വാക്കുപാലിച്ച് കലക്ടർ; ‘ഇത്തവണത്തെ മഴ അവധി സൽമാന് ഡെഡിക്കേറ്റ് ചെയ്തു’

തൃശൂർ ∙ ഏഴാം ക്ലാസ് വിദ്യാർഥി സൽമാന് നൽകിയ വാക്കുപാലിച്ച് തൃശൂർ കലക്ടർ അർജുൻ പാണ്ഡ്യൻ. ഇത്തവണത്തെ മഴ അവധി സൽമാനും സൽമാനെ പോലെ സ്പോർട്സിനേ സ്നേഹിക്കുന്ന കൊച്ചു കൂട്ടുകാർക്കും ആയി കലക്ടർ ഡെഡിക്കേറ്റ് ചെയ്തു.
മുൻപ് ‘കലക്ടർ സാറിനെ ഓടിത്തോൽപിച്ചാൽ സ്‌കൂളിനു അവധി തരുമോ’ എന്ന് കലക്ടർ അർജുൻ പാണ്ഡ്യനോട് ചോദിച്ച തൃശൂർ ലൂർദ് സെന്റ് മേരീസ് യുപി സ്‌കൂളിലെ ഏഴാം ക്ലാസ് വിദ്യാർഥി സൽമാന്റെ ചോദ്യം സമൂഹമാധ്യമങ്ങളിൽ ശ്രദ്ധ നേടിയിരുന്നു.

എൻഡ്യുറൻസ് അത്‌ലറ്റ്സ് ഓഫ് തൃശൂരിന്റെ നേതൃത്വത്തിൽ സംഘടിപ്പിച്ച ഓട്ടം ഫ്ലാഗ് ഓഫ് ചെയ്ത ശേഷം കലക്‌ടർ ഓടാൻ തുടങ്ങുമ്പോഴായിരുന്നു സൽമാന്റെ ചോദ്യം. ചാലഞ്ച് ഏറ്റെടുത്ത് ഓട്ടം തുടങ്ങിയ കലക്ടറും സൽമാനും ഉൾപ്പെടെയുള്ളവർ സൗഹൃദ ഓട്ടം ഒരുമിച്ച് ഫിനിഷ് ചെയ്തു.

വരുന്ന ദിവസങ്ങളിൽ മഴമൂലം അവധി പ്രഖ്യാപിക്കേണ്ട സാഹചര്യം വന്നാൽ മികച്ച പ്രകടനം കാഴ്ചവച്ച സൽമാന്റെ പേരിൽ അവധി ‘പ്രഖ്യാപിക്കാമെന്ന്’ ഉറപ്പും നൽകിയാണ് അന്ന് കലക്ടർ മടങ്ങിയത്.

അന്നു നൽകിയ വാക്കുപാലിച്ചിരിക്കുകയാണ് കലക്ടർ.
കലക്ടറുടെ ഫെയ്ക്സ്ബുക് കുറിപ്പിൽ നിന്ന്
അവധി ചോദിച്ചുകൊണ്ടുള്ള മെസ്സേജുകൾ നേരിട്ടും സാമൂഹികമാധ്യമങ്ങളിലൂടെയും എന്നോട് കുട്ടികൾ ചോദിക്കാറുള്ളതാണ്…. കഴിഞ്ഞ മാസം പാലപിള്ളിയിൽ വച്ചു നടന്ന മരത്തോണിനിടെ പരിചയപ്പെട്ട

ഏഴാം ക്ലാസ്സുകാരൻ സൽമാന്റെ ചോദ്യവും അങ്ങനെ ഉള്ള ഒന്നായിരുന്നു. മഴയുടെ സാഹചര്യങ്ങളും മുന്നറിയിപ്പും കണക്കിലാക്കിയാണ് അവധികൾ നിശ്ചയിക്കുന്നത്.

കുറച്ചു ദിവസത്തെ ഇടവേളക്ക് ശേഷം, ഇതാ ഒരു മഴ അവധി കൂടി. ഈ മഴ അവധികൾ വീട്ടിൽ ഇരുന്നു പഠിച്ചും മറ്റു പ്രവർത്തികളിൽ ഏർപ്പെട്ടും, പുഴകളിലോ മറ്റു ജലാശയങ്ങളിലോ ഇറങ്ങാതെ വീട്ടിൽ ഇരിക്കണം എന്നഭ്യർഥിക്കുന്നു.

ഈ അവധി സൽമാനും, സൽമാനെ പോലെ സ്പോർട്സിനേ സ്നേഹിക്കുന്ന, എല്ലാ കൊച്ചു കൂട്ടുകാർക്കും ആയി ഡെഡിക്കേറ്റ് ചെയ്യുന്നു. വലിയ സ്വപ്‌നങ്ങൾ കാത്തുസൂക്ഷിക്കുകയും പരിശ്രമിക്കുകയും ചെയ്യുന്ന എല്ലാ കൂട്ടുകാർക്കും, അവ യാഥാർഥ്യമാവട്ടെ എന്നാശംസിക്കുന്നു.

വലിയ നേട്ടങ്ങളിലേക്ക് ഓടി കുതിക്കുവാൻ സൽമാനും സാധിക്കട്ടെ! …