കാർഷിക അവാർഡിൽ തിളങ്ങി മീനങ്ങാടി പഞ്ചായത്ത്

മീനങ്ങാടി ∙ സംസ്ഥാന കർഷക അവാർഡ് നിർണയത്തിൽ കാർഷിക മേഖലയിലെ മികച്ച പ്രകടനത്തിനുള്ള സി. അച്യുതമേനോൻ സ്മാരക പുരസ്കാരം നേടി മീനങ്ങാടി പഞ്ചായത്ത്.

മികച്ച കൃഷി ഓഫിസർക്കുള്ള പുരസ്കാരത്തിൽ മൂന്നാം സ്ഥാനം മീനങ്ങാടി പഞ്ചായത്ത് കൃഷി ഓഫിസർ ജ്യോതി സി. ജോർജും കരസ്ഥമാക്കി.

സുസ്ഥിര കാർഷിക വികസനത്തിനും പരിസ്ഥിതി സംരക്ഷണത്തിനും മാതൃകയായ പദ്ധതികളാണ് പഞ്ചായത്തിന് അംഗീകാരം നേടിക്കൊടുത്തത്. നേരത്തെ കാർബൺ ന്യൂട്രൽ പുരസ്കാരം നേടിയ മീനങ്ങാടി, കാർഷിക മേഖലയ്ക്ക് ഏറ്റവും കൂടുതൽ ധനവിനിയോഗം നടത്തിയ പഞ്ചായത്തായും ശ്രദ്ധ നേടിയിട്ടുണ്ട്.
കഴിഞ്ഞ 3 വർഷമായി കാർഷിക വികസനം, ഉൽപാദനക്ഷമത വർധിപ്പിക്കൽ, പ്രാദേശിക കർഷകർക്ക് പിന്തുണ എന്നിവയിൽ പഞ്ചായത്ത് മുൻതൂക്കം നൽകി പ്രവർത്തിച്ചു.

ഓക്സിജൻ പാർക്ക്, നെൽവയലിൽ ജൈവ കാർബൺ വർധന, പ്രകൃതിദത്ത കൃഷി പ്രോത്സാഹനം, മണ്ണിന്റെ ആരോഗ്യ സംരക്ഷണം, മില്ലറ്റ് കൃഷി, പച്ചത്തുരുത്ത്, ജൈവ വൈവിധ്യ സംരക്ഷണ പരിപാടികൾ, സോളർ പമ്പ് ഇറിഗേഷൻ സിസ്റ്റം തുടങ്ങിയ പദ്ധതികൾ വിജയകരമായി പൂർത്തിയാക്കിയതും പുരസ്കാരനേട്ടത്തിന് അർഹമാക്കി. ‘മണ്ണറിയാം കൃഷി ചെയ്യാം’ എന്ന കാർഷിക പുനരുജ്ജീവന പദ്ധതിയുടെ ഭാഗമായി കർഷകർക്ക് അവരുടെ മണ്ണിലെ പോഷക ഘടകങ്ങളെക്കുറിച്ചുള്ള ശാസ്ത്രീയ വിവരങ്ങൾ ലഭ്യമാക്കി.
സമഗ്രമായ മണ്ണുപരിശോധനയ്ക്കു ശേഷം ഫലങ്ങളുടെ അടിസ്ഥാനത്തിൽ അനുയോജ്യമായ വളങ്ങൾ വിതരണം ചെയ്യുന്നതിനുള്ള സംവിധാനം നടപ്പാക്കി. കുട്ടികളിൽ കാർഷിക താൽപര്യം വളർത്താനും സംരക്ഷണ മനോഭാവം വളർത്താനുമായി പഞ്ചായത്ത് സ്കൂൾ പോൾട്രി പദ്ധതി ആരംഭിച്ചു.    തരിശുഭൂമി കൃഷിക്ക് അനുയോജ്യമാക്കാനുള്ള പദ്ധതിയിൽ 2023–24 വർഷം 3.6 ഹെക്ടർ നെൽക്കൃഷിയും 2024–25ൽ 2.4 ഹെക്ടർ നെൽക്കൃഷിയും 4 ഹെക്ടർ കാലിത്തീറ്റ കൃഷിയും നടപ്പിലാക്കി. 
മഹാത്മാഗാന്ധി ദേശീയ തൊഴിലുറപ്പ് പദ്ധതി വഴിയും കാർഷിക അടിസ്ഥാനസൗകര്യ പദ്ധതികൾ പൂർത്തിയാക്കി.
2 ലക്ഷം കാപ്പിത്തൈകൾ, 10,000  തെങ്ങിൻ തൈകൾ, 10,000 നാരങ്ങ തൈകൾ, ജിയോ ടെക്സ്റ്റൈൽ കുളങ്ങൾ, നദീതീര ലൈനിങ്, വ്യക്തിഗത കർഷകർക്ക് കൃഷിക്കുളങ്ങൾ, കനാൽ നവീകരണം, മഴവെള്ള സംഭരണിയിലൂടെ കിണർ റീചാർജ് സംവിധാനങ്ങൾ തുടങ്ങി അനേകം പ്രവർത്തനങ്ങൾ നടപ്പാക്കി.

വൈവിധ്യമാർന്ന പദ്ധതികൾ, കർഷകകേന്ദ്രിത സമീപനം, പരിസ്ഥിതി സംരക്ഷണ പ്രതിബദ്ധത, ഇതെല്ലാം ചേർന്നാണ് മീനങ്ങാടി ‌പഞ്ചായത്തിനെ സംസ്ഥാനത്തെ കാർഷിക രംഗത്ത് അഭിമാനസ്ഥാനത്ത് എത്തിച്ചതെന്നു ഭരണസമിതി വ്യക്തമാക്കി. പുരസ്കാരമായി പഞ്ചായത്തിന് 10 ലക്ഷം രൂപയും ഫലകവും സർട്ടിഫിക്കറ്റും ലഭിക്കും.

…