മാരിയിൽക്കടവ് പാലം അപ്രോച്ച് റോഡ് നിർമാണത്തിന് തുടക്കം; ഒടുവിൽ ശുഭവാർത്ത

തൊടുപുഴ ∙ ഒൻപതു വർഷത്തെ കാത്തിരിപ്പിനൊടുവിൽ മാരിയിൽക്കടവ് പാലത്തിന്റെ കാഞ്ഞിരമറ്റം ഭാഗത്തെ അപ്രോച്ച് റോഡിന്റെ നിർമാണ പ്രവർത്തനങ്ങൾ ഇന്നലെ ആരംഭിച്ചു. കാഞ്ഞിരമറ്റം ഉൾപ്പെടുന്ന നഗരത്തിന്റെ കിഴക്കൻ പ്രദേശത്തെ ജനങ്ങളുടെ ചിരകാല അഭിലാഷമാണ് അപ്രോച്ച് റോഡ് നിർമാണത്തിലൂടെ പൂർത്തിയാകുന്നത്. മുൻ യുഡിഎഫ് സർക്കാരിന്റെ കാലത്ത് 5.27 കോടി രൂപ അനുവദിച്ച് തൊടുപുഴയാറിനു കുറുകെ മാരിയിൽക്കടവിൽ പാലം പണിതെങ്കിലും ഇരുവശത്തുമുള്ള അപ്രോച്ച് റോഡിന്റെ പണികൾ നടത്തിയിരുന്നില്ല.

മാരിയിൽകലുങ്ക് ഭാഗത്തുനിന്ന് പാലം വരെയുള്ള ഭാഗത്ത് അപ്രോച്ച് റോഡ് നിർമാണത്തിന് പി.ജെ.ജോസഫ് എംഎൽഎ ഫണ്ടിൽനിന്ന് 1.98 കോടി രൂപ അനുവദിച്ചിരുന്നു. ഇതുപയോഗിച്ച് ആ ഭാഗത്തെ അപ്രോച്ച് റോഡിന്റെ പണികൾ പൂർത്തിയാക്കിയിട്ടുണ്ട്.അതേ സമയം കാഞ്ഞിരമറ്റം ഭാഗത്തെ അപ്രോച്ച് റോഡിന്റെ പണികൾ ആരംഭിക്കാൻ സാധിച്ചിരുന്നില്ല. പാലം പണി പൂർത്തിയാക്കിയപ്പോൾ മിച്ചമുണ്ടായിരുന്ന ഒരു കോടിയോളം രൂപ കാഞ്ഞിരമറ്റം ഭാഗത്തെ അപ്രോച്ച് റോഡിന്റെ നിർമാണത്തിനായി ഉപയോഗിക്കാൻ ധാരണയായെങ്കിലും വർഷങ്ങൾ പലതു കഴിഞ്ഞിട്ടും നിയമത്തിന്റെ നൂലാമാലകളിൽപെട്ട് ഇഴയുകയായിരുന്നു.

പിന്നീട് പി.ജെ.ജോസഫ് എംഎൽഎ ഇതിനായി നിയമസഭയിൽ പ്രശ്നം ഉന്നയിച്ചിരുന്നു. പിന്നീട് അപ്രോച്ച് റോഡ് നിർമാണത്തിന് അനുമതി ആയെങ്കിലും വീണ്ടും പണികൾ ആരംഭിക്കാൻ വൈകി. ഇതെ തുടർന്ന് ഉന്നത ഉദ്യോഗസ്ഥരെ പങ്കെടുപ്പിച്ച് 2 തവണ എംഎൽഎ‍യുടെ നേതൃത്വത്തിൽ യോഗം ചേർന്നതിനു ശേഷമാണ് റോഡിന്റെ പണികൾ ആരംഭിക്കാനായത്. പാലം നിർമിച്ച മൂവാറ്റുപുഴ മേരിമാത കമ്പനിയാണ് ഇപ്പോൾ അപ്രോച്ച് റോഡിന്റെയും പണികൾ നടത്തുന്നത്. 2 മാസത്തിനുള്ളിൽ ഗതാഗതയോഗ്യമാക്കാനുളള ശ്രമത്തിലാണ് അധികൃതർ.

