ആശ്വാസം; പരിയാരത്തെ കാർഡിയോളജി വിഭാഗത്തിൽ വാർഡ് തുറന്നു

പരിയാരം ∙ കണ്ണൂർ ഗവ. മെഡിക്കൽ കോളജ് ആശുപത്രിയിലെ കാർഡിയോളജി വിഭാഗത്തിലെ നവീകരണം പൂർത്തിയായ വാർഡ് തുറന്നുകൊടുത്തു.

സി ബ്ലോക്കിലെ വാർഡാണ് ഇന്നലെ കിടത്തിച്ചികിത്സയ്ക്കായി തുറന്നുകൊടുത്തത്. നവീകരണ പ്രവൃത്തിയുടെ മെല്ലെപ്പോക്കിൽ ആശുപത്രിയുടെ പ്രവർത്തനത്തെ പ്രതികൂലമായി ബാധിക്കുന്ന വാർത്ത കഴി‍ഞ്ഞ ദിവസം മലയാള മനോരമ പ്രസിദ്ധീകരിച്ചു.അതേസമയം, മറ്റു പല വാർഡുകളും നവീകരണത്തിനായി അടച്ചിട്ട് വർഷങ്ങളായി.

അതിനാൽ കിടത്തിച്ചികിത്സ നടത്താൻ സാധിക്കാത്ത അവസ്ഥയാണ്. പല പ്രവൃത്തിയും പാതിവഴിയിലാണ്.
കിഫ്ബി പദ്ധതിയിൽ 40 കോടി രൂപ ചെലവിട്ടു 3 വർഷം മുൻപ് തുടങ്ങിയ നവീകരണമാണു നീണ്ടു കൊണ്ടുപോകുന്നത്.

അത്യാഹിത വിഭാഗത്തിന്റെ പണി പൂർത്തിയാക്കാത്തതിനാൽ നാലാം നിലയിലെ മറ്റൊരു ചികിത്സാ വാർ‌ഡാണ് അത്യാഹിത വിഭാഗമായി ഉപയോഗിക്കുന്നത്. 7, 8 നിലകളിലെ പല വാർഡിലെയും നവീകരണവും പൂർത്തിയായിട്ടില്ല.

ഒരേസമയം 8 ശസ്ത്രക്രിയ നടത്താൻ സൗകര്യമുള്ള ഓപ്പറേഷൻ തിയറ്ററിന്റെ പലഭാഗങ്ങളും നവീകരണത്തിന്റെ അടച്ചതിനാൽ ഇപ്പോൾ 2 ശസ്ത്രക്രിയ ഒരേസമയം നടത്താനാകുന്നുള്ളൂ.പ്രതിദിനം 100 ഡയാലിസിസ് നടത്തുന്ന കേന്ദ്രവും നവീകരണത്തിനായി അടച്ചിട്ടതിനാൽ അത്യാവശ്യമുള്ള ഡയാലിസിസ് മാത്രമേ നടക്കുന്നുള്ളൂ. …