പുതുപുത്തൻ എസി സ്ലീപ്പറുകളുമായി കേരള ആർടിസി: വഴിയിൽ കിടക്കേണ്ട, സർവീസ് മുടങ്ങില്ല; ബസുകൾ ഉടനെത്തും

ബെംഗളൂരു / തിരുവനന്തപുരം ∙ ബെംഗളൂരു മലയാളികൾക്ക് കേരള ആർടിസിയുടെ ഓണസമ്മാനമായി എസി സീറ്റർ കം സ്ലീപ്പർ ബസുകൾ; ഈ മാസം അവസാനം സർവീസ് ആരംഭിച്ചേക്കും. ബെംഗളൂരു– തിരുവനന്തപുരം റൂട്ടിലോടുന്ന കാലപ്പഴക്കമേറിയ എസി മൾട്ടി ആക്സിൽ ബസുകൾക്കു പകരമാണ് സീറ്റർ കം സ്ലീപ്പർ ബസുകൾ എത്തുന്നത്.

റൂട്ടും നിരക്കും ഉൾപ്പെടെ അടുത്ത ദിവസം പ്രഖ്യാപിക്കും.
10 വർഷത്തിലധികം പഴക്കമുള്ള ബസുകൾ തകരാറിലായി വഴിയിൽ കുടുങ്ങുന്നതും സർവീസ് മുടങ്ങുന്നതും പതിവായതോടെ ഇതിൽ യാത്ര ചെയ്യുന്നവരുടെ എണ്ണത്തിൽ കുറവ് വന്നിരുന്നു. 
കർണാടക ആർടിസിയും സ്വകാര്യ ബസുകളും കൂടുതൽ സ്ലീപ്പർ ബസുകൾ ഇറക്കി യാത്രക്കാരെ ആകർഷിച്ചതോടെ കേരള ആർടിസിയുടെ വരുമാനത്തെയും ബാധിച്ചു.
ബെംഗളൂരുവിലെ സ്വകാര്യ ബോഡി നിർമാണ കേന്ദ്രത്തിൽ പുതിയ ബസുകളുടെ അവസാനവട്ട മിനുക്കുപണികൾ പുരോഗമിക്കുകയാണ്.

അശോക് ലെയ്‌ലാൻഡാണ് 8 സീറ്റർ കം സ്ലീപ്പർ ബസുകൾ കേരള ആർടിസിക്ക് കൈമാറുന്നത്. കൂടാതെ 10 എസി സീറ്റർ ബസുകളും 8 സ്ലീപ്പർ ബസുകളും അധികം വൈകാതെ കേരള ആർടിസിക്ക് ലഭിക്കും.നിലവിൽ തിരുവനന്തപുരത്തേക്ക് സേലം വഴിയുള്ള എസി സീറ്റർ കം സ്ലീപ്പറും മൈസൂരു വഴിയുള്ള നോൺ എസി സീറ്റർ കം സ്ലീപ്പറും കെഎസ്ആർടിസി സ്വിഫ്റ്റിന്റേതാണ്.
ഓരോ ബസുകൾ മാത്രമുള്ളതിനാൽ ഒന്നിടവിട്ട

ദിവസങ്ങളിൽ മാത്രമാണ് ഇവ സർവീസ് നടത്തുന്നത്. കൂടാതെ ഗജരാജ മൾട്ടി ആക്സിൽ എസി സ്ലീപ്പർ ബസുകളും സ്വിഫ്റ്റിനുണ്ട്.

ഇതിൽ 2 ബസുകൾ നാഗർകോവിൽ വഴി തിരുവനന്തപുരത്തേക്കും 4 എണ്ണം സേലം വഴി എറണാകുളത്തേക്കുമാണു സർവീസ് നടത്തുന്നത്. ‌
ഓണം സ്പെഷലുമായി കർണാടക ആർടിസി
കർണാടക ആർടിസി ബെംഗളൂരുവിൽ നിന്നുള്ള ഓണം സ്പെഷൽ ബസുകളിലേക്കു ബുക്കിങ് തുടങ്ങി. കൂടുതൽ തിരക്കുള്ള സെപ്റ്റംബർ 2, 3 ദിവസങ്ങളിലാണു സ്പെഷൽ ബസുകളിലേക്കു ബുക്കിങ് ആരംഭിച്ചത്.

പതിവ് സർവീസുകളിൽ എസി, നോൺ എസി പ്രീമിയം ബസുകളിൽ 15% നിരക്കിളവും അനുവദിച്ചിട്ടുണ്ട്. കേരള ആർടിസി 29 മുതൽ സെപ്റ്റംബർ 15 വരെ ബെംഗളൂരുവിൽനിന്നു പ്രതിദിനം 22 സ്പെഷൽ സർവീസുകളാണു പ്രഖ്യാപിച്ചിരിക്കുന്നത്.

പതിവ് സർവീസുകളിലെ ടിക്കറ്റുകൾ തീരുന്നതിനനുസരിച്ചാണു സ്പെഷൽ ബസുകളിലേക്കു ബുക്കിങ് ആരംഭിക്കുന്നത്.
Disclaimer : വാർത്തയു‍ടെ കൂടെയുള്ള ഈ ചിത്രം Basith Basi എന്ന ഫേസ്ബുക്ക് അക്കൗണ്ടിൽ നിന്ന് എടുത്തതാണ്. …