നടക്കാവ് മേൽപാലം: റെയിൽവേയുടെ ജോലികൾ ഒക്ടോബറിൽ പൂർത്തിയാക്കും

അകത്തേത്തറ ∙ നടക്കാവ് മേ‍ൽപാല നി‍ർമാണത്തിൽ തങ്ങളുടെ പ്രവൃത്തികൾ ഒക്ടോബറിൽ പൂ‍ർത്തിയാക്കുമെന്നു റെയിൽവേ. മേൽപാലം ജനകീയ സമിതി റെയിൽവേ മന്ത്രാലയത്തിനു നൽകിയ പരാതിക്കുള്ള മറുപടിയിലാണ് ഇക്കാര്യം വ്യക്തമാക്കിയിട്ടുള്ളത്.

ജൂൺ 10ന് റെയിൽവേ ട്രാക്കിനു മുകൾ ഭാഗത്തുള്ള 6 ഗർഡറുകൾ സ്ഥാപിച്ചു. ഇതിന്റെ ബാക്കി പ്രവൃത്തികൾ പുരോഗതിയിലാണ്.

ട്രാക്കിന് ഇരുവശത്തുമുള്ള പാലം പണി കൂടി റെയിൽവേയുടെ നേതൃത്വത്തിലാണു നടത്തേണ്ടത്. ഇതുൾപ്പെടെ റെയിൽവേയുടെ പ്രവൃത്തികൾ ഒക്ടോബറിൽ പൂർത്തിയാക്കുമെന്നാണ് അറിയിപ്പ്.
ബാക്കി പണികൾ ഇഴഞ്ഞിഴഞ്ഞ്
ട്രാക്കിന് ഇരുവശത്തുമുള്ള പാലത്തിന്റെ ഭാഗം റെയിൽവേ പൂർത്തിയാക്കിയാലും ബാക്കി ഭാഗം നിർമിക്കേണ്ടതു റോഡ്സ് ആൻഡ് ബ്രിജസ് ഡവലപ്മെന്റ് കോർപറേഷനാണ്.

ഒരു മാസം മുൻപു മേൽപാലത്തിലേക്കുള്ള അപ്രോച്ച് റോഡിന്റെ ഭിത്തിയുടെ ബാക്കി പ്രവൃത്തികൾ ആരംഭിച്ചിരുന്നു. ഇത് ഇപ്പോഴും തുടരുന്നുണ്ട്.

ഇതര പ്രവൃത്തികളിൽ കാര്യമായ പുരോഗതി ഇല്ല. സർവീസ് റോഡ് നിർമാണവും പൂർത്തീകരിക്കാനുണ്ട്.
തുടങ്ങിയതു 2017ൽ
2017 ഒക്ടോബർ 9നാണ് മേ‍ൽപാല നിർമാണത്തിനു തറക്കല്ലിട്ടത്.

2021 ജനുവരി 23നു നിർമാണോദ്ഘാടനം നടത്തി. ഒരു വർഷത്തിനകം പണി പൂർത്തിയാക്കുമെന്നാണു ഉറപ്പ്.

ഇപ്പോഴും പാലം പണി പാതിവഴിയിലാണ്. നിർമാണം ആരംഭിച്ച അന്നു മുതൽ ഇതുവഴിയുള്ള ഗതാഗതം തടസ്സപ്പെട്ടു.

യാത്രക്കാർക്കു ബസ് കയറണമെങ്കിൽ ഏറെ ദൂരം നടക്കണം. …