മേൽപാലം മാസങ്ങൾക്കകം; കോൺക്രീറ്റിങ് പൂർത്തിയായി

മേൽപാലം മാസങ്ങൾക്കകം; കോൺക്രീറ്റിങ് പൂർത്തിയായി നെയ്യാറ്റിൻകര ∙ തിരുപുറം മണ്ണക്കല്ലിൽ കോവളം – കാരോട് ബൈപാസിനു കുറുകെ പഴയകട – മാവിളക്കടവ് റോഡിന് സമാന്തരമായി നിർമിക്കുന്ന മേൽപാലം മാസങ്ങൾക്കുള്ളിൽ പൂർത്തിയാകും.

കോൺക്രീറ്റ് പൂർത്തിയായി. പാലത്തിന്റെ വശങ്ങളിലെ ഭിത്തി നിർമാണം, ടാറിങ്, പ്ലാസ്റ്ററിങ്, പെയ്ന്റിങ് തുടങ്ങിയ ജോലികളാണ് ശേഷിക്കുന്നത്.

ബൈപാസിൽ ഒരു വശത്തേക്കുള്ള ഗതാഗതം പൂർണമായി തടഞ്ഞിരുന്നു. ഇതു ഒരു മാസത്തിനുള്ളിൽ പൂർവ സ്ഥിതിയിലാക്കാൻ കഴിയുമെന്നാണ് പ്രതീക്ഷ.

ആദ്യ ഘട്ടത്തിൽ നിർമാണം മന്ദഗതിയിലാണെന്ന് ആരോപണം ഉയർന്നതിനു പിന്നാലെ എൻഎച്ച് അധികൃതരും കരാറുകാരും പാലം നിർമാണത്തിന്റെ വേഗം വർധിപ്പിക്കുകയായിരുന്നു. കഴിഞ്ഞ ഓഗസ്റ്റിലാണ് നിർമാണം ആരംഭിച്ചത്.

3.37 കോടി രൂപയാണ് നിർമാണ ചെലവ്. തിരക്കേറിയ പഴയകട

– മാവിളക്കടവ് റോഡ് മുറിച്ചായിരുന്നു ബൈപാസ് നിർമാണം. ഇവിടെ മേൽപാലം വേണമെന്ന് അന്നു തന്നെ പ്രദേശവാസികൾ ആവശ്യപ്പെട്ടെങ്കിലും എൻഎച്ച് അതോറിറ്റി അതിനു നേരെ മുഖം തിരിച്ചു.

പിന്നീട് വലിയ പ്രക്ഷോഭങ്ങൾ നടത്തിയ ശേഷമാണ് ജനത്തിന്റെ ആവശ്യം അംഗീകരിച്ചത്. അര നൂറ്റാണ്ടിലേറെയായി ജനങ്ങൾ ഉപയോഗിച്ചുകൊണ്ടിരുന്നതാണ് പഴയകട

മാവിളക്കടവ് റോഡ്. മാവിളക്കടവ്, വട്ടവിള, കുളത്തൂർ, പ്ലാമൂട്ടുക്കട, പാറശാല പ്രദേശങ്ങളിലേക്ക് നെയ്യാറ്റിൻകര, പഴയകട, തിരുപുറം കാഞ്ഞിരംകുളം പ്രദേശങ്ങളിലെ ജനങ്ങൾക്ക് എത്തുന്നതിനുള്ള പ്രധാന പാതയാണിത്. ബൈപാസ് വന്നതോടെ റോഡ് മണ്ണക്കലിൽ നിന്ന് തിരിഞ്ഞ് സർവീസ് റോഡിലൂടെ പോകേണ്ട

സ്ഥിതിയായി. ബദൽ സൗകര്യം ഒരുക്കിയെങ്കിലും അതു കൂടുതൽ ബുദ്ധമുട്ടായി.

ഇതോടെ ജനം പ്രതിഷേധിക്കുകയും ഒടുവിൽ മേൽപാലം നേടിയെടുക്കുകയും ചെയ്തു. ∙ മാവിളക്കടവിൽ പുതിയ പാലം നിർമിക്കുന്നതിനാൽ  ഗതാഗത ക്രമീകരണം ഏർപ്പെടുത്തിയിരിക്കുകയാണ്.

കിലോമീറ്ററുകൾ താണ്ടിയാണ് ജനം ഇപ്പോൾ യാത്ര ചെയ്യുന്നത്. മാവിളക്കടവിൽ നിർമിക്കുന്ന പാലത്തിന്റെ നിർമാണം കൂടി പൂർത്തിയായാൽ മാത്രമേ ഈ പ്രദേശത്തെ ജനങ്ങളുടെ യാത്രാ ദുരിതത്തിന് പരിഹാരമാകൂ.

…