മലയാലപ്പുഴ ∙ കാണാതായ വയോധികയെ കാടിനോടു ചേർന്ന് അവശനിലയിൽ കണ്ടെത്തി. പൊലീസ് ഇൻസ്‌പെക്ടർ കൈകളിൽ ചുമന്നു റോഡിലെത്തിച്ചു.
രാവിലെ അമ്പലത്തിൽ പോയ മലയാലപ്പുഴ വടക്കുപുറം നല്ലൂർ തേവള്ളിൽ കൊല്ലംപറമ്പിൽ സരസ്വതിയെ (77) ആണു കാണാതായത്. വൈകിട്ടു പരാതിയുമായി എത്തിയ മകനൊപ്പം പൊലീസ് സംഘവുമായി ഇൻസ്‌പെക്ടർ ബി.എസ്.ശ്രീജിത്ത് സ്ഥലത്തെത്തി അന്വേഷിച്ചു.
പാറ ക്വാറിയും പാറക്കുളവും വിശാലമായ റബർ തോട്ടവും കാടും നിറഞ്ഞ സ്ഥലത്തു പൊലീസ് സംഘം തിരഞ്ഞു.
ഒടുവിൽ കാടിനോടു ചേർന്ന് ഏറെ അവശയായ നിലയിൽ സരസ്വതിയെ കണ്ടെത്തുകയായിരുന്നു. തുടർന്നു ശ്രീജിത്ത് സരസ്വതിയെ കൈകളിൽ കോരിയെടുത്തു മുക്കാൽ കിലോമീറ്ററോളം ദൂരം അതിവേഗം താണ്ടി റോഡിലെത്തിച്ചു.
തുടർന്ന് ആശുപത്രിയിലെത്തിച്ചു പ്രഥമശുശ്രൂഷ നൽകിയ ശേഷം മകൻ ബിജുവിനൊപ്പം അയച്ചു. എസ്‌സിപിഒ അജിത് പ്രസാദ്, സിപിഒമാരായ അനിൽ, അരുൺ രാജ് എന്നിവരാണു പൊലീസ് സംഘത്തിൽ ഉണ്ടായിരുന്നത്.
…
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
