ബൈക്ക് മതിലിൽ ഇടിച്ചുകയറി സുഹൃത്തുക്കൾക്ക് ദാരുണാന്ത്യം

മുണ്ടക്കയം ∙ സുഹൃത്തിന്റെ പിറന്നാൾ ആഘോഷത്തിനിടെയുള്ള യാത്രയ്ക്കിടെ 2 യുവാക്കൾ ബൈക്കപകടത്തിൽ മരിച്ചു. പാർഥസാരഥി അമ്പലം ഭാഗത്തു കല്ലുതൊട്ടി പുരയിടം അരുൺ (25), ചെറുതോട്ടയിൽ അഖിൽ (24) എന്നിവരാണു മരിച്ചത്. ഇന്നലെ ഉച്ചയ്ക്ക് ഒന്നോടെ മുണ്ടക്കയം – കോരുത്തോട് റൂട്ടിൽ വണ്ടൻപതാൽ മൂന്നുസെന്റ് നഗറിലായിരുന്നു സംഭവം.അരുണും അഖിലും ബൈക്കിലും മറ്റു കൂട്ടുകാർ 2 കാറുകളിലുമായി കോരുത്തോടു ഭാഗത്തേക്കു പോവുകയായിരുന്നു. ഒരു കാറിനെ മറ്റൊരു കാർ മറികടക്കുന്നതിനിടെ, അതിനെ മറികടന്നു കയറിയ ബൈക്കിന്റെ ഫുട്‌റെസ്റ്റ് കാറിന്റെ ടയറിൽ തട്ടി നിയന്ത്രണംതെറ്റുകയായിരുന്നുവെന്നു പൊലീസ് പറഞ്ഞു.

കാറിന്റെ ടയറും ഇതേസമയത്തു പൊട്ടി. നിയന്ത്രണം വിട്ട ബൈക്ക് സമീപത്തെ മതിലിലേക്ക് ഇടിച്ചുകയറി മറിയുകയായിരുന്നു.ഉടൻ നാട്ടുകാർ ആശുപത്രിയിൽ എത്തിച്ചെങ്കിലും രക്ഷിക്കാനായില്ല.കല്ലുതൊട്ടി പുരയിടം അനിൽ കുമാർ – സജിത ദമ്പതികളുടെ മകനാണ് അരുൺ. സഹോദരി: അനഘ. ചെറുതോട്ടയിൽ പരേതനായ അനിയൻ – ജോളി ദമ്പതികളുടെ ഏക മകനാണ് അഖിൽ. അടുത്തടുത്ത വീടുകളിൽ താമസിക്കുന്ന ഇരുവരും ചെറുപ്പം മുതൽ സുഹൃത്തുക്കളായിരുന്നു. ഇരുവരുടെയും സംസ്കാരം ഇന്നു നടത്തും.