മോഹന്‍ലാല്‍- പൃഥ്വിരാജ്- മുരളിഗോപി ചിത്രമായ ലൂസിഫറിന്റെ രണ്ടാംഭാഗത്തില്‍ മോഹന്‍ലാലിന്റേയും ടൊവിനോ തോമസ് അവതരിപ്പിച്ച ജതിന്‍ രാംദാസ് എന്ന കഥാപാത്രത്തിന്റേയും കോമ്പിനേഷന്‍ സീന്‍ ഉണ്ടാവുമെന്ന് സൂചന. ടൊവിനോ തന്നെയാണ് ഇക്കാര്യം വെളിപ്പെടുത്തിയത്. ലൂസിഫറില്‍ കിട്ടാതിരുന്ന കോമ്പിനേഷന്‍ സീന്‍ എമ്പുരാനില്‍ കിട്ടിയെന്ന് കഴിഞ്ഞദിവസം നടന്ന എല്‍2ഇ: എമ്പുരാന് ടീസര്‍ ലോഞ്ച് ചടങ്ങില്‍ ടൊവിനോ പറഞ്ഞു. അത് രസമുള്ള അനുഭവമായിരുന്നുവെന്നും ടൊവിനോ കൂട്ടിച്ചേര്‍ത്തു.
‘ലൂസിഫറിന്റെ കഥയും കഥാപാത്രത്തേയും കുറിച്ച് പറഞ്ഞപ്പോള്‍ തന്നെ, നീ ഭയങ്കര കയ്യടിവാങ്ങിക്കുമെന്ന് പറഞ്ഞിരുന്നു. സിനിമയുടെ ഇംപാക്ട് വലുതായിരുന്നു. അതേപ്രതീക്ഷയോടെയാണ് എമ്പുരാനേയും നോക്കി കാണുന്നത്. അത്രയും ഇമ്പാക്ട് ഉണ്ടാക്കിയ സിനിമ പക്ഷേ തനിക്ക് അത്രയും സമ്മര്‍ദ്ദമൊന്നും തന്നിരുന്നില്ല. കഷ്ടപ്പെട്ട് ബുദ്ധിമുട്ടി ചെയ്തതല്ല. അഭിനയിക്കാന്‍ പോയപ്പാള്‍, ഞാന്‍ എന്നെതന്നെ സമര്‍പ്പിക്കുകയാണ്, ബാക്കിയൊക്കെ നിങ്ങളുടെ റിസ്‌കാണ്. ആ റിസ്‌ക് നിങ്ങള്‍ എടുത്തോളൂ എന്ന് രാജു ചേട്ടനോടും മുരളി ചേട്ടനോടും പറഞ്ഞിരുന്നു. കരിയറില്‍ തന്നെ ശ്രദ്ധിക്കപ്പെട്ട കഥാപാത്രങ്ങളിലൊന്നായി അത് മാറി’, ആദ്യഭാഗത്തിലെ ജതിന്‍ രാംദാസ് എന്ന കഥാപാത്രത്തെക്കുറിച്ച് ടൊവിനോ പറഞ്ഞു.
സിനിമാ ജീവിതത്തില്‍ എനിക്കും പ്രേക്ഷകര്‍ക്കും ഏറ്റവും ഇഷ്ടപ്പെട്ട കഥാപാത്രമാണ് പ്രിയദര്‍ശനി രാംദാസെന്ന് മഞ്ജു വാര്യര്‍ പറഞ്ഞു. പ്രിയദര്‍ശനിയുടെ യാത്ര എമ്പുരാനിലൂടെ തുടരുകയാണ്. വലിയ സന്തോഷത്തോടെ ചെയ്യാന്‍ സാധിച്ച സിനിമയാണ് ലൂസിഫര്‍. ലൂസിഫര്‍ ഇഷ്ടപ്പെട്ടതുപോലെ എമ്പുരാനും പ്രേക്ഷകര്‍ക്ക് ഇഷ്ടമാവട്ടെയെന്നും അവര്‍ പ്രതീക്ഷപ്രകടിപ്പിച്ചു.
‘രാജു പറയുന്നത് ചെയ്യാന്‍ ശ്രമിച്ചാല്‍ മതി. എന്തുവേണ്ട എന്നുള്ളതാണ് രാജുവിന് കൂടുതല്‍ ധാരണ. അതുകൊണ്ട് വളരെ കംഫര്‍ട്ടബിളായി വര്‍ക്ക് ചെയ്യാന്‍ പറ്റുന്ന സംവിധായകനാണ്. ഫേവറിറ്റ് സംവിധായകരുടെ ലിസ്റ്റ് ചോദിച്ചാല്‍, ആദ്യത്തെ അഞ്ചുപേരില്‍ ഒരാളായി തീര്‍ച്ചയായും രാജുവിന്റെ പേര് അതിലുണ്ടാവും. ജോര്‍ജിയ, അമേരിക്ക… സിനിമയില്‍ അഭിനിയിച്ച മറ്റുള്ളവര്‍ പോകാത്ത രാജ്യങ്ങളൊന്നുമില്ല. കേരളത്തില്‍ മാത്രം ഷൂട്ടിങ്ങുണ്ടായിരുന്ന ഒരേയൊരു ആക്ടര്‍ ഒരുപക്ഷേ ഞാനായിരിക്കും’, പൃഥ്വിരാജിന്റെ സംവിധാന രീതിയെക്കുറിച്ചുള്ള ചോദ്യത്തോട് മഞ്ജു പ്രതികരിച്ചു. എവിടെയാണെന്നുള്ളതല്ലല്ലോ എന്താണെന്നുള്ളതല്ലേ കാര്യമെന്നായിരുന്നു ഇതിനോട് ടൊവിനോയുടെ പ്രതികരണം.
എമ്പുരാന് ലൂസിഫറിനേക്കാള്‍ വലിപ്പം കൂടിയിട്ടേയുള്ളൂ. രാജു പറയുന്നതുപോലെ കൂടുതല്‍ വലിയ ചെറിയ സിനിമയാവട്ടെ രണ്ടാംഭാഗമെന്നും മഞ്ജു ആശംസിച്ചു.
ദിവസം ലക്ഷകണക്കിന് ആളുകൾ വിസിറ്റ് ചെയ്യുന്ന ഞങ്ങളുടെ സൈറ്റിൽ നിങ്ങളുടെ പരസ്യങ്ങൾ നൽകാൻ ബന്ധപ്പെടുക വാട്സാപ്പ് നമ്പർ 7012309231 Email ID [email protected]
