പണം ആവശ്യപ്പെട്ട് കലക്ടറുടെ പേരിലും വാട്‌സാപ് സന്ദേശം

കൽപറ്റ ∙ കലക്ടർ ഡി.ആർ.മേഘശ്രീയുടെ ചിത്രം പ്രൊഫൈലാക്കിയ വാട്സാപ് നമ്പറിലൂടെ പണം തട്ടാൻ ശ്രമം. ‘നിങ്ങൾ എവിടെയാണ്? എനിക്ക് വേണ്ടി നിങ്ങൾ പെട്ടെന്ന് ഒരു കാര്യം ചെയ്യേണ്ടതുണ്ട്’ എന്നിങ്ങനെയാണു വാട്സാപ് ചാറ്റ് തുടങ്ങുന്നത്. ‘ഞാൻ ഒരു മീറ്റിങ്ങിലാണെന്നും വേണ്ടപ്പെട്ട

ഒരാൾക്ക് നിങ്ങൾ കുറച്ച് പണം അയച്ച് നൽകാമോ?, വൈകിട്ടോടെ തിരിച്ചു നൽകാമെന്നുമാണ് അടുത്ത സന്ദേശം. തുടർന്ന്, 50,000 രൂപ അയയ്ക്കണമെന്ന് കാണിച്ച് ഗൂഗിൾ പേ നമ്പർ  നൽകുന്നമുണ്ട്.

പണം അയച്ച് കഴിഞ്ഞാൽ സ്ഥിരീകരണത്തിനും പണം തിരികെ നൽകുന്നതിനുമായി സ്ക്രീൻ ഷോട്ട് അയയ്ക്കണമെന്ന സന്ദേശത്തോടെയാണ് ചാറ്റ് അവസാനിപ്പിക്കുന്നത്.
ഒട്ടേറെപ്പേർക്ക് ഇത്തരത്തിൽ പണം ആവശ്യപ്പെട്ടുള്ള സന്ദേശങ്ങൾ ലഭിച്ചിട്ടുണ്ടെന്നാണു സൂചന. തട്ടിപ്പ് ശ്രദ്ധയിൽപെട്ടതോടെ, ഈ അക്കൗണ്ട് തന്റേതല്ലെന്നും പണം നൽകി ആരും വഞ്ചിതരാകരുതെന്നും കാണിച്ച് കലക്ടറുടെ ഔദ്യോഗിക സമൂഹമാധ്യമ അക്കൗണ്ടുകളിൽ ഇത്തരം വ്യാജ സന്ദേശങ്ങളുടെ ചിത്രം ഉൾപ്പെടെ പങ്കുവച്ചിട്ടുണ്ട്.

പണം ആവശ്യപ്പെട്ട് സന്ദേശങ്ങൾ അയച്ച വാട്സാപ് നമ്പർ സൈബർ പൊലീസിന്റെ നിരീക്ഷണത്തിലാണ്. … FacebookTwitterWhatsAppTelegram