ദേശീയപാതയിൽ കുഴിയിൽ താഴ്ന്ന് ഭാരലോറികൾ; ഗതാഗതക്കുരുക്ക്

പയ്യോളി∙ മഴ കനത്തതോടെ ദേശീയപാതയിൽ രൂപപ്പെട്ട കുഴികൾ കാരണം തിക്കോടിയിലും പെരുമാൾപുരത്തും ഭാരം കയറ്റിയ ലോറികൾ ചെരിഞ്ഞ് അപകടാവസ്ഥയിലായി. ഇതുകാരണം ഇന്നലെ രാവിലെ മുതൽ പയ്യോളി മേഖലയിൽ വൻ ഗതാഗതക്കുരുക്ക് അനുഭവപ്പെട്ടു. ആറുവരിപ്പാതയുടെ നിർമാണം പൂർത്തിയാക്കിയ തിക്കോടി പാലൂരിൽ കണ്ണൂരിൽ നിന്ന് മരവുമായി പെരുമ്പാവൂരിലെ പ്ലൈവുഡ് ഫാക്ടറിയിലേക്ക് പോകുകയായിരുന്ന ലോറി കുഴിൽപെട്ട് ചെരിഞ്ഞ് അപകടാവസ്ഥയിലായി. ഭാരം കയറ്റിയ ലോറി ചെരിഞ്ഞ് നിന്നതോടെ അപകട ഭീഷണി മൂലം അതുവഴി വാഹനങ്ങൾക്ക് പോകാൻ കഴിയാതെയായി.

അതോടെ വാഹനങ്ങൾ സർവീസ് റോഡിനെ ആശ്രയിച്ചു. കുണ്ടും കുഴിയും നിറഞ്ഞ് കനത്ത വെള്ളക്കെട്ടും ഉള്ള ഇതു വഴിയുള്ള യാത്ര വൻ ഗതാഗതക്കുരുക്കിന് കാരണമായി. പെരുമാൾ പുരത്തെ കുഴിയിലെ വെള്ളക്കെട്ടിൽ ഭാരം കയറ്റിയ ലോറി ചെരിഞ്ഞ് കയറാൻ ആകാതെ വന്നത് മണിക്കൂറുകൾ നീണ്ട ഗതാഗതക്കുരുക്കിനു കാരണമായി.  ബസുകൾ ഉൾപ്പെടെ പല വഴികളിലൂടെ തിരിച്ചു വിടേണ്ടി വന്നു. കഴിഞ്ഞ ദിവസം കലക്ടർ ഇടപെട്ട്  റോഡിന്റെ പ്രശ്നങ്ങൾ പരിഹരിക്കാൻ ദേശീയപാത അതോറിറ്റിയോടും നിർമാണ കമ്പനിയോടും ആവശ്യപ്പെട്ടിരുന്നെങ്കിലും കുണ്ടും കുഴിയുമുള്ള ഇടങ്ങളിൽ മെറ്റൽ പാകി അധികൃതരുടെയും നാട്ടുകാരുടെയും കണ്ണിൽ പൊടി ഇടുകയാണ് കരാർ കമ്പനി ചെയ്തതെന്ന് നാട്ടുകാർ പറയുന്നു.