എന്തൊരു അനാസ്ഥ: വൈദ്യുത ലൈൻ നിലത്ത് വീണിട്ടും നടപടിയില്ല

തൊടുപുഴ ∙ കറുക – കുമാരമംഗലം റോഡിൽ വൈദ്യുത ലൈൻ നിലത്ത് വീണിട്ടും അധികൃതർക്ക് അനക്കമില്ല. സ്കൂൾ ബസുകൾ ഉൾപ്പെടെ ഒട്ടേറെ വാഹനങ്ങൾ സഞ്ചരിക്കുന്ന റോഡിലാണ് അധികൃതരുടെ ഈ അനാസ്ഥ.

അപകടകരമായ വൈദ്യുത ലൈനുകൾ കാരണം മനുഷ്യജീവനുകൾ പൊലിഞ്ഞിട്ടും ഇത്തരം കാഴ്ചകൾക്കു യാതൊരു കുറവുമില്ല. റോഡിന്റെ ഇരുഭാഗത്തും ഒട്ടേറെ വീടുകളുമുണ്ട്. അതേസമയം രാത്രിയിൽ ലൈൻ വീണുകിടക്കുന്നത് പെട്ടെന്ന് ശ്രദ്ധയിൽപെടില്ല എന്നതാണ് കൂടുതൽ അപകടം.
ഇങ്ങനെ കിടന്നിട്ടും കെഎസ്ഇബി അധികൃതർ ലൈൻ ഉയർത്തി സ്ഥാപിക്കാൻ തയാറായിട്ടില്ല. നഗരത്തിലെ മിക്കയിടങ്ങളിലും ഇതുപോലെ വൈദ്യുതി ലൈനുകൾ താഴ്ന്നും നിലത്തു വീണും കിടക്കുന്നത് പതിവുകാഴ്ചയാണ്.

മഴക്കാലത്തിന് മുൻപ് ഇത്തരം അപകടകരമായ ലൈനുകൾ ശരിയാക്കണമെന്നു കർശന നിർദേശം ഉണ്ടായിട്ടും പാലിക്കപ്പെടാറില്ല എന്നുമാത്രം. വീണു കിടക്കുന്ന വൈദ്യുത ലൈൻ എത്രയും വേഗം ഉയർത്തി സ്ഥാപിച്ച് അപകടഭീഷണി ഒഴിവാക്കണമെന്നാണ് നാട്ടുകാരുടെ ആവശ്യം.

…