അനധികൃത നിലം നികത്തൽ; 4 ലോറിയും 2 മണ്ണുമാന്തി യന്ത്രവും പിടികൂടി

മാന്നാർ ∙ ഇരുട്ടിന്റെ മറവിൽ അനധികൃതമായി നിലം നികത്തുന്നതിനിടയിൽ 4 ലോറിയും 2 മണ്ണുമാന്തി യന്ത്രവും മാന്നാർ പൊലീസ് പിടികൂടി.മാന്നാർ കോയിക്കൽ ജംക്‌ഷനു പടിഞ്ഞാറുള്ള ചെന്നിത്തല പഞ്ചായത്ത് പരിധിയിലുള്ള നിലമാണ് കഴിഞ്ഞ ഒരാഴ്ചയായി രാത്രിയിൽ പതിവായി നികത്തിയത്.ഇതിനെതിരെ പരാതിയുയർന്നെങ്കിലും നടപടിയുണ്ടായില്ല.

കഴിഞ്ഞ ദിവസം ചെങ്ങന്നൂർ ഡിവൈഎസ്പിക്കു ലഭിച്ച രഹസ്യ വിവരത്തിന്റെ അടിസ്ഥാനത്തിൽ മാന്നാർ പൊലീസ് നടത്തിയ പരിശോധനയിലാണ് മണ്ണു കയറ്റി വന്ന 4 ടോറസ് ലോറിയും മണ്ണു നികത്തുന്നതിനായി കൊണ്ടുവന്ന 2 മണ്ണുമാന്തി യന്ത്രവും (ജെസിബി) പൊലീസ് പിടിച്ചെടുത്തത്.റവന്യു അധികൃതരുമായി ബന്ധപ്പെട്ടു നടത്തിയ പരിശോധനയിൽ നികത്തിയ ഭാഗം നിലമാണെന്നും കണ്ടെത്തിയിട്ടുണ്ട്. നിലമുടമകൾക്കെതിരെ പൊലീസ് കേസെടുത്തു.പിടിച്ചെടുത്ത ആറു വലിയ വാഹനങ്ങളും മാന്നാർ പൊലീസ് സ്റ്റേഷൻ വളപ്പിൽ സൂക്ഷിച്ചിരിക്കുകയാണ്.