സംസ്ഥാനത്ത് വെള്ളിയാഴ്‌ച വരെ ചൂട് കൂടും; ജനങ്ങൾ ജാഗ്രത പാലിക്കണം, യെല്ലോ അലർട്ട്

.news-body p a {width: auto;float: none;}

തിരുവനന്തപുരം: സംസ്ഥാനത്ത് വീണ്ടും ഉയർന്ന താപനില മുന്നറിയിപ്പുമായി കേന്ദ്ര കാലാവസ്ഥാ വകുപ്പ്. ഇന്ന് മുതൽ വെള്ളിയാഴ്‌ച വരെ ഉയർന്ന താപനില തുടരും. തൃശൂർ, പാലക്കാട് ജില്ലകളിൽ 38 ഡിഗ്രി സെൽഷ്യസ് വരെ ഉയരും. കൊല്ലം, പത്തനംതിട്ട, കോട്ടയം, എറണാകുളം, കോഴിക്കോട്, കണ്ണൂർ, കാസർകോട് ജില്ലകളിൽ 37 ഡിഗ്രി സെൽഷ്യസാണ് ഉയർന്ന താപനില. ആലപ്പുഴ, മലപ്പുറം ജില്ലകളിൽ ഉയർന്ന താപനില 36 ഡിഗ്രി സെൽഷ്യസാണ്. അതിനാൽ, സംസ്ഥാനത്ത് യെല്ലോ അലർട്ട് പ്രഖ്യാപിച്ചിട്ടുണ്ട്.

സാധാരണയേക്കാൾ മൂന്ന് ഡിഗ്രി സെൽഷ്യസ് വരെയാണ് താപനില ഉയരുന്നതെന്ന് കേന്ദ്ര കാലാവസ്ഥാ വകുപ്പ് അറിയിച്ചു. ഉയർന്ന താപനിലയും ഈർപ്പമുള്ള വായുവും കാരണം അസ്വസ്ഥതയുണ്ടാക്കുന്ന അന്തരീക്ഷത്തിന് സാദ്ധ്യതയുണ്ട്. പകൽ 11 മണി മുതൽ ഉച്ചയ്‌ക്ക് മൂന്ന് മണിവരെ പുറത്തിറങ്ങുന്ന ജനങ്ങൾ ജാഗ്രത പാലിക്കണം. സൂര്യാഘാതത്തിന് സാദ്ധ്യതയുള്ളതിനാൽ സൂര്യപ്രകാശം നേരിട്ട് ഏൽക്കാതിരിക്കാൻ ശ്രദ്ധിക്കണം. അൾട്രാ വയലറ്റ് ഇൻഡക്‌സും കൂടുതലാണ്. ജനങ്ങൾ ധാരാളം വെള്ളം കുടിക്കണമെന്ന മുന്നറിയിപ്പ് കാലാവസ്ഥാ വകുപ്പും ദുരന്ത നിവാരണ വകുപ്പും നൽകിയിട്ടുണ്ട്.