തെരുവുനായ്ക്കളെ കൊന്ന് കുഴിച്ചുമൂടിയെന്ന ആരോപണം; 4 നായ്ക്കളുടെ ജഡം കണ്ടെത്തി

മൂന്നാർ ∙ ടൗണിൽ അലഞ്ഞുതിരിഞ്ഞു നടക്കുന്ന തെരുവുനായ്ക്കളെ മൂന്നാർ പഞ്ചായത്തിന്റെ ഒത്താശയോടെ പിടികൂടി കൊന്നു കുഴിച്ചുമൂടി എന്ന ആരോപണം നിലനിൽക്കെ നല്ലതണ്ണി കല്ലാറിൽ നിന്നു 4 നായ്ക്കളുടെ ജഡം പൊലീസ് പരിശോധനയിൽ കണ്ടെത്തി. വെറ്ററിനറി സർജൻമാരുടെ നേതൃത്വത്തിൽ പോസ്റ്റ്മോർട്ടം നടത്തി.

ആന്തരികാവയവങ്ങളുടെ പരിശോധനാഫലം ലഭിച്ച ശേഷമേ മരണകാരണം പറയാനാകൂ എന്ന് അന്വേഷണ ഉദ്യോഗസ്ഥനായ മൂന്നാർ എസ്എച്ച്ഒ ബിനോദ് കുമാർ പറഞ്ഞു.
മാലിന്യ പ്ലാന്റിനു സമീപം മണ്ണിളകിയ നിലയിൽ കണ്ട സ്ഥലത്ത്‌ എട്ടടിയിലധികം ആഴത്തിൽ മണ്ണു നീക്കിയായിരുന്നു പരിശോധന.

പഞ്ചായത്തധികൃതരുടെ ഒത്താശയോടെ മൂന്നാറിലെ തെരുവുനായ്ക്കളെ കൂട്ടത്തോടെ പിടികൂടി മാലിന്യപ്ലാന്റിനു സമീപം കൊന്നു കുഴിച്ചു മൂടിയെന്നാരോപിച്ച് അനിമൽ റെസ്ക്യു ടീമംഗം എം.എ.കീർത്തീദാസ് കഴിഞ്ഞ ദിവസം പരാതി നൽകിയിരുന്നു. പൊലീസ് നടത്തിയ പരിശോധനയിൽ പഞ്ചായത്തിന്റെ പിക്കപ് വാൻ പിടിച്ചെടുത്തിരുന്നു.
എന്നാൽ, ടൗണിന്റെ പരിസര പ്രദേശങ്ങളിൽ ചത്ത നിലയിൽ കണ്ടെത്തിയ നായ്ക്കളെയാണു കുഴിച്ചിട്ടതെന്നു പഞ്ചായത്തധികൃതർ പറഞ്ഞു.

…