്കാനാകും? ഈ ഓരോ സ്ഥാനത്തും അദ്ദേഹത്തിന്റെ പ്രകടനം എത്രത്തോളം മികച്ചതായിരുന്നു എന്നും പരിശോധിക്കാം.

മൂന്നാം നമ്പറിൽ 54.33 ശരാശരിയിൽ 163 റൺസ്. നാലാം നമ്പറിൽ കളിച്ച ഏക മത്സരത്തിൽ 124 സ്‌ട്രൈക്ക് റേറ്റിൽ അർധസെഞ്ച്വറി നേടി.

അഞ്ചാം നമ്പറിൽ മൂന്ന് തവണ പുറത്താകാതെ നിന്ന് 38 ശരാശരിയിൽ 116 റൺസ്. എന്നാൽ ഏറ്റവും മികച്ച പ്രകടനം ആറാം നമ്പറിലാണ്.

നാല് ഇന്നിംഗ്‌സുകളിൽ നിന്ന് 90 ശരാശരിയിലും 117 സ്‌ട്രൈക്ക് റേറ്റിലും നേടിയത് 180 റൺസ്. 16 ഫോറും ഒൻപത് സിക്‌സറുകളും ഉൾപ്പെട്ട

ഈ പ്രകടനം ഫിനിഷർ റോളിലും അദ്ദേഹം തിളങ്ങുമെന്നതിന്റെ തെളിവാണ്. മധ്യനിരയിലും ലോവർ ഓർഡറിലും ഇത്ര സ്ഥിരത പുലർത്തിയ ഒരു താരത്തെയാണ് ‘ടോപ് ഓർഡർ ബാറ്റർ’ എന്ന് മുദ്രകുത്തി പുറത്തിരുത്തുന്നത്.

ഈ കണക്കുകളെല്ലാം തൽക്കാലം മാറ്റിവെക്കാം. സഞ്ജു ഇന്ത്യയ്ക്കായി കളിച്ച അവസാന ഏകദിനം മാത്രം പരിഗണിച്ചാൽ മതി.

2023 ഡിസംബർ 21, ദക്ഷിണാഫ്രിക്കക്കെതിരായ പരമ്പരയിലെ നിർണ്ണായക മത്സരം. സീനിയർ താരങ്ങളുടെ അഭാവത്തിൽ കെ.എൽ.

രാഹുൽ നയിച്ച യുവനിരയിൽ മുൻനിര തകർന്നപ്പോൾ രക്ഷകനായത് സഞ്ജുവായിരുന്നു. 114 പന്തിൽ 108 റൺസ് നേടി ഇന്ത്യക്ക് പരമ്പര വിജയം സമ്മാനിച്ച ആ ഇന്നിംഗ്‌സ് അദ്ദേഹത്തെ കളിയിലെ താരവുമാക്കി.

ദക്ഷിണാഫ്രിക്ക പോലൊരു ‘സെന’ രാജ്യത്ത് സെഞ്ച്വറി നേടിയിട്ടും, തൊട്ടടുത്ത പരമ്പരകളിൽ സഞ്ജുവിന് അവസരം നിഷേധിക്കപ്പെട്ടു. ശ്രീലങ്കൻ പര്യടനത്തിനുള്ള ടീമിൽ സഞ്ജുവുണ്ടായിരുന്നില്ല.

പിന്നാലെ നടന്ന ഇംഗ്ലണ്ട് പരമ്പരയിലും, അടുത്തിടെ പ്രഖ്യാപിച്ച ചാമ്പ്യൻസ് ട്രോഫി ടീമിലും അദ്ദേഹം പരിഗണിക്കപ്പെട്ടില്ല. ഏത് റോളിലും തിളങ്ങാൻ കഴിവ് തെളിയിച്ച ഒരു താരത്തിന്, നൽകാൻ ഒരു റോളുമില്ലാതെ ബിസിസിഐ കൈമലർത്തുന്നത് എന്തുകൊണ്ടാണ്? മുൻ ചീഫ് സെലക്ടർ ശ്രീകാന്ത് പറഞ്ഞതുപോലെ, സഞ്ജു സാംസന്റെ കാര്യത്തിൽ മാത്രം കാരണങ്ങളും ന്യായീകരണങ്ങളും ഓരോ തവണയും മാറിമറിയുന്നു.

FacebookTwitterWhatsAppTelegram