സാൽവേജ് ഓപ്പറേഷൻ:വിദഗ്ധസംഘത്തിന്റെ ഇമിഗ്രേഷൻ പൂർത്തിയായി: ‘സതേൺ നോവ’ കപ്പൽ കൊല്ലം തീരത്തെത്തി

കൊല്ലം∙ കേരളതീരത്തെ പുറംകടലിൽ മുങ്ങിയ എംഎസ്‌സി എൽസ 3 കപ്പലിലെ ഇന്ധനവും മറ്റു സാധനങ്ങളും നീക്കുന്നതിന്റെ ചുമതലയുള്ള ‘സതേൺ നോവ’ എന്ന ലൈബീരിയൻ കപ്പൽ ഇന്നലെ രാവിലെ കൊല്ലം തീരത്തെത്തി. ഏറെ നാളുകൾക്കു ശേഷമാണ് ഒരു വിദേശ കപ്പൽ തീരത്തെത്തുന്നത്.

വിദേശികളടക്കം 65 പേരടങ്ങിയ വിദഗ്ധ സംഘത്തെ സാൽവേജ് പ്രവർത്തനങ്ങൾക്കായി (രക്ഷാദൗത്യം) എംഎസ്‌സി എൽസയുടെ സമീപത്തെത്തിക്കുന്നതിനാണ് സതേൺ നോവയെത്തിയത്. കപ്പലിലെ ക്രൂ മെമ്പേഴ്സിന്റെയും വിദഗ്ധ സംഘത്തിന്റെയും ഇമിഗ്രേഷൻ നടപടികളും കപ്പലിലെ കസ്റ്റംസ് പരിശോധനകളും പൂർത്തിയായി.

കാലാവസ്ഥ അനുകൂലമാണെങ്കിൽ 2 ദിവസത്തിനുള്ളിൽ കപ്പൽ കൊല്ലം തീരത്തു നിന്നു പുറപ്പെടും. കൊല്ലം തുറമുഖം കേന്ദ്രീകരിച്ച് രക്ഷാപ്രവർത്തനം നടത്താൻ ഡയറക്ടർ ഓഫ് ഷിപ്പിങ് ആണ് അനുമതി നൽകിയത്.

മുങ്ങിയ കപ്പലിന്റെ ടാങ്കുകളിൽ നിന്നു ഇന്ധനം നീക്കിയതിനു ശേഷം കണ്ടെയ്നറുകൾ നീക്കം ചെയ്യാനാണ് ലക്ഷ്യമിടുന്നത്. മുങ്ങിയ കപ്പലിൽ നിന്നു പുറത്തെടുക്കുന്ന വസ്തുക്കൾ കൊല്ലം തീരത്തെത്തിക്കും.
കഴിഞ്ഞ ഞായറാഴ്ച രാവിലെ വിദഗ്ധ സംഘത്തിലെ 10 പേർ ‘കാനറ മേഘ്’ ടഗ്ഗിൽ എൽസ 3 കപ്പലിനു സമീപത്തെത്തിയെങ്കിലും കടൽ പ്രക്ഷുബ്ധമായതിനാൽ അന്ന് രാത്രി തന്നെ കൊല്ലം തീരത്തേക്ക് മടങ്ങിയെത്തിയിരുന്നു.

ഞായറാഴ്ച അർധരാത്രിയോടെ ‘ഓഫ്ഷോർ മൊണാർക്’ എന്ന ടഗ് രക്ഷാപ്രവർത്തനത്തിനായി കൊല്ലം തീരത്തെത്തി. തുടർന്നു തിങ്കളാഴ്ച രാവിലെ ഓഫ്ഷോർ മൊണാർക്കിൽ പത്തംഗ സംഘം വീണ്ടും മുങ്ങിയ കപ്പലിനരികിലെത്തിയെങ്കിലും കാലാവസ്ഥ അനുകൂലമല്ലാത്തതിനാൽ സാൽവേജ് പ്രവർത്തനങ്ങൾ നടന്നില്ല.

നിലവിൽ കപ്പൽ മുങ്ങിയ സ്ഥലത്തെ എണ്ണപ്പാട കണ്ടെത്തുന്നതിനായി കാനറ മേഘ് ടഗ് 24 മണിക്കൂർ നിരീക്ഷണം നടത്തുന്നുണ്ട്.

ഓഫ്ഷോർ മൊണാർക് ടഗ്ഗും സതേൺനോവയോടൊപ്പം രക്ഷാപ്രവർത്തനത്തിൽ ഏർപ്പെടും. മെർക് എന്ന കമ്പനിയാണ് സാൽവേജ് ഓപ്പറേഷനു നേതൃത്വം നൽകുന്നത്.

സത്യം ഷിപ്പിങ് ആൻഡ് ലോജിസ്റ്റിക്സ് പ്രൈവറ്റ് ലിമിറ്റഡാണ് കൊല്ലം പോർട്ട് ഏജന്റ്.
സാൽവേജ് പ്രവർത്തനങ്ങളിൽ പങ്കാളികളാകാൻ മലയാളികളും
അമേരിക്ക, സിംഗപ്പൂർ, ഓസ്ട്രേലിയ, നെതർലൻഡ്സ്, ഫിലിപ്പീൻസ്, തായ്‌ലൻഡ്, ഇന്തൊനീഷ്യ, മ്യാൻമർ, സിംഗപ്പൂർ, മലേഷ്യ, ബൽജിയം, തെക്കേ ആഫ്രിക്ക, ബൾഗേറിയ, യുകെ, ജപ്പാൻ എന്നീ വ്യത്യസ്ത രാജ്യങ്ങളിൽ നിന്നുള്ള 65 പേരാണ് സാൽവേജ് പ്രവർത്തനങ്ങൾക്കെത്തിയിരിക്കുന്നത്. 8 ഇന്ത്യക്കാർ രക്ഷാപ്രവർത്തനങ്ങളുടെ ഭാഗമാകും.

ഇവരിൽ പാലക്കാട്, കോഴിക്കോട് സ്വദേശികളായ മലയാളികളും ഉൾപ്പെടുന്നു. എൻജിനീയർ, സൂപ്പർവൈസേഴ്സ്, ടെക്നിഷ്യൻസ് എന്നിവർക്കു പുറമേ കടലിന്റെ അടിത്തട്ടിലുള്ള കപ്പലിൽ നിന്ന് എണ്ണ സുരക്ഷിതമായി ഊറ്റിയെടുക്കുന്നത് അടക്കമുള്ള പ്രവർത്തനങ്ങൾ നടത്തുന്ന സാച്ചുറേഷൻ ഡൈവിങ് വിദഗ്ധരും രക്ഷാപ്രവർത്തന സംഘത്തിലുണ്ട്.

…