മലയാള സിനിമാ പ്രേക്ഷകർ ഏറെ ആകാംക്ഷയോടെ കാത്തിരിക്കുന്ന ചിത്രമാണ് എമ്പുരാൻ. മുരളി ഗോപിയുടെ രചനയിൽ പൃഥ്വിരാജ് സുകുമാരൻ സംവിധാനം ചെയ്യുന്ന ചിത്രം ലൈക്ക പ്രൊഡക്ഷൻസ്, ആശീർവാദ് സിനിമാസ് എന്നിവർ ചേർന്നാണ് നിർമിക്കുന്നത്. ഏതാനും ദിവസങ്ങൾക്കുമുൻപ് പുറത്തിറങ്ങിയ എമ്പുരാൻ ടീസറിനെ വാനോളം പുകഴ്ത്തിയിരിക്കുകയാണ് തെലുങ്ക് സൂപ്പർതാരം പ്രഭാസ്.
തന്റെ സോഷ്യൽ മീഡിയാ സ്റ്റോറിയിലാണ് പ്രഭാസ് എമ്പുരാൻ സിനിമയുടെ ടീസറിനെ അഭിനന്ദിച്ചിരിക്കുന്നത്. വേൾഡ് ക്ലാസ് എന്നാണ് പ്രഭാസ് ടീസറിന് നൽകിയിരിക്കുന്ന വിശേഷണം. L2E, എമ്പുരാൻ എന്നീ ഹാഷ്ടാഗുകളും അദ്ദേഹം നൽകിയിരിക്കുന്നു.
അതിഗംഭീരമായി എടുത്തുവെച്ചിരിക്കുന്നു. സംവിധാനംചെയ്തത് എന്റെ സ്വന്തം വരദ. അഭിനയിക്കുന്നത് ഒരേയൊരു മോഹൻലാൽ സാർ. എല്ലാ ടീമംഗങ്ങൾക്കും വിജയം നേരുന്നു എന്നും പ്രഭാസ് ചിത്രത്തിന്റെ പോസ്റ്ററിനൊപ്പം കുറിച്ചു. പൃഥ്വിരാജ് ഈ സ്റ്റോറിയുടെ സ്ക്രീൻഷോട്ട് പങ്കുവെച്ചിട്ടുണ്ട്. നന്ദി ദേവാ, നിങ്ങളെ ഉടൻ നേരിൽക്കാണും എന്നാണ് പൃഥ്വിരാജ് കുറിച്ചിരിക്കുന്നത്.
പ്രശാന്ത് നീൽ സംവിധാനം ചെയ്ത സലാർ എന്ന ചിത്രത്തിൽ പ്രഭാസും പൃഥ്വിരാജുമാണ് മുഖ്യവേഷങ്ങളിലെത്തിയത്. സലാറിൽ ഇരുവരും അവതരിപ്പിച്ച കഥാപാത്രങ്ങളാണ് ദേവയും വരദയും.
2019-ൽ ഇറങ്ങിയ സൂപ്പർഹിറ്റ് ചിത്രം ലൂസിഫറിന്റെ രണ്ടാംഭാഗമാണ് ‘എൽ2: എമ്പുരാൻ’. എട്ട് സംസ്ഥാനങ്ങളിലും നാല് രാജ്യങ്ങളിലുമായി 14 മാസം കൊണ്ടാണ് എമ്പുരാൻ ചിത്രീകരണം പൂർത്തിയാക്കിയത്. ചിത്രത്തിൽ മോഹൻലാൽ, പൃഥ്വിരാജ്, ടൊവിനോ എന്നിവർക്ക് പുറമേ മഞ്ജു വാര്യർ, സുരാജ് വെഞ്ഞാറമ്മൂട്, ഇന്ദ്രജിത്ത്, ഫാസിൽ, സാനിയ ഇയ്യപ്പൻ, നൈല ഉഷ, അർജുൻ ദാസ് തുടങ്ങി വമ്പൻ താരനിരയാണ് അണിനിരക്കുന്നത്. ഫ്രഞ്ച് നടൻ എറിക് എബൗനി, ബ്രിട്ടീഷ് നടി ആൻഡ്രിയ തിവദാർ എന്നിവർ ഉൾപ്പെടെയുള്ള വിദേശതാരങ്ങളും ചിത്രത്തിൽ എത്തുന്നുവെന്നാണ് വിവരം.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
