അടയ്ക്കാതെരുവിൽ അടവച്ച പോലെ ഗതാഗതക്കുരുക്ക്; വില്യാപ്പള്ളി റോഡിലേക്ക് തിരിയുന്ന ഭാഗത്തെ വലിയ കുഴി ഗതാഗത തടസ്സമുണ്ടാക്കുന്നു

വടകര∙ ദേശീയപാതയിൽ അടക്കാതെരു ജംക്‌ഷനിൽ ഗതാഗതക്കുരുക്ക് കൂടുതൽ രൂക്ഷമായി. വില്യാപ്പള്ളി റോഡിൽ നിന്നു മാർക്കറ്റ് റോഡിലേക്ക് ഗതാഗതത്തിന് തുറന്നു കൊടുത്തതോടെയാണ് യാത്ര ദുഷ്കരമാകും വിധം വാഹന കുരുക്ക് മുറുകിയത്.  മേൽപാലത്തിന്റെ നിർമാണം ഒരു ഘട്ടം പൂർത്തിയായതോടെയാണ് അടിയിലൂടെ ഉള്ള വാഹന ഗതാഗതം തുടങ്ങിയത്.  ഇതുവരെയും  മാർക്കറ്റ് റോഡിൽ നിന്നുള്ള വാഹനങ്ങൾക്ക് വില്യാപ്പള്ളി റോഡിലേക്ക് നേരിട്ട് പ്രവേശനം ഉണ്ടായിരുന്നില്ല.

കണ്ണൂർ ഭാഗത്തു നിന്ന് വാഹനങ്ങൾ ഇടതടവില്ലാതെ കടന്നു പോകുന്നതും വില്യാപ്പള്ളി റോഡിലേക്ക് തിരിയുന്ന ഭാഗത്ത് വലിയ കുഴി ഉള്ളതിനാലും വാഹനങ്ങൾക്ക് എളുപ്പം മുന്നോട്ട് എടുക്കാൻ കഴിയുന്നില്ല.
വില്യാപ്പള്ളി റോഡ് പഴയ പടി കിടക്കുകയാണ്.  കുഴി അടക്കുകയോ നന്നാക്കുകയോ ചെയ്തിട്ടില്ല. പഴയ സ്റ്റാൻഡ് ഭാഗത്തേക്ക് ബസുകളും മറ്റും പോകുമ്പോൾ കണ്ണൂർ റോഡിൽ നിന്നുള്ള വാഹനങ്ങൾ കുടുങ്ങുന്നു.

ഈ ഭാഗം തുറന്നു കൊടുത്താൽ കുരുക്ക്  അടക്കാതെരു മുഴുവനും ആശുപത്രി റോഡിലേക്കും വ്യാപിക്കുന്നു. ഗതാഗതം നിയന്ത്രിക്കുന്ന ട്രാഫിക് പൊലീസ് പെടാപ്പാട് പെട്ടാണ് കുരുക്ക് ഒഴിവാക്കുന്നത്.

റോഡ് അറ്റകുറ്റപ്പണി നടത്തി ഡിവൈഡർ സ്ഥാപിച്ച് വാഹനങ്ങളെ നിയന്ത്രിക്കാൻ സ്ഥിരം സംവിധാനം ഏർപ്പെടുത്തണം എന്നാണ് ആവശ്യം. …