നാലു പതിറ്റാണ്ട് മുമ്പ് തന്റെ ഒരു മാസത്തെ ശമ്പളം മുഴുവൻ മാറ്റിവെച്ചു വാങ്ങിയ റോളക്സ് വാച്ച് ഇപ്പോൾ തന്റെ ജീവിതം തന്നെ മാറ്റിമറിച്ച സന്തോഷത്തിലാണ് ഒരു മുൻ യുഎസ് എയർഫോഴ്സ് ഉദ്യോഗസ്ഥൻ. 1971 -ൽ 28,000 രൂപയ്ക്ക് വാങ്ങിയ വാച്ചിന്റെ ഇപ്പോഴത്തെ മൂല്യം അറിഞ്ഞ് അമ്പരന്നു പോകുന്ന അദ്ദേഹത്തിൻറെ വീഡിയോ ഇപ്പോൾ സോഷ്യൽ മീഡിയ പ്ലാറ്റ്ഫോമുകളിൽ തരംഗം ആവുകയാണ്.
ഒരു ആന്റിക്‌സ് റോഡ്‌ഷോയിൽ തൻറെ വാച്ചിന്റെ നിലവിലെ വില അറിയുന്നതിനായി എത്തിയപ്പോഴാണ് കോടികളുടെ സമ്പാദ്യമാണ് തന്റെ കയ്യിലുള്ളതെന്ന സത്യം അദ്ദേഹം തിരിച്ചറിയുന്നത്. 2020 -ൽ നടന്ന റോഡ് ഷോയിൽ നിന്നുള്ള ദൃശ്യങ്ങളാണ് ഇതെങ്കിലും സാമൂഹിക മാധ്യമങ്ങൾ ഇത് വീണ്ടും ഇപ്പോൾ ശ്രദ്ധ നേടുകയാണ്. വാച്ചിന് നിലവിൽ 700,000 ഡോളർ വരെ (4-5 കോടി രൂപ) എളുപ്പത്തിൽ ലഭിക്കുമെന്നാണ് റോഡ് ഷോയിൽ മൂല്യനിർണയക്കാർ അദ്ദേഹത്തിന് നൽകിയ മറുപടി.
1970 -കളുടെ തുടക്കത്തിലാണ് തന്റെ ചില സഹപ്രവർത്തകർ റോളക്സ് വാച്ചുകൾ ധരിച്ചിരിക്കുന്നത് അദ്ദേഹം കണ്ടത്. അങ്ങനെയാണ് സ്വന്തമായൊരണം വാങ്ങിക്കണം എന്ന മോഹം അദ്ദേഹത്തിന് ഉണ്ടായത്. അങ്ങനെ 1971 -ലെ റോളക്സ് കോസ്‌മോഗ്രാഫ് ഡേടോണ ഓയ്‌സ്റ്റർ 1974 നവംബറിൽ ഓർഡർ ചെയ്തു. തന്റെ ഒരു മാസത്തെ ശമ്പളം മുഴുവൻ നീക്കിവെച്ചുകൊണ്ടായിരുന്നു ആ സ്വന്തമാക്കൽ. വാച്ചിന് 10% കിഴിവ് ലഭിച്ചതിന് ശേഷം അദ്ദേഹം $345.97 (ഏകദേശം 28,000 രൂപ) നൽകി. പക്ഷേ, അന്നദ്ദേഹം അറിഞ്ഞിരുന്നില്ല നാൽപ്പതു വർഷങ്ങൾക്കുശേഷം തന്റെ ജീവിതം മാറ്റിമറിക്കാൻ പോകുന്നത് ഈ വാച്ച് ആയിരിക്കുമെന്ന്.
എന്നാൽ വാങ്ങിയതിനുശേഷം, വാച്ച് സ്ഥിരമായി ഉപയോഗിക്കാൻ അദ്ദേഹത്തിന് മനസ്സ് വന്നില്ല. കാരണം അത്രമാത്രം മനോഹരമായിരുന്നു അത്. അതിന്റെ ഒറിജിനൽ ബോക്‌സ്, രസീത്, വാറന്റി പേപ്പർ, ഒറിജിനൽ ബ്രോഷർ എന്നിവയ്‌ക്കൊപ്പം ഒരു സേഫ്റ്റി ഡെപ്പോസിറ്റ് ബോക്‌സിൽ അദ്ദേഹം വാച്ച് സൂക്ഷിച്ചു. ഒരിക്കൽപോലും അത് ഉപയോഗിക്കാത്തതുകൊണ്ടും ഒറിജിനൽ രേഖകളെല്ലാം ഇപ്പോഴും ഭദ്രമായി സൂക്ഷിച്ചിരിക്കുന്നതു കൊണ്ടുമാണ് ഈ വാച്ചിന്റെ മൂല്യം ഇത്രയേറെ വർധിച്ചത്.
Last Updated Oct 1, 2023, 3:54 PM IST
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
