‘കെട്ടിടം പൂർണമായി വീഴുകയാണെന്ന് കരുതി; കുഞ്ഞിനെയും എടുത്തുകൊണ്ട് ഓടി, രക്ഷപ്പെട്ടത് തലനാരിഴയ്ക്ക്’

‌‌‌‌10,14 വാർഡുകളിലെ രോഗികളും അവർക്കൊപ്പമുള്ളവരും ഇടിഞ്ഞുവീണ കെട്ടിടത്തിലെ ശുചിമുറി തന്നെയാണ് ഉപയോഗിച്ചിരുന്നത്. ഭാഗ്യം കൊണ്ടാണ് രക്ഷപ്പെട്ടതെന്ന് അപകടത്തിനു 10 മിനിറ്റു മുൻപ് ശുചിമുറി ഉപയോഗിച്ച് പുറത്തിറങ്ങിയവർ പറയുന്നു. കെട്ടിടം ഉപയോഗശൂന്യമാണെങ്കിൽ ഇത്രയും പേർ അത് ഉപയോഗിക്കുമായിരുന്നോയെന്ന് മകന്റെ ചികിത്സാർഥം ആശുപത്രിയിലെത്തിയ ഒരാൾ ചോദിക്കുന്നു. ഉപയോഗശൂന്യമായ കെട്ടിടമാണെങ്കിൽ അതു പൊളിച്ചുകളയണമായിരുന്നു. പകരം ഇത്ര നാൾ നിലനിർത്തി ഇത്ര വലിയ ദുരന്തമുണ്ടാക്കേണ്ടിയിരുന്നോയെന്നും അദ്ദേഹം പറഞ്ഞു.

‘‘കെട്ടിടം തകർന്നുവീഴുന്നതു കണ്ട് കുഞ്ഞിനെയും എടുത്തുകൊണ്ട് ഓടി രക്ഷപ്പെടുകയായിരുന്നു. കെട്ടിടം പൂർണമായി വീഴുകയാണെന്ന് കരുതി’’–മകളുടെ ചികിത്സയ്ക്കായി മെഡിക്കൽ കോളജിലെത്തിയ ലിസി പറഞ്ഞു. കഴിഞ്ഞ ദിവസമാണ് ഇവർ അഡ്മിറ്റായത്. കൈയ്ക്ക് സുഖമില്ലാത്ത അമ്മയ്ക്ക് കൂട്ടിരിക്കാനെത്തിയ ലതയ്ക്കും പറയാനുള്ളത് ഇതേ അനുഭവം. ‘‘കെട്ടിടം ഉപയോഗശൂന്യമാണെന്ന് ആരും പറഞ്ഞിരുന്നില്ല. കെട്ടിടം വീഴുന്നതുകണ്ട് അമ്മയെ പിടിച്ചിറക്കിയെങ്കിലും നിൽക്കാൻ ബുദ്ധിമുട്ടുണ്ടായിരുന്നു. തുടർന്ന് നഴ്സുമാരും ജീവനക്കാരും ചേർന്ന് വീൽചെയർ എത്തിച്ചശേഷമാണ് വാർഡിൽനിന്ന് പുറത്തെത്തിച്ചത്. അപ്പോഴേക്കും തകർന്ന കെട്ടിടത്തിന്റെ കല്ലും മണ്ണുമെല്ലാം വാർഡിലെ മുറിയുടെ വാതിൽക്കൽവരെ വന്നു വീണിരുന്നു’’– ലത പറഞ്ഞു.