വർമൻ ഇല്ലെങ്കിൽ ജയിലർ ഇല്ല, വർമൻ ഷോലെയിലെ ​ഗബ്ബർ സിം​ഗിനെപ്പോലെ -രജനികാന്ത്

ക്ലാസിക് ചിത്രം ഷോലെയിൽ അംജദ് ഖാൻ അവതരിപ്പിച്ച ​ഗബ്ബർ സിം​ഗ് എന്ന കഥാപാത്രത്തോടാണ് രജനി വർമനെ ഉപമിച്ചത്. ​ഗബ്ബർ സിം​ഗിനെപ്പോലെ വർമനും സെൻസേഷനാകുമെന്ന് സംവിധായകൻ നെൽസണോട് പറയുമായിരുന്നു. ​ഗംഭീര പ്രകടനമായിരുന്നു വിനായകന്റേതെന്നും രജനി പറഞ്ഞു. അതേസമയം വിജയാഘോഷത്തിൽ പങ്കെടുക്കാൻ വിനായകൻ എത്തിയിരുന്നില്ല.

‘‘ജയിലർ ചെയ്തുകൊണ്ടിരുന്നപ്പോൾ നെൽസണോട് ഷോലയിലെ ഗബ്ബർ സിങ് എന്ന കഥാപാത്രത്തെക്കുറിച്ച് ഞാൻ പറയുമായിരുന്നു. നെൽസൺ ഷോലെ കണ്ടിട്ടില്ല. ആ സിനിമ ഞാൻ കാണിച്ചുകൊടുത്തു. ഗബ്ബർ സിങ് എങ്ങനെയായിരുന്നുവെന്നും ആ കാലഘട്ടത്തിൽ സെൻസേഷനായിരുന്നതുമൊക്കെ പറഞ്ഞു കൊടുത്തു. അതുപോലെ വർമനും സെൻസേഷനാകുമെന്ന് ഞാൻ പറഞ്ഞു. വിനായകൻ ഇവിടെ വിജയാഘോഷത്തിനു വന്നിട്ടില്ല. സൂപ്പർ പ്രകടനമായിരുന്നു അദ്ദേഹത്തിന്റേത്.

രാവണൻ ഉള്ളത് കൊണ്ടാണ് രാമന് എല്ലാ ബഹുമാനവും മര്യാദയും ലഭിച്ചത്. അതുപോലെയാണ് ജയിലറിൽ വർമനും. വർമൻ ഇല്ലെങ്കിൽ ജയിലർ ഇല്ല. ഗംഭീര പ്രകടനമാണ് വിനായകൻ കാഴ്ചവച്ചത്.’’–രജനികാന്ത് പറഞ്ഞു. ജയിലർ സിനിമയിലെ ഏറ്റവും വലിയ അനുഭവം രജനികാന്തിന്റെ പെരുമാറ്റമായിരുന്നുവെന്ന് വിനായകനും പല അഭിമുഖങ്ങളിലായി പറഞ്ഞിരുന്നു.

സൺ പിക്‌ചേഴ്‌സിന്റെ ബാനറിൽ കലാനിധി മാരൻ നിർമിച്ച ‘ജയിലർ’ ഓഗസ്റ്റ് 10-നാണ് തിയേറ്ററുകളിൽ എത്തിയത്. മോഹൻലാൽ രജനീകാന്തിനൊപ്പം ആദ്യമായി അഭിനയിച്ച ചിത്രം കൂടിയാണിത്. രജനിയുടെ 169-ാം ചിത്രം കൂടിയായിരുന്നു ‘ജയിലർ’. മുത്തുവേൽ പാണ്ഡ്യൻ എന്ന ജയിലറുടെ വേഷത്തിലാണ് രജനികാന്ത് എത്തിയത്. വിജയ് നായകനായെത്തിയ ബീസ്റ്റ് എന്ന ചിത്രത്തിന് ശേഷം നെൽസൻ സംവിധാനം ചെയ്ത ചിത്രത്തിൽ ശിവരാജ് കുമാർ, തമന്ന, രമ്യ കൃഷ്ണൻ, ജാക്കി ഷ്‌റോഫ്, സുനിൽ തുടങ്ങിയവരായിരുന്നു മറ്റുവേഷങ്ങളിൽ. അനിരുദ്ധായിരുന്നു സംഗീത സംവിധായകൻ.