ഹാപ്പിനസ് പാർക്ക് ഉദ്ഘാടനം നാളെ

പത്തനംതിട്ട∙ നഗരസഭയുടെ ഓണസമ്മാനമായി ഹാപ്പിനസ് പാർക്ക് നാളെ വൈകിട്ട് 4ന് നഗരസഭാ ചെയർമാൻ ടി.സക്കീർ ഹുസൈൻ നാടിന് സമർപ്പിക്കും. മുനിസിപ്പൽ ബസ് സ്റ്റാൻഡിന്റെ തെക്കു ഭാഗത്തെ പ്രവേശന കവാടത്തോടു ചേർന്നാണ് പാർക്കും അനുബന്ധസൗകര്യങ്ങളും ഒരുക്കിയിട്ടുള്ളത്.

വിശ്രമത്തിനും വിനോദത്തിനും ഒപ്പം നൈറ്റ് ലൈഫിനും സൗകര്യമൊരുക്കുക എന്ന ലക്ഷ്യത്തോടെയാണ് പദ്ധതി. പാർക്കിന്റെ ഉദ്ഘാടന സമ്മേളനം ടൗൺ സ്ക്വയറിലാണ്.
നിർമാണം പൂർത്തിയായ പാർക്കിൽ കുട്ടികൾക്കായി വിവിധ കളി ഉപകരണങ്ങളും ഇരിപ്പിടങ്ങളും ഒരുക്കിയിട്ടുണ്ട്.

ടേക്ക് എ ബ്രേക്ക്, കഫറ്റേരിയ എന്നീ അനുബന്ധ സൗകര്യങ്ങളുമുണ്ട്. നടപ്പാതയിൽ പൂച്ചെടികൾ പിടിപ്പിച്ചും മനോഹരമാക്കി.

ബസ് സ്റ്റാൻഡിനോട് ചേർന്ന് നഗരസഭ ഏറ്റെടുത്ത ട്രാവലഴ്സ് ലോഞ്ചിൽ കുടുംബശ്രീയുടെ പ്രീമിയം കഫെ ഉടൻ പ്രവർത്തനം ആരംഭിക്കുമെന്ന് നഗരസഭാ അധികൃതർ പറഞ്ഞു. 
പരിമിതമായ പൊതു ഇടങ്ങൾ മാത്രം ഉണ്ടായിരുന്ന സ്ഥിതിയിൽ നിന്നു സാമൂഹിക സാംസ്കാരിക ഇടവും വിനോദത്തിനും വിശ്രമത്തിനുമായി കൂടുതൽ സൗകര്യങ്ങളും ഒരുക്കി നഗര ജീവിതത്തിന് പുതിയ മാനം നൽകുകയെന്ന ലക്ഷ്യമാണ് സാക്ഷാത്കരിക്കപ്പെടുന്നതെന്ന് നഗരസഭാ ചെയർമാൻ പറഞ്ഞു. നഗരസഭാ ബസ് സ്റ്റാൻഡിൽ സ്പെഷൽ അസിസ്റ്റൻസ് പദ്ധതി പ്രകാരം ആരംഭിച്ച 5 കോടി രൂപയുടെ നവീകരണ പ്രവർത്തനങ്ങൾ അവസാന ഘട്ടത്തിലാണ്.

പദ്ധതിയുടെ ആദ്യഘട്ടമായി ബസ്‌ സ്റ്റാൻഡ് യാഡിന്റെ പുനർനിർമാണം പൂർത്തീകരിച്ചിരുന്നു.
രണ്ടാം ഘട്ടത്തിൽ ഡ്രൈവ്‌ വേ, നടപ്പാത എന്നിവയുടെ നിർമാണം അതിവേഗം പുരോഗമിക്കുകയാണ്. ബസ് സ്റ്റാൻഡ് ഭൂമിയുടെ ചുറ്റുമതിൽ നിർമാണത്തിന് ടെൻഡർ നടപടികളിലേക്കും കടന്നു. ഇത് പൂർത്തിയാകുന്നതോടെ ഡ്രൈവ്‌ വേയുടെയും നടപ്പാതയുടെയും അവസാന ഘട്ടം പൂർണമാകും.

അര കിലോമീറ്ററോളം നീളത്തിലാണ് ബസ് സ്റ്റാൻഡിനോട് ചേർന്നുള്ള നടപ്പാത ഒരുങ്ങുന്നത്. പ്രഭാത – സായാഹ്ന സവാരി നടത്തുന്നവർക്ക് ഈ സൗകര്യം പ്രയോജനപ്രദമാണ്.

…