കാട്ടുകൊമ്പൻമാരെ തുരത്തി പ്രമുഖയും ഭരതും രംഗത്ത്

ബത്തേരി∙  മൂടക്കൊല്ലിയിൽ നിന്ന് കാട്ടുകൊമ്പൻമാരെ തുരത്താൻ കുങ്കിയാനയായ പ്രമുഖക്കൊപ്പം മുത്തങ്ങ പന്തയിൽ നിന്ന് ഭരത് എന്ന കുങ്കിയാന കൂടിയെത്തി. വനാതിർത്തിയിൽ നിന്ന് 4 കിലോമീറ്റർ ഉള്ളിലേക്ക് കാട്ടാനകളെ തിരഞ്ഞ് കുങ്കിയാനകളുംം 13 അംഗ വനപാലക സംഘവും ഇന്നലെ രാവിലെയോടെ നീങ്ങി. നാട്ടിൽ സ്ഥിരമായിറങ്ങുന്ന 2 കാട്ടുകൊമ്പൻമാരെ നേരിൽ കണ്ടതോടെ അവയെ കൂടുതൽ ദൂരത്തേക്ക് തുരത്തി.

എന്നാൽ മറുവശം കൊമ്മഞ്ചേരിയും അതിനപ്പുറം ബത്തേരി– പുൽപള്ളി റോഡുമായതിനാൽ പ്രത്യേക ഭാഗങ്ങളിലേക്ക് കാട്ടാനകളെ ഓടിക്കേണ്ടി വന്നു.
ഇന്നലെ ദൗത്യം തുടങ്ങുന്നതിനു മുൻപ് തലേന്ന് രാത്രിയിൽ കൃഷിയിടങ്ങളിൽ വീണ്ടും കാട്ടാനകളിറങ്ങിയിരുന്നു. കുങ്കിയാനകൾ കാടു കയറിയതോടെ കാട്ടാനകൾ അതിർത്തിയിൽ നിന്ന് കൂടുതൽ ഉള്ളിലേക്ക് മാറിയതായാണ് വിവരം.

ഇരുളം, കുപ്പാടി ഫോറസ്റ്റ് സ്റ്റേഷനുകളിൽ നിന്നുള്ള സംഘമാണ് കുങ്കിയാനകൾക്കൊപ്പം തുരത്തലിന് കാടുകയറിയത്.സെക്‌ഷൻ ഫോറസ്റ്റ് ഓഫിസർ ടി.വി. സുന്ദരേശൻ നേതൃത്വം നൽകി.

…