പുതിയ സർക്കാർ രൂപീകരണത്തിനായി തിരക്കിട്ട നീക്കങ്ങൾ നടത്തി മുന്നണികൾ. കേവല ഭൂരിപക്ഷം തികയ്ക്കാത്ത ബിജെപിയെ പൂട്ടാൻ മറ്റ് പാർട്ടികളുമായി ചർച്ചകൾ സജീവമാക്കി ഇന്ത്യാ മുന്നണിയും എൻഡിഎയിലെ പാർട്ടികളെ ഉറപ്പിച്ച് നിർത്താനും ചെറുപാർട്ടികളെ ഒപ്പം നിർത്താനും ബിജെപിയും നീക്കങ്ങൾ നടത്തുകയാണ്. പുതിയ സർക്കാർ ഈ ആഴ്ചയ്ക്കകം തന്നെയുണ്ടാകും. ഞായറാഴ്ചയ്ക്ക് മുൻപ് സത്യപ്രതിജ്ഞ നടക്കും. രാവിലെ 11 മണിക്ക് നിലവിലെ മന്ത്രിസഭയുടെ യോഗം നടക്കും. (NDA and INDIA alliance moves to make government before june 9)
സർക്കാർ രൂപീകരണ നീക്കങ്ങൾ വേഗത്തിൽ ആക്കാൻ ബിജെപി ദേശീയ നേതൃത്വം നീക്കം നടത്തുകയാണ്. രാവിലെ എൻഡിഎ മുന്നണി യോഗം ചേരും. ശേഷം അവകാശവാദം ഉന്നയിക്കും. സാഹചര്യങ്ങളെ സാധ്യമാകുന്ന വിധത്തിൽ അനുകൂലമാക്കാനാണ് ഇന്ത്യ മുന്നണിയുടെയും നീക്കം.
Read Also:
മൂന്നാമതും സർക്കാർ ഉണ്ടാക്കുമെന്ന് അവകാശപ്പെടുമ്പോഴും ബിജെപി നേതൃത്വം പൂർണ്ണമായും ആത്മവിശ്വാസത്തിൽ അല്ല. സമ്മർദ്ദങ്ങൾ ശക്തമായാൽ നിതീഷ് കുമാറും ചന്ദ്രബാബു നായിഡുവും മറുവശത്തേക്ക് ചായുമോ എന്ന ഭീതി ബിജെപിക്ക് ഉണ്ട്. പരമാവധി വേഗത്തിൽ സർക്കാർ രൂപീകരണത്തിനുള്ള അവകാശവാദം ഉന്നയിക്കുകയാണ് ഇതിനുള്ള പരിഹാരമായി ബിജെപി കാണുന്നത്. ചന്ദ്രബാബു നായിഡുവും നിതീഷ് കുമാറും അടക്കമുള്ള എൻഡിഎ നേതാക്കൾ ഇന്ന് ഡൽഹിയിൽ എത്തുന്നുണ്ട്. ഇവരുമായി നടക്കുന്ന ചർച്ചകൾക്ക് ശേഷം രാഷ്ട്രപതിയെ കാണാനാണ് ബിജെപി ദേശീയ നേതൃത്വത്തിന്റെ ഇപ്പോഴത്തെ തീരുമാനം. സത്യപ്രതിജ്ഞ ഈയാഴ്ച തന്നെ നടക്കാനും സാധ്യത ഏറെ. പകുതി സംഖ്യ തികയ്ക്കാനായില്ലെങ്കിലും മറുവശത്ത് ഇന്ത്യ മുന്നണി തികഞ്ഞ ആത്മവിശ്വാസത്തിലാണ്.
സാവകാശം കാര്യങ്ങൾ തങ്ങൾക്ക് അനുകൂലമാകുമെന്ന് ഇന്ത്യ നേതാക്കൾ അവകാശപ്പെടുന്നു.അനൗദ്യോഗികമായി ശരത് പവാറിന്റെ നേതൃത്വത്തിൽ നടക്കുന്ന ചർച്ചകൾ ഇന്ത്യ മുന്നണിക്ക് പ്രതീക്ഷ നൽകുന്നതും ആണ്. നിതീഷും ചന്ദ്രബാബു നായിഡുവും പച്ചക്കൊടി കാട്ടിയിട്ടില്ലെങ്കിലും അനുകൂലവസരം ഇന്ത്യ മുന്നണിയ്ക്ക് ഉണ്ടാകും എന്ന പ്രതീക്ഷ കോൺഗ്രസിനുണ്ട്. ഇന്നു ചേരുന്ന ഇന്ത്യ മുന്നണി യോഗത്തിൽ ഭാവി പരിപാടികൾ ആസൂത്രണം ചെയ്യും.
Story Highlights : NDA and INDIA alliance moves to make government before june 9
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
