ഹൈദരാബാദ്: നടൻ അല്ലു അർജുനെതിരെ രൂക്ഷ വിമർശനവുമായി തെലുങ്ക് സംവിധായകൻ തമ്മറെഡ്ഡി ഭരദ്വാജ്. പുഷ്പ-2 സിനിമയുടെ റിലീസ് ദിവസമുണ്ടായ തിക്കിലും തിരക്കിലുംപെട്ട് രേവതി എന്ന യുവതി മരിക്കാനിടയായത് ഒരിക്കലും സംഭവിക്കാൻ പാടില്ലായിരുന്നുവെന്ന് അദ്ദേഹം പറഞ്ഞു. ഈ ദുരന്തമുണ്ടായത് അല്ലു അർജുൻ കാരണമാണെന്നും അദ്ദേഹം സോഷ്യൽ മീഡിയയിൽ പോസ്റ്റ് ചെയ്ത വീഡിയോയിൽ പറഞ്ഞു.
സന്ധ്യ തിയേറ്ററിൽ നടന്ന സംഭവത്തിൽ തമ്മറെഡ്ഡി ഭരദ്വാജ് ദുഃഖം രേഖപ്പെടുത്തി. അറിയാതെ തെറ്റുകൾ സംഭവിക്കാം. എന്നാൽ അറിഞ്ഞുകൊണ്ട് തെറ്റ് മറച്ചുവെയ്ക്കാൻ നുണകൾ പറയുന്നത് അംഗീകരിക്കാനാവില്ല. എല്ലാ സമയത്തും തെലുങ്ക് സിനിമാ വ്യവസായം മൊത്തമായി മുഖ്യമന്ത്രി കാണുകയും കൈയുംകെട്ടി നിൽക്കേണ്ട അവസ്ഥയാണ്. സമീപകാല സംഭവങ്ങൾ നിരീക്ഷിച്ചാൽ വ്യവസായത്തിലുള്ളവർക്ക് മാത്രമല്ല പുറത്തുനിന്നുള്ളവർക്കും വ്യക്തത ലഭിക്കുമെന്നും അദ്ദേഹം പറഞ്ഞു.
“സിനിമാ താരങ്ങളെ ആരാധകർ ദൈവമായാണ് കണക്കാക്കുന്നത്. നായകന്മാർ അവർ പോകുന്നിടത്തെല്ലാം വാഹനവ്യൂഹങ്ങളിൽ സഞ്ചരിക്കുകയും റോഡ്‌ഷോ നടത്തുകയും ചെയ്യണമെന്ന മട്ടിലാണ് ആരാധകർ പെരുമാറുന്നത്. അടുത്ത കാലത്തായി ഇതൊരു ട്രെൻഡ് ആയി മാറിയിരിക്കുകയാണ്. എന്നിരുന്നാലും, അവർ നിശബ്ദമായി സിനിമ കാണാൻ പോയി വലിയ ബഹളമില്ലാതെ മടങ്ങുകയാണെങ്കിൽ, അത്തരം സംഭവങ്ങൾ ഉണ്ടാകില്ല.
“ചിരഞ്ജീവിയോ നാഗാർജുനയോ ആണെങ്കിൽ വിവേകത്തോടെയേ പെരുമാറൂ. അവർ ഒരു മൾട്ടിപ്ലക്സിൽ പോകുകയും സിനിമ കാണുകയും വേദിയിൽ ഉണ്ടായിരുന്ന ആരാധകരുമായി ഹ്രസ്വമായി സംവദിച്ച ശേഷം മടങ്ങുകയും ചെയ്യും. സിംഗിൾ സ്‌ക്രീൻ തിയേറ്റർ സന്ദർശിക്കേണ്ടി വന്നാൽ, അവർ അത് മുൻകൂട്ടി പ്രഖ്യാപിക്കാതെ നിശ്ശബ്ദരായി വന്നുപോകും. എന്നാൽ ഇപ്പോൾ, ഒരു നായകൻ എപ്പോൾ, എവിടെയായിരിക്കുമെന്ന് അവർ എത്തുന്നതിന് മുൻപേതന്നെ സോഷ്യൽ മീഡിയ വെളിപ്പെടുത്തുന്നു. ഇത് അവരെ കാണാൻ വൻ ജനക്കൂട്ടം തടിച്ചുകൂടുന്നതിലേക്ക് നയിക്കുന്നു, ഇത് അരാജകമായ സാഹചര്യങ്ങളിലേക്ക് നയിക്കുന്നു.” തമ്മറെഡ്ഡി കൂട്ടിച്ചേർത്തു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
