കാനിലെ മലയാള ’കനി’

അമ്മ ഡോ. ജയശ്രീയെ ചേച്ചിയെന്നും അച്ഛനെ മൈത്രേയൻ എന്നു പേര് വിളിച്ചും സമൂഹത്തിൽ വേറിട്ട ചിന്തകളിലൂടെ ഇടംപിടിച്ചെടുത്തവർ. വർഷങ്ങൾക്ക് മുൻപ് നഗ്നമായ തന്റെ പുറംഭാഗത്തിന്റെ ചിത്രം ഫെയ്‌സ്ബുക്കിൽ പങ്കുവച്ച കനിക്ക്‌ നേരിടേണ്ടിവന്നത് അധിക്ഷേപത്തിന്റെ കൂരമ്പുകളായിരുന്നു. സ്വന്തം ശരീരഭാഗങ്ങളുടെ ചിത്രം പോസ്റ്റ് ചെയ്യാൻ ഞാനെന്തിന് നാണിക്കണം, മറ്റുള്ളവരുടെ സ്വാതന്ത്ര്യത്തെ ബഹുമാനിക്കാനാണ് മൈത്രേയനും ചേച്ചിയും പറഞ്ഞിട്ടുള്ളത്…. ഞാൻ ഇങ്ങനെയാണ്, എന്റെ ജീവിതം ഇപ്രകാരമാണ്. കനി ഉയർത്തിപ്പിടിച്ച നിലപാടിന്റെ രാഷ്ട്രീയത്തെ ഇന്ന് ലോകം പിന്തുണയ്ക്കുന്നു…ആഘോഷിക്കുന്നു.

‘ബിരിയാണി’ എന്ന സിനിമയിലെ അഭിനയത്തിന് സംസ്ഥാന അവാർഡ് ലഭിച്ചപ്പോൾ, മലയാളത്തിലെ ആദ്യനായിക പി.കെ.റോസിക്കാണ് അവർ പുരസ്‌കാരം സമർപ്പിച്ചത്. ഒരു സ്ത്രീ ഈ രംഗത്തേക്ക് കടന്നുവന്നിട്ട് വർഷങ്ങളേറെ കടന്നുപോയിട്ടും ജാതി, മത, വർഗ്ഗ, വർണ, വിവേചനം ഇന്നും നിലനിൽക്കുന്നു. അതിനാൽ പി.കെ.റോസിക്ക് ഈ പുരസ്‌കാരം സമർപ്പിക്കുന്നുവെന്നാണ് അന്നവർ പറഞ്ഞത്.

സ്‌കൂൾകുട്ടിയായിരുന്ന കാലത്ത് ലഘുനാടകങ്ങളിലൂടെ അഭിനയത്തിലേക്ക്. ‘കേരള കഫേ’ എന്ന ചിത്രത്തിലൂടെയാണ് സിനിമയിലെത്തുന്നത്. അവർ അഭിനയിച്ച ഏറെ വിവാദങ്ങളുണ്ടാക്കിയ ഹ്രസ്വചിത്രമായിരുന്നു ’മെമ്മറീസ് ഓഫ് എ മെഷീൻ’. ചിത്രം യുട്യൂബിൽ വന്നപ്പോൾ കടുത്ത സൈബർ ആക്രമണം നേരിട്ടു.

പായൽ കപാഡിയ സംവിധാനം ചെയ്ത ‘ഓൾ വി ഇമാജിൻ ആസ് ലൈറ്റ്’ എന്ന ചിത്രത്തിന്റെ ഭൂരിഭാഗവും മലയാളം സംഭാഷണങ്ങളാണ്. കേരളത്തിൽ നിന്നുള്ള രണ്ടു നഴ്‌സുമാരായ പ്രഭയുടെയും അനുവിന്റെയും കഥയാണ് ചിത്രത്തിലൂടെ അവതരിപ്പിക്കുന്നത്. നഗരത്തിലെ നഴ്‌സിങ്‌ ഹോമിലെത്തപ്പെട്ട ഇരുവരുടെയും ജീവിതത്തിലെ സംഭവങ്ങളാണ് ഇതിവൃത്തം. ശ്രീകാര്യം ചെറുവയ്ക്കലാണ് കനി കുസൃതിയുടെ വസതി. പട്ടം ഗവ.ഗേൾസ് ഹയർസെക്കൻഡറി സ്‌കൂൾ, സംസ്‌കൃത കോളേജ്, തൃശ്ശൂർ എൻ.എസ്.ഡി, പാരീസ് എന്നിവിടങ്ങളിലാണ് പഠനം പൂർത്തിയാക്കിയത്.