കോട്ടയം – കോഴഞ്ചേരി പാതയിൽ ബസുകളുടെ മത്സരയോട്ടം

കറുകച്ചാൽ ∙ കോട്ടയം – കോഴഞ്ചേരി റൂട്ടിലെ ബസുകളുടെ മത്സരയോട്ടം അപകടങ്ങൾക്കിടയാക്കുന്നു. കറുകച്ചാൽ മുതൽ പുതുപ്പള്ളി വരെയുള്ള ഭാഗത്താണ് അപകടങ്ങൾ കൂടുതലും.

കാൽനടക്കാരും ചെറുവാഹനയാത്രക്കാരും  ഭയന്നാണ് ഇതുവഴി പോകുന്നത്. മത്സരയോട്ടം മൂലം ബസ് യാത്രക്കാരും ഭീതിയിലാണ്.

കഴിഞ്ഞ ദിവസം.സൊസൈറ്റിയിൽ പാൽ കൊടുക്കുന്നതിനായി റോഡ് കുറുകെ കടക്കുന്നതിനിടയിൽ സ്വകാര്യ ബസിടിച്ച് ക്ഷീര കർഷകൻ തോട്ടയ്ക്കാട് അമ്പലക്കവല ചൊറിക്കാവുങ്കൽ പി.സി.ജോസഫ് (74) മരിച്ചിരുന്നു. കോട്ടയം – കോഴഞ്ചേരി റോഡിൽ തൊമ്മച്ചേരിയിലായിരുന്നു അപകടം.

കറുകച്ചാലിൽ നിന്നു കോട്ടയത്തേക്ക് പോയ ബസ് ആണ് അപകടം ഉണ്ടാക്കിയത്.മത്സരയോട്ടത്തെ തുടർന്ന് 2 മാസം മുൻപ് മല്ലപ്പള്ളിയിൽ സ്വകാര്യ ബസ് കെഎസ്ആർടിസി ബസിന്റെ പിന്നിൽ ഇടിപ്പിച്ച സംഭവമുണ്ടായി.
സമയം പാലിക്കാതെ നിരത്തിലിറങ്ങുന്ന ബസുകൾ അമിത വേഗത്തിലാണ് പായുന്നത്. ഒരു ബസ് സ്റ്റോപ്പിൽ നിർത്തിയാൽ പിന്നാലെ വരുന്ന ബസ് നിർത്താതെ പോകുകയോ യാത്രക്കാരെ മുന്നിലേക്ക് മാറ്റി ഇറക്കുകയോ ചെയ്യും.

വളവുകളിൽ പോലും വാഹനങ്ങളെ മറികടക്കുന്നത് പതിവാണ്. ബസ് സ്റ്റാൻഡുകളിൽ സമയം സംബന്ധിച്ച് തർക്കവും ബഹളവും പതിവാണ്.

കോട്ടയം – കോഴഞ്ചേരി റോഡിൽ കെഎസ്ആർടിസി ചെയിൻ സർവീസ് ആരംഭിച്ച കാലം മുതലാണ് മത്സര ഓട്ടം തുടങ്ങിയത്. യാത്രക്കാരാണ് ബസുകളുടെ മത്സര ഓട്ടത്തിൽ ബുദ്ധിമുട്ടുന്നത്.

കഴിഞ്ഞമാസം നെത്തല്ലൂരിൽ ബസ് കാത്തിരിപ്പ് കേന്ദ്രത്തിൽ നിർത്തിയ ബസിനെ മറികടക്കുമ്പോൾ കെഎസ്ആർടിസി ബസ് ഉരസിയിരുന്നു. കഴിഞ്ഞ ദിവസം കറുകച്ചാൽ ബസ് സ്റ്റാൻഡിൽ വച്ച് കോട്ടയത്തേക്ക് പോയ സ്വകാര്യ ബസും കെഎസ്ആർടിസി ബസും തമ്മിൽ ഉരസി.

ഒന്നരമാസം മുൻപ് കറുകച്ചാൽ ബസ്റ്റാൻഡിൽ കെഎസ്ആർടിസി ഡ്രൈവറെ സ്വകാര്യ ബസ് കണ്ടക്ടർ മർദിച്ചു.
ഒരേ സമയത്ത് പല ബസുകൾ
കോട്ടയത്തു നിന്നു കോഴഞ്ചേരിയിലേക്കു ഒരേ സമയത്ത് പുറപ്പെടുന്ന സ്വകാര്യ ബസുകളും കെഎസ്ആർടിസി ബസുകളുമുണ്ട്. വിവിധ റൂട്ടുകളിൽ നിന്നു കറുകച്ചാൽ ബസ് സ്റ്റാൻഡിൽ എത്തുന്ന ബസുകളുമുണ്ട്.

ഇവയെല്ലാം ഒന്നിച്ച് നിരത്തിൽ ഇറങ്ങുന്നതോടെ ആളെ കയറ്റാനായി മത്സരിച്ച് ഓടും. നാലോ അഞ്ചോ മിനിറ്റ് വ്യത്യാസത്തിൽ പുറപ്പെടുന്ന ബസുകളാണ് പലതും.

മത്സരയോട്ടവും തർക്കവും പതിവാണ്. കെഎസ്ആർടിസി ബസ് ജീവനക്കാരെ സ്വകാര്യ ബസ് ജീവനക്കാർ ഭീഷണിപ്പെടുത്തിയതിന് മല്ലപ്പള്ളി, കറുകച്ചാൽ, കോഴഞ്ചേരി പൊലീസ് സ്റ്റേഷനുകളിൽ പരാതികളുമുണ്ട്.

ഭീഷണി മൂലം ജീവനക്കാർ കോട്ടയം – കോഴഞ്ചേരി ചെയിൻ സർവീസ് ബസുകളിൽ ജോലി ചെയ്യാൻ മടിക്കുന്നതായി കെഎസ്ആർടിസി അധികൃതർ പറയുന്നു. … FacebookTwitterWhatsAppTelegram