സ്ത്രീവിരുദ്ധ പരാമർശം: മൻസൂർ അലിഖാൻ മാപ്പുപറഞ്ഞു

അടുത്തിടെ പുറത്തിറങ്ങിയ ‘ലിയോ’ എന്ന ചിത്രവുമായി ബന്ധപ്പെട്ട അഭിമുഖത്തിൽ തൃഷ അടക്കമുള്ള തമിഴ്നടിമാരെ ബന്ധപ്പെടുത്തി നടത്തിയ പരാമർശമാണ് കേസിനടിസ്ഥാനം. തെറ്റായി ഒന്നും പറഞ്ഞിട്ടില്ലെന്ന് പ്രതികരിച്ച അലിഖാൻ, ഒരിക്കലും മാപ്പുപറയില്ലെന്നും വ്യക്തമാക്കിയിരുന്നു. എന്നാൽ, ഇപ്പോൾ ഖേദപ്രകടനത്തിന് തയ്യാറാകുകയായിരുന്നു. ഇതിനിടെ മുൻകൂർ ജാമ്യംതേടി സമർപ്പിച്ച ഹർജി വാദം കേൾക്കുന്നതിനുമുമ്പ് പിൻവലിച്ചത് കോടതിയുടെ വിമർശനത്തിന് കാരണമായി.

ചെന്നൈ പ്രിൻസിപ്പൽ സെഷൻസ് കോടതിയിലാണ് മൻസൂർ അലിഖാൻ മുൻകൂർജാമ്യാപേക്ഷ സമർപ്പിച്ചത്. കേസ് പരിഗണിച്ച ഉടൻ ഇത് പിൻവലിക്കുകയാണെന്ന് അറിയിച്ചു. കേസെടുത്തിരിക്കുന്ന പോലീസ് സ്റ്റേഷൻ സംബന്ധിച്ച ആശയക്കുഴപ്പമായിരുന്നു കാരണം. തൗസന്റ് ലൈറ്റ്‌സ് പോലീസിനുപകരം നുങ്കമ്പാക്കം പോലീസിനെ ചേർത്താണ് ഹർജി നൽകിയത്. പിന്നീട് തൗസന്റ് ലൈറ്റ്സ് പോലീസിനെ ചേർത്ത്‌ പുതിയ ഹർജി നൽകി. തുടർന്ന്, അശ്രദ്ധമായ നടപടികളിലൂടെ കോടതിയുടെ സമയം പാഴാക്കരുതെന്ന് കോടതി മുന്നറിയിപ്പുനൽകി.

വിജയ്‌ നായകനായി അഭിനയിച്ച ‘ലിയോ’ എന്ന സിനിമയുമായി ബന്ധപ്പെട്ട് ഒരു തമിഴ് മാധ്യമത്തിന് നൽകിയ അഭിമുഖത്തിൽ നടി തൃഷയ്ക്കെതിരെയാണ് മൻസൂർ അലി ഖാൻ വിവാദ പരാമർശങ്ങൾ നടത്തിയത്. ലിയോയിൽ തൃഷയാണ് നായികയെന്നറിഞ്ഞപ്പോൾ ഒരു കിടപ്പറ രം​ഗമുണ്ടാവുമെന്ന് പ്രതീക്ഷിച്ചുവെന്നായിരുന്നു നടൻ പറഞ്ഞത്. തൃഷ തന്നെയാണ് നടനെതിരേ ആദ്യം ശക്തമായി രംഗത്തുവന്നത്. ഇനിയൊരിക്കലും കൂടെ അഭിനയിക്കില്ലെന്നും തൃഷ വ്യക്തമാക്കിയിരുന്നു. ഇതിനുപിന്നാലെ മൻസൂർ അലിഖാനെതിരെ സിനിമാലോകത്തുനിന്ന് വ്യാപക പ്രതിഷേധവും ഉയർന്നു.

നടന്മാരായ ചിരഞ്ജീവി, നിതിൻ, സംവിധായകൻ ലോകേഷ് കനകരാജ്, നടി മാളവിക മോഹനൻ, ​ഗായിക ചിന്മയി തുടങ്ങിയവരും തൃഷയ്ക്ക് പിന്തുണയുമായെത്തിയവരിൽ ഉൾപ്പെടുന്നു. സംഭവത്തിൽ നടൻ മൻസൂർ അലി ഖാനെതിരേ ദേശീയ വനിത കമ്മിഷൻ സ്വമേധയാ കേസെടുത്തിരുന്നു.