പാപനാശത്ത് അനധികൃത നിർമാണം തടഞ്ഞു

വർക്കല∙ പാപനാശം തീരത്ത് പ്രവർത്തിക്കുന്ന ടൂറിസം വകുപ്പ് അധീനതയിലുള്ള ടോയ്‌ലെറ്റ് ബ്ലോക്കിനു അനുബന്ധമായ സ്ഥലത്ത് അനധികൃതനിർമാണം. ഇൗ നിർമാണപ്രവർത്തനം തടയണമെന്നു ആവശ്യപ്പെട്ടു ബിജെപി കൗൺസിലർമാർ നഗരസഭയിൽ പരാതി നൽകി. താബൂക് ഉപയോഗിച്ചുള്ള നിർമാണം വിലക്ക് ലംഘിച്ചാണെന്നു കാട്ടിയാണ് കൗൺസിലർമാരായ കെ.എൽ.അനു, ആർ.അനിൽകുമാർ എന്നിവരാണ് നഗരസഭ സെക്രട്ടറിക്കു കത്ത് നൽകിയത്.

ഇതേത്തുടർന്നു നിർമാണത്തിനു സ്റ്റോപ് മെമ്മോ നൽകിയെന്നു നഗരസഭ അധികൃതർ അറിയിച്ചു. 
ബലിമണ്ഡപത്തിനു സമീപത്തു സ്ഥിതിചെയ്യുന്ന പാപനാശം കുന്നുകളുടെ ഭാഗത്താണ് നിർമാണം നടക്കുന്നത്. കഴിഞ്ഞവർഷം മുകൾ ഭാഗത്ത് നിന്നു മണ്ണി‌ടിയുകയും തുടർന്നു കലക്ടറുടെ നിർദേശപ്രകാരം അപകടാവസ്ഥയിൽ‌ ഇടിഞ്ഞുവീഴാൻ പാകത്തിൽ നിൽക്കുന്ന ഭാഗങ്ങൾ ചെറിയ തോതിൽ ഇടിച്ചു കളയാനും സ്വീകരിച്ച കലക്ടറുടെ നടപടി അന്നു വിവാദമായിരുന്നു. 
ഇതേത്തുടർന്നു ജിയോളജി വിഭാഗം ഈ ഭാഗത്ത് കുന്നിടിക്കുന്നതും മറ്റു തരത്തിലുള്ള നിർമാണ പ്രവർത്തനങ്ങളും കർശനമായി വിലക്കിയിരുന്നതാണ്. ബലിമണ്ഡപത്തിനു അരികെ ഉയർന്ന കുന്നിലാണ് ടോയ് ലറ്റ് ബ്ലോക്ക് നിലകൊള്ളുന്നത്. നേരത്തെ നഗരസഭയുടെ അധീനതയിലായിരുന്ന ബ്ലോക്ക് പിന്നീട് ടൂറിസം ഫണ്ട് ഉപയോഗിച്ചു നവീകരണം നടത്തി.

ടൂറിസം വകുപ്പിനാണ് ബ്ലോക്കിന്റെ പ്രവർത്തന ചുമതല. എന്നാൽ ഇതു കൈകാര്യം ചെയ്യുന്ന ചില ഉപകരാറുകാർ ചേർന്നാണ് നിർമാണം നടത്തുന്നത് എന്നാണ് ആക്ഷേപം.

ഭക്ഷണശാല കെട്ടിടത്തിനുള്ള പരിപാടിയാണെന്നാണ് സൂചന. …