അരൂർ – തുറവൂർ ഉയരപ്പാത: കാലവർഷത്തിനു മുൻപ് കാന പൂർത്തിയായില്ലെങ്കിൽ വെള്ളക്കെട്ടിനു സാധ്യത

തുറവൂർ ∙ അരൂർ – തുറവൂർ ഉയരപ്പാത നിർമാണം നടക്കുന്ന 12.75 കിലോമീറ്ററിൽ കാനയുടെ നിർമാണം കാലവർഷത്തിനു മുൻപ് പൂർത്തിയായില്ലെങ്കിൽ വെള്ളക്കെട്ടിനും വൻ ഗതാഗതക്കുരുക്കിനും സാധ്യത. കുത്തിയതോട്, കോടംതുരുത്ത്, എഴുപുന്ന, അരൂർ എന്നീ 4 പഞ്ചായത്ത് പരിധിയിലൂടെയാണ് ഉയരപ്പാത പോകുന്നത്. അരൂർ പഞ്ചായത്തിൽ മാത്രം 6.5 കിലോമീറ്ററാണ് ഉയരപ്പാത.

ഉയരപ്പാതയുടെ കോൺക്രീറ്റ് ഗർ‍ഡറുകൾ കയറ്റുന്നതിനായി നാലുവരിപ്പാതയുടെ ഇരുവശങ്ങളിലും ലോഞ്ചിങ് ഗാൻട്രി സ്ഥാപിച്ചിരിക്കുന്നതിനാൽ പാതയോരത്തു നിന്നുള്ള പെയ്ത്തുവെള്ളം ഒഴുകിപ്പോകാൻ കഴിയില്ല. നിലവിൽ ഒരുമണിക്കൂർ തുടർച്ചയായി മഴ പെയ്താൽ അരൂർ മുതൽ ചന്തിരൂർ വരെയുള്ള പാതയിൽ മുട്ടൊപ്പം വെള്ളക്കെട്ടു രൂപപ്പെടും. അരൂർ ബൈപാസ് കവല മുതൽ ചന്തിരൂർ വരെയുള്ള 6.5 കിലോമീറ്റർ ഭാഗത്ത് അടിയന്തരമായി കാന നിർമാണം പൂർത്തിയാക്കണം.

അരൂർ മുതൽ തുറവൂർ വരെ പല ഭാഗങ്ങളിലായാണു കാന നിർമാണം നടക്കുന്നത്. എന്നാൽ പൊതു തോടുകളുമായി ബന്ധിപ്പിക്കാൻ കഴിഞ്ഞിട്ടില്ല. കാന ഇടത്തോടുകളിലേക്ക് ബന്ധിപ്പിക്കുന്നതിന് പഞ്ചായത്തുകൾ അനുമതി നൽകാത്തതാണ് ഇതിന് കാരണം. അരൂർ മുതൽ ചന്തിരൂർ വരെയുള്ള ഭാഗത്ത് അടിയന്തരമായി കാന നിർമാണം പൂർത്തിയാക്കണമെന്നാണ് നാട്ടുകാരുടെ ആവശ്യം.