ഒരു തരി ടാർ കണ്ടിട്ട് വർഷങ്ങളായി; തകർച്ച മാത്രം കണ്ട് ഒരു റോഡ്

കീഴ്‌വായ്പൂര് ∙ തകർന്നു നാശോന്മുഖമായിക്കിടക്കുന്ന പൊലീസ് സ്റ്റേഷൻപടി–മാർത്തോമ്മാ പള്ളിപ്പടി റോഡിൽ ദുരിതയാത്ര. ഭൂരിഭാഗങ്ങളിലും ടാറിങ്ങിളകിയിട്ടു വർഷങ്ങൾ കഴിഞ്ഞു. റോഡിന്റെ വശങ്ങളിലായി താമസിക്കുന്ന നൂറിലേറെ കുടുംബങ്ങളുടെ ഏക സഞ്ചാരമാർഗമാണിത്. ഇരുചക്രവാഹനങ്ങൾ, ഓട്ടോറിക്ഷകൾ എന്നിവ അപകടഭീതിയിലാണു പോകുന്നത്. യാത്രാദുരിതം ഇതിനു പുറമേയാണ്. സുബ്രഹ്മണ്യക്ഷേത്രം, ശിവക്ഷേത്രം, മാർത്തോമ്മാ പള്ളി എന്നിവിടങ്ങളിലേക്ക് എത്താൻ ആൾക്കാർ സ്ഥിരമായി ഉപയോഗിക്കുന്ന റോഡാണു തകർച്ചയിലായത്. സ്കൂൾ വിദ്യാർഥികളെ കൊണ്ടുപോകുന്ന വാഹനങ്ങളും പോകുന്നുണ്ട്. പൊലീസ് സ്റ്റേഷൻപടിക്കു സമീപത്തായി ഉയർന്ന ഭാഗങ്ങളിൽനിന്ന് ഒഴുകിയെത്തിയ ചരലും മണ്ണും അടിഞ്ഞുകൂടിയതും അപകടക്കെണിയാണ്.  ഒട്ടേറെ കുഴികളും രൂപപ്പെട്ടിട്ടുണ്ട്. കുഴികളിൽ വെള്ളം കെട്ടിക്കിടക്കുന്നതിനാൽ കാൽനടക്കാർക്കും ദുരിതമാണ്. റോഡ് നന്നാക്കാൻ നടപടിയെടുക്കണമെന്നാണു നാട്ടുകാരുടെ ആവശ്യം.