കാഞ്ഞിരമറ്റം  മേഖലയുടെ വികസനം 
പാലം പണിത് വർഷങ്ങൾ കഴിഞ്ഞിട്ടും അപ്രോച്ച് റോഡ് ഇല്ലാത്തതിനാൽ പാലത്തിന്റെ പ്രയോജനം ലഭിക്കാത്ത കാഞ്ഞിരമറ്റം മേഖലയ്ക്ക് പുതിയ അപ്രോച്ച് റോഡ് പൂർത്തിയാകുന്നതോടെ വലിയ വികസന മുന്നേറ്റത്തിനു നാന്ദിയാകുമെന്ന പ്രതീക്ഷയിലാണ് നാട്ടുകാർ. പാലം പണി കഴിഞ്ഞപ്പോൾ തന്നെ ഇരു ഭാഗത്തുമുള്ള സ്ഥലം അപ്രോച്ച് റോഡിനായി ഏറ്റെടുക്കാൻ 10 കോടി രൂപ അനുവദിച്ചിരുന്നു. ഇതിനിടെ ചില കേസുകളുമുണ്ടായി. ഇതെല്ലാം സെറ്റിൽ ചെയ്താണ് പുതിയ അപ്രോച്ച് റോഡ് യാഥാർഥ്യമാകുന്നത്. 

ജില്ലയിലെ തന്നെ പ്രമുഖ ശിവ ക്ഷേത്രമായ കാഞ്ഞിരമറ്റം മഹാദേവ ക്ഷേത്രത്തിൽ എത്തിച്ചേരുന്ന ആയിരക്കണക്കിനു ഭക്തർക്ക് പാലം വലിയ അനുഗ്രഹമാകും. നഗരത്തിൽനിന്ന് നിലവിലുള്ള വീതി കുറഞ്ഞ റോഡിലൂടെ കാഞ്ഞിരമറ്റത്ത് എത്തുന്നതിനെക്കാൾ വളരെ എളുപ്പം മൂലമറ്റം റോഡിൽ നിന്ന് ക്ഷേത്രത്തിലേക്ക് എത്താൻ സാധിക്കും. കൂടാതെ കാഞ്ഞിരമറ്റം കീരികോട്, തെക്കുംഭാഗം മേഖലകളിലേക്കുള്ള യാത്രക്കാർക്കും പുതിയ റോഡ് ഏറെ അനുഗ്രഹമാകും.

കാരിക്കോട് –ചുങ്കം ബൈപാസ് 
ഇപ്പോൾ നിർമാണം നടക്കുന്ന കാഞ്ഞിരമറ്റം അപ്രോച്ച് റോഡിന്റെ നിർമാണം പൂർത്തിയാകുന്നതിനു ശേഷം കാഞ്ഞിരമറ്റം ഭാഗത്തുനിന്ന് കാരിക്കോടിനും മാരിയിൽകലുങ്ക് ഭാഗത്തുനിന്ന് ചുങ്കം ഭാഗത്തേക്കും ബൈപാസ് നിർമിക്കാനും ലക്ഷ്യമിടുന്നു. കാരിക്കോട്ടുനിന്ന് മുതലിയാർമഠം ഭാഗത്തുകൂടി കാഞ്ഞിരമറ്റത്ത് എത്തി അവിടെനിന്ന് മാരിയിൽ കലുങ്ക് ഭാഗത്തുനിന്ന് ഡിവൈൻ മേഴ്സി ഷ്റൈൻ റോഡ് വഴി ചുങ്കത്തേക്ക് ബൈപാസ് നിർമിക്കാനാണ് ലക്ഷ്യമിടുന്നത്.

ഇത് നഗരത്തിലെ തന്നെ ഗതാഗത സൗകര്യം കുറഞ്ഞ മേഖലകളിലെ ജനങ്ങൾക്ക് വലിയ അനുഗ്രഹമാകും. മാത്രമല്ല നിലവിൽ അഞ്ചോളം ബൈപാസുകൾ നിർമിച്ച് തൊടുപുഴ നഗരത്തിന്റെ വികസനം ശരവേഗത്തിലാക്കിയ പദ്ധതിയുടെ തുടർച്ചയായി നിർദിഷ്ട കാരിക്കോട് ചുങ്കം ബൈപാസും മാറുമെന്നാണ് പ്രതീക്ഷ.