ക്രിക്കറ്റ് ലഹരി നുകരാൻ കണ്ടത്തിലേക്ക് ഇറങ്ങിക്കോ; കലക്ടറും കളിക്കാനുണ്ട് !

പത്തനംതിട്ട ∙ ‘കണ്ടം’ ചെയ്യാനാകാത്ത ഓർമകളുടെ ക്രിക്കറ്റ് ലഹരി നുകരാൻ കുട്ടികളെ നാടൻ മൈതാനങ്ങളിലേക്കു ക്ഷണിച്ചു പത്തനംതിട്ട കലക്ടർ എസ്.പ്രേം കൃഷ്ണൻ. അവധിക്കാലത്ത് കംപ്യൂട്ടറിലും സ്മാർട്ട് ഫോണിലും കുത്തി വീടിനുള്ളിലിരിക്കാതെ മൈതാനത്തേക്കിറങ്ങി ക്രിക്കറ്റ് കളിക്കാനാണ് ഔദ്യോഗിക സമൂഹമാധ്യമ അക്കൗണ്ടിലൂടെ കലക്ടറുടെ ആഹ്വാനം. മറ്റെല്ലാ ലഹരിയും മറന്ന് ഈ ലഹരി ആസ്വദിക്കാനും കലക്ടർ നിർദേശിക്കുന്നു.

കളിക്കാൻ പോകുന്നതിനൊപ്പം കളിസ്ഥലങ്ങളുടെ പേരും ഫോട്ടോയും കമന്റ് ചെയ്യണമെന്നും തിരഞ്ഞെടുക്കപ്പെടുന്നയിടങ്ങളിൽ ബാറ്റ് വീശാനെത്തുമെന്നും കലക്ടർ ഉറപ്പുനൽകുന്നു. കണ്ടംകളി ആവേശം നിറഞ്ഞ വേദികളിലേക്ക് ഉയരട്ടെയെന്ന പ്രതീക്ഷയും അദ്ദേഹം പങ്കുവയ്ക്കുന്നു. കുറിപ്പ് കുട്ടികളും യുവാക്കളും ഏറ്റെടുത്തുകഴിഞ്ഞു. ‘ഞാനൊരു ക്രിക്കറ്റ് ഫാനാണ്. ഇന്നു കുട്ടികളെ മൈതാനങ്ങളിൽ കാണാറില്ല. അവധിക്കാലത്ത് അവർ കണ്ടം ക്രിക്കറ്റിലൂടെ മൈതാനങ്ങളിൽ തിരിച്ചെത്തട്ടെ’– കലക്ടർ പറഞ്ഞു.