തടസ്സങ്ങളോട് തടസ്സങ്ങൾ; കറുകച്ചാൽ സെൻട്രൽ ജംക്‌ഷൻ നവീകരണം വൈകും

കറുകച്ചാൽ ∙ ഡിസൈൻ ജോലി പൂർത്തിയായ സെൻട്രൽ ജംക്‌ഷൻ നവീകരണ പദ്ധതി നടപടിയിൽ എത്താൻ വൈകും. സർവേ നടത്താൻ വൈകുന്നതും ഭൂമി ഏറ്റെടുക്കാൻ ഫണ്ട് വേണം എന്നുള്ളതുമാണു തടസ്സമായി നിൽക്കുന്നത്.    ജംക്‌ഷൻ ശാസ്ത്രീയമായി നവീകരിക്കുന്നതിന് കൂടുതൽ സ്ഥലം വേണം.

ഇതിന് പുറമ്പോക്ക് സ്ഥലം കണ്ടെത്തുന്നതിനായി സർവേ നടത്തണമെന്ന് ആവശ്യപ്പെട്ട് പിഡബ്ല്യുഡി റോഡ് വിഭാഗം റവന്യു വകുപ്പിന് കത്ത് നൽകിയതിനു മറുപടി നൽകിയിരുന്നു.
∙ തടസ്സം ഒന്ന്
നവീകരണ പദ്ധതി അലൈൻമെന്റ് സർവേ നടത്താൻ സ്പെഷൽ ടീം രൂപീകരിക്കണമെന്നാണ് റവന്യു വകുപ്പ് പറയുന്നത്. ടൗണിന്റെ ഹൃദയഭാഗത്തുള്ള സെൻട്രൽ ജംക്‌ഷൻ സർവേ ചെയ്യണമെങ്കിൽ കുറഞ്ഞത് ഒരു മാസം വേണ്ടിവരും.

ഇതിനായി സർവേയറും 2 സഹായികളും ചേർന്നുള്ള ടീം വേണ്ടി വരും. താലൂക്കിൽ ആകെ 2 സർവേയർമാരാണുള്ളത്.

ഒരാൾ 8 വില്ലേജും അടുത്തയാൾ 7 വില്ലേജുമാണ് നോക്കുന്നത്. നിലവിൽ നിരവധി ജോലികൾ തടസ്സപ്പെട്ടിരിക്കുകയാണ്.

സെൻട്രൽ ജംക്‌ഷൻ സർവേക്കു നിലവിലുള്ള സർവേയർമാരെ മാറ്റാൻ കഴിയാത്ത സാഹചര്യമാണുള്ളത്.
∙ തടസ്സം രണ്ട്
സർവേ നടത്തി ഭൂമി ഏറ്റെടുക്കേണ്ടി വരുന്നതിന് വലിയ തുക വേണ്ടിവരും. ഇതിനുള്ള ഫണ്ട് പിഡബ്ല്യുഡി റോഡ് വിഭാഗത്തിനില്ല.

അടുത്ത ബജറ്റിൽ ഇതിനുള്ള തുക വകയിരുത്തണം. അതിന് ശേഷമേ തുടർ നടപടികൾക്ക് സാധ്യതയുള്ളൂ.
∙ ഡിസൈൻ പെട്ടിയിലുണ്ട്
പൊതുമരാമത്ത് റോഡ് വിഭാഗം സെൻട്രൽ ജംക്‌ഷനിൽ 3 തവണ നവീകരണം നടത്തിയെങ്കിലും എല്ലാം പാളിപ്പോയിരുന്നു.

ഓരോ തവണയും വാഹനമിടിച്ചു തകരുകയായിരുന്നു. ഡിവൈഡറുകൾ തകർന്നതോടെയാണ് ജംക്‌ഷൻ നവീകരണം ശാസ്ത്രീയമായി നടത്താൻ തീരുമാനിച്ചത്. നവീകരണത്തിനായി ഡിസൈൻ തയാറാക്കാൻ പിഡബ്ല്യുഡി നാറ്റ്പാക്കിനെ സമീപിച്ചിരുന്നെങ്കിലും നടപടിയായില്ല. തുടർന്ന് പിഡബ്ല്യുഡി റോഡ് വിഭാഗം ശാസ്ത്രീയമായി പഠനം നടത്തി ഡിസൈൻ ജോലി ചെയ്യാൻ സ്വകാര്യ ഏജൻസിക്കു ടെൻഡർ നൽകി. ട്രാഫിക് സെൻസസ് നടത്തിയ ശേഷമാണ് ഡിസൈൻ തയാറാക്കിയത്.

…