ടോറസ് ലോറി പതിച്ച് വീടു തകർന്നു; ലോറി എത്തിയത് റോഡ് കോൺക്രീറ്റ് ചെയ്യാൻ തമിഴ്നാട്ടിൽ നിന്നു മെറ്റലുമായി

നെടുങ്കണ്ടം ∙ നിയന്ത്രണം നഷ്ടപ്പെട്ട ടോറസ് ലോറി പതിച്ച് വീടു തകർന്നു, ഒഴിവായത് വൻ ദുരന്തം.

നെടുങ്കണ്ടം- താന്നിമൂട് സ്വദേശി അബ്ദുൽ റസാഖിന്റെ വീടിനു മുകളിലേക്കാണ് മെറ്റൽ കയറ്റി വന്ന ലോറി വീണത്.   അപകടസമയം വീട്ടിൽ ആളുകൾ ഇല്ലാതിരുന്നതിനാൽ വൻ ദുരന്തം ഒഴിവായി. വെള്ളിയാഴ്ച രാവിലെ 9:15 നാണ് അപകടം.

താന്നിമൂട്- പത്തിനിപ്പാറ റോഡിൽ കൊരട്ടിപ്പടിക്ക് സമീപമാണ് അപകടം. ഇതേ റോഡിന്റെ ഒരു ഭാഗം കോൺക്രീറ്റ് ചെയ്യുന്നതിനായി തമിഴ്നാട്ടിൽ നിന്നു മെറ്റലുമായി എത്തിയതായിരുന്നു വാഹനം.
കുത്തുകയറ്റം കയറി വന്ന ലോറി നിയന്ത്രണം നഷ്ടപ്പെട്ട് പിന്നോട്ടുരുളുകയായിരുന്നു.

ഷീറ്റിട്ട വീടിന്റെ ഒരു ഭാഗം പൂർണമായും തകർന്നു.

15 ലക്ഷത്തിലധികം രൂപയുടെ നാശനഷ്ടമുണ്ടായതായി വീട്ടുടമ പറഞ്ഞു.  അപകടശേഷമാണ് അബ്ദുൽ റസാഖ് വീട്ടിലെത്തിയത്. ഭാര്യ ജോലിക്കും കുട്ടികൾ വിദ്യാലയത്തിലേക്കും പോയിരുന്നു.

റോഡ് നിർമാണ കരാറുകാരനും ലോറി ഉടമയും ചേർന്ന് വീട് നിർമിച്ചു നൽകാമെന്നറിയിച്ചതായി വീട്ടുടമ പറഞ്ഞു. വാഹനം ഓടിച്ച തമിഴ്നാട് സ്വദേശിക്ക് നിസ്സാര പരുക്കേറ്റു.

… FacebookTwitterWhatsAppTelegram