‘തിളക്കം’ എന്ന് അച്ചടിച്ചു ? ദൃശ്യങ്ങൾ പരിശോധിക്കും; കോർപറേഷൻ പ്രോഗ്രസ് റിപ്പോർട്ട്: കൂടുതൽ രേഖ ഹാജരാക്കാൻ കലക്ടറുടെ നിർദേശം

കോഴിക്കോട് ∙ 5 വർഷത്തെ കോർപറേഷൻ ഭരണത്തിന്റെ നേട്ടങ്ങൾ വിവരിക്കുന്ന പ്രോഗ്രസ് റിപ്പോർട്ട് ‘തിളക്കം’ അച്ചടിച്ചു വിതരണം ചെയ്തതുമായി ബന്ധപ്പെട്ടു കൂടുതൽ രേഖകൾ ഹാജരാക്കാൻ കോർപറേഷൻ സെക്രട്ടറിയോടു കലക്ടർ സ്നേഹിൽ കുമാർ സിങ് നിർദേശിച്ചു. തിരഞ്ഞെടുപ്പു പ്രഖ്യാപനത്തിനു മുൻപ് അച്ചടിച്ചതാണെന്നും കൗൺസിലർമാർക്കു മാത്രമാണ് ഇവ കൈമാറിയതെന്നും വ്യക്തമാക്കി കോർപറേഷൻ സെക്രട്ടറി നൽകിയ റിപ്പോർട്ടിനു പിന്നാലെയാണു കലക്ടർ കൂടുതൽ രേഖകൾ ആവശ്യപ്പെട്ടത്.

കൗൺസിലർമാർക്കു കോപ്പി നൽകിയതിന്റെ ഉൾപ്പെടെയുള്ള രേഖകൾ ഇന്നു ഹാജരാക്കാനാണ് കലക്ടർ ആവശ്യപ്പെട്ടിരിക്കുന്നത്. ബിജെപി നൽകിയ പരാതിയിലെ ദൃശ്യങ്ങളും കലക്ടർ പരിശോധിക്കും.
 ഭരണനേട്ടങ്ങൾ വിവരിക്കുന്ന കൈപ്പുസ്തകം തിരഞ്ഞെടുപ്പു കാലത്തു വിതരണം ചെയ്തതു ചട്ടലംഘനമാണെന്നു കണ്ടെത്തിയതിനെ തുടർന്നാണു കലക്ടർ വിതരണം തടഞ്ഞതും റിപ്പോർട്ട് തേടിയതും.

യുഡിഎഫ് കൗൺസിൽ പാർട്ടി നൽകിയ പരാതിയെ തുടർന്നായിരുന്നു കലക്ടറുടെ ഇടപെടൽ. ഇന്നലെ ബിജെപിയും കലക്ടർക്കു പരാതി നൽകിയിട്ടുണ്ട്.

നേരത്തേ അച്ചടിച്ചതിനാൽ, കോർപറേഷന്റെ ഭാഗത്തു വീഴ്ചയില്ലെന്നാണു തദ്ദേശഭരണ വകുപ്പിന്റെ നിലപാട്. അതേസമയം, വിതരണം ചെയ്യുന്നവർക്കെതിരെ നടപടിയെടുക്കുമെന്ന് അവർ അറിയിച്ചു.
ഒക്ടോബർ 26നു നടന്ന വികസന സെമിനാറിൽ തിളക്കം പ്രകാശനം ചെയ്തിരുന്നെന്നും തിരഞ്ഞെടുപ്പ് പ്രഖ്യാപനത്തിനു മുൻപേ അച്ചടിച്ചു കൗൺസിലർമാർക്കു നൽകിയതാണെന്നും വിതരണം ചെയ്യരുതെന്നു നിർദേശിച്ചിരുന്നെന്നും കോർപറേഷൻ സെക്രട്ടറി നൽകിയ റിപ്പോർട്ടിലുണ്ട്. ഒരു ലക്ഷം കോപ്പിയാണ് പ്രിന്റ് ചെയ്തതെന്നും 6 ലക്ഷം രൂപ അച്ചടിക്കായി കോർപറേഷൻ നേരത്തേ തന്നെ അനുവദിച്ചിരുന്നതായും റിപ്പോർട്ടിൽ പറയുന്നു.

എന്നാൽ ‘തിളക്ക’ത്തിന്റെ കോപ്പി ലഭിച്ചിട്ടില്ലെന്നാണ് യുഡിഎഫ്, ബിജെപി കൗൺസിലർമാർ പറയുന്നത്. എവിടെയാണ് അച്ചടിച്ചതെന്നു പുസ്തകത്തിലില്ല. ‘തിളക്കം’ ഇന്നലെ കാരപ്പറമ്പിലും ബേപ്പൂരിലും വിതരണം ചെയ്തതായി പരാതി ഉയർന്നിട്ടുണ്ട്.

ഇക്കാര്യത്തിൽ കോടതിയിൽ യുഡിഎഫ് ഹർജി നൽകും. നേരത്തേ പ്രകാശനം ചെയ്തതു മറ്റൊരു മുഖചിത്രമുള്ള ‘തിളക്ക’മാണെന്ന ആരോപണവും ഉയർന്നിട്ടുണ്ട്.
പരാതി നൽകി ബിജെപി
ബിജെപി കൗൺസിൽ പാർട്ടി ലീഡർ നവ്യാ ഹരിദാസ് ഇതു സംബന്ധിച്ച് കലക്ടർക്ക് ഇന്നലെ പരാതി നൽകി. സിപിഎം എരഞ്ഞിപ്പാലം പാർട്ടി ഓഫിസിൽ സൂക്ഷിച്ചതാണെന്നു കാണിച്ച് ‘തിളക്ക’ ത്തിന്റെ ഫോട്ടോയും വിഡിയോയും സഹിതമാണ് നവ്യ ഹരിദാസ് പരാതി നൽകിയിട്ടുള്ളത്.

കലക്ടർ തടഞ്ഞിട്ടും എൽഡിഎഫ് സ്ഥാനാർഥികളും സിപിഎം പ്രവർത്തകരും വോട്ട് അഭ്യർഥനയ്ക്കൊപ്പം ‘തിളക്കം’ വിതരണം ചെയ്യുകയാണെന്നും ഇതു  തിരഞ്ഞെടുപ്പ് ചട്ട ലംഘനമാണെന്നും അവർ പരാതിപ്പെട്ടു.
നിയമപരമായി നീങ്ങും: യുഡിഎഫ്
കോർപറേഷൻ ഫണ്ട് ഉപയോഗിച്ച് പുറത്തിറക്കിയ ‘തിളക്കം’ എൽഡിഎഫ് തിരഞ്ഞെടുപ്പ് പ്രചാരണത്തിന് ഉപയോഗിച്ചതിനെതിരെ നിയമപരമായി മുന്നോട്ടു പോകുമെന്നും യുഡിഎഫ് കൗൺസിൽ പാർട്ടി നേതാക്കളായ കെ.സി.ശോഭിതയും കെ.മൊയ്തീൻ കോയയും പറഞ്ഞു.

കോർപറേഷൻ സ്റ്റോക്ക് റജിസ്റ്ററിൽ ‘തിളക്ക’ ത്തിന്റെ വിവരം രേഖപ്പെടുത്തിയിട്ടില്ലെന്നും ഡെലിവറി കുറിപ്പില്ലെന്നും ബിൽ നൽകിയിട്ടില്ലെന്നും കെ.മൊയ്തീൻ കോയ ആരോപിച്ചു. … FacebookTwitterWhatsAppTelegram