സർവീസ് റോഡിൽ കുഴികളെന്ന് പരാതി

ആമ്പല്ലൂർ ∙ അടിപ്പാത നിർമാണം നടക്കുന്ന ജംക്‌ഷനിലെ സർവീസ് റോഡുകളിലെ കുഴികൾ യാത്രാവേഗം കുറയ്ക്കുന്നു. റോഡിൽ കുഴികൾ കാണുന്നതോടെ വലിയ വാഹനങ്ങൾ വേഗം വളരെ കുറയ്ക്കും. ഇതോടെ വാഹനത്തിരക്കേറിയ സമയങ്ങളിൽ ഗതാഗതക്കുരുക്ക് രൂക്ഷമാകും. ഇത്രയും ഭാരവാഹനങ്ങളെ താങ്ങാവുന്ന തരത്തിലല്ല താൽക്കാലിക സർവീസ് റോഡ് നിർമിച്ചിരിക്കുന്നതെന്ന ആരോപണം. എത്രതവണ കുഴികളടച്ചാലും പിന്നെയും ഇവ തുറക്കുന്ന നിലയിലാണ്. 

റോഡ് മിക്കയിടത്തും പൊളിഞ്ഞ നിലയിലാണ്. ഇരു-മുച്ചക്ര വാഹനങ്ങൾ കടന്നുപോകുന്നത് വലിയ വാഹനങ്ങളെ പേടിച്ചാണ്. കുഴികളിൽ ഇറങ്ങിയാൽ ഇരുചക്ര വാഹനങ്ങൾ മറിയുമെന്ന ഭീതിയുമുണ്ട്. മികച്ച നിലവാരത്തിൽ റീടാർ ചെയ്ത് പ്രശ്നം പരിഹരിക്കണമെന്നാണ് ആവശ്യം. ഇതിനിടെ വൈകുന്നേരങ്ങളിൽ ആമ്പല്ലൂരിൽ ഗതാഗതക്കുരുക്ക് തുടരുകയാണ്.