ചരിത്രനേട്ടവുമായി 'കൽക്കി', അഭ്യൂഹങ്ങൾക്ക് വിടനൽകി ഔദ്യോ​ഗിക കളക്ഷൻ പുറത്ത്

1000 കോടി ക്ലബ്ബ് എന്ന മാന്ത്രിക സംഖ്യ ചിത്രം പിന്നിട്ടുകഴിഞ്ഞു. ആ​ഗോളതലത്തിൽ ചിത്രം ഇതുവരെ 1100 കോടിരൂപ സ്വന്തമാക്കിയെന്ന് നിർമാതാക്കൾ അറിയിച്ചു. ഈ വർഷം 1000 കോടി ക്ലബ്ബെന്ന നേട്ടത്തിലെത്തുന്ന ആദ്യത്തെ ചിത്രമെന്ന നേട്ടവും കൽക്കി സ്വന്തമാക്കിക്കഴിഞ്ഞു. കഴിഞ്ഞ വർഷം ഷാരൂഖ് ഖാൻ നായകനായെത്തിയ ജവാൻ, പഠാൻ എന്നീ ചിത്രങ്ങൾ 1000 കോടി ക്ലബ്ബിൽ ഇടംനേടിയിരുന്നു.

അധികം വെെകാതെ ഷാരൂഖ് ചിത്രം ജവാനെ കളക്ഷനിൽ കൽക്കി പിന്നിടുമെന്നാണ് അനലിസ്റ്റുകൾ നിരീക്ഷിക്കുന്നത്. റിപ്പോർട്ടുകൾ പ്രകാരം 1148 കോടി രൂപയാണ് അറ്റ്ലീ സംവിധാനം ചെയ്ത ‘ജവാൻ’ സ്വന്തമാക്കിയത്. ബോക്സോഫീസ് കളക്ഷൻ്റെ കാര്യത്തിൽ അമീർ ഖാൻ നായകനായെത്തിയ ‘ദം​ഗൽ’ ആണ് ഇന്ത്യൻ ചിത്രങ്ങളിൽ മുന്നിൽ. 2016-ൽ പുറത്തിറങ്ങിയ ചിത്രം ചെെനയിലെ റിലീസിന് പിന്നാലെ ആ​ഗോളതലത്തിൽ 2023 കോടിരൂപ സ്വന്തമാക്കിയിരുന്നു.

ഇന്ത്യൻ മിത്തോളജിയിൽ വേരൂന്നി പുരാണങ്ങളിൽ നിന്ന് പ്രചോദനം ഉൾക്കൊണ്ട് ഭാവിയെ തുറന്നുകാണിക്കുന്ന സയൻസ് ഫിക്ഷനാണ് ‘കൽക്കി 2898 എഡി’. ‘കാശി, ‘കോംപ്ലക്സ്’, ‘ശംഭാള’ എന്നീ മൂന്ന് ലോകങ്ങളുടെ കഥ പറയുന്ന ചിത്രത്തിൽ 3101-ലെ മഹാഭാരതത്തിൻ്റെ ഇതിഹാസ സംഭവങ്ങൾ മുതൽ എഡി 2898 സഹസ്രാബ്ദങ്ങൾ വരെ നീണ്ടുനിൽക്കുന്ന യാത്രയാണ് ദൃശ്യാവിഷ്കരിച്ചിരിക്കുന്നത്. 2024 ജൂൺ 27നാണ് ചിത്രം തിയേറ്റർ റിലീസ് ചെയ്തത്.

അമിതാഭ് ബച്ചൻ, കമൽ ഹാസൻ, ദീപിക പദുക്കോൺ, ദിഷാ പഠാനി, വിജയ് ദേവരകൊണ്ട, ദുൽഖർ സൽമാൻ തുടങ്ങിയ വമ്പൻ താരങ്ങൾ അണിനിരന്ന ചിത്രത്തിൽ ‘ഭൈരവ’യായ് പ്രഭാസ് എത്തുമ്പോൾ നായിക കഥാപാത്രമായ ‘സുമതി’യായ് പ്രത്യക്ഷപ്പെടുന്നത് ദീപിക പദുക്കോണാണ്. മറ്റ് സുപ്രധാന കഥാപാത്രങ്ങളായ ‘അശ്വത്ഥാമാവ്’നെ അമിതാഭ് ബച്ചനും ‘യാസ്കിൻ’നെ കമൽ ഹാസനും ‘ക്യാപ്റ്റൻ’നെ ദുൽഖർ സൽമാനും ‘റോക്സി’യെ ദിഷാ പടാനിയും അവതരിപ്പിച്ചു